Qazaqstanda «Astana Leisure» týrıstik kórmesi ótip jatyr

ASTANA. QazAqparat - Búgin elordadaǵy «Týrıstik kórme» ortalyǵynda «Astana Leisure» qazaqstandyq halyqaralyq týrıstik kórmesi ashyldy.

«Ózderińiz bilesizder, búgingi kórme Ortalyq Azııadaǵy aldyńǵy qatarly sharalardyń biri bolyp tabylady. Osy rette týrıstik operatorlar, týrıstik naryqtyń mamandary úshin dıalog alańyna aınaldy. Biz Sizderdi osyndaı sharalarǵa Astanaǵa kelgenderińiz úshin qýanyshtymyz. Atap aıtqanda, aldaǵy jyly Qazaqstan iri eki sharany ótkizedi, ıaǵnı EKSP-2017 kórmesi men al aqpanda Almaty qalasynda qysqy Ýnıversıada uıymdastyrylady. Bul turǵyda biz sizderdi osy ataýly sharalarda kútemiz»,-dedi QR IDM Týrızm ındýstrııasy departamentiniń dırektory Marat Nesipqalıuly.

Atap aıtqanda, Astana Leisure Ortalyq Azııadaǵy iri týrıstik forým bolyp tabylady jáne jyl saıyn óziniń alańynda týrıstik ındýstrııanyń kóshbasshylaryn, mamandaryn jınap keledi. 2015 jyly bul sharaǵa 25 elden 95 kompanııa qatysqan bolatyn.

Bıylǵy jyly Qazaqstan, Vengrııa, Vetnam, Germanııa, Grýzııa, Úndistan, Qytaı, Koreıa, Reseı, Taıland, Túrkııa, Ýkraına jáne basqa elderden 100-den astam kompanııa kórmede qyzmetterin tanystyrýda.

Uıymdastyrýshylardyń sózine qaraǵanda, Qazaqstannyń barsha óńirlerinen usynylǵan týrıstik resýrstar elimizdiń bul saladaǵy áleýetin nasıhattaýǵa múmkindik berip otyr.

Kórme aıasynda otandyq jáne sheteldik kompanııalar arasynda kóptegen kelissózder ótkizilýde. Sonymen qatar Qazaqstanda osy salany damytý baǵytynda arnaıy semınarlar men keńester uıymdastrylýda.

Aıta keteıik, kórme jumysy qazannyń 1-ne deıin jalǵasady.