Qazaqstanda áskerılerge baspana tólemderin esepteý ózgertilmek
«Búginde zańnama aıasynda turǵyn úı tólemderi óńirge qaraı júzege asyrylady. Bul óz kezeginde áskerılerge bastapqy jarnany ýaqtyly jınaqtaýǵa múmkindik bermeıdi», - dep toqtaldy mınıstrdiń orynbasary.
Belgili bolǵandaı, áskerı qyzmetshilerge arnalǵan atalǵan tólemderdiń eń tómen deńgeıi Jambyl oblysynda (18 myń teńge) bolsa, al eń joǵary soma Almaty men Astanada tirkelgen.
«Osy oraıda 18 myń teńgege jınaq júrgizý qıynǵa túsedi. Máseleni sheshý úshin birqatar usynysty qarastyryp otyrmyz. Birinshi nusqa boıynsha barlyq osy tólemderdi jalpy respýblıkalyq etýge negizdelgen, ıaǵnı el boıynsha bir deńgeıge shyǵarý. Alaıda bul jaǵdaıda Almaty, Astana jáne elimizdiń batys óńirlerindegi áskerılerge qıyn bolady. Olarǵa arnalǵan tólemder azaıyp ketedi, sáıkesinshe atalǵan óńirlerdegi áskerı qyzmetshiler de qajetti somany jınaı almaı qalady. Ekinshi nusqaǵa toqtalsaq, olardy eki sanatqa bólý qarastyryldy. Birinshi sanatqa Almaty, Astana, Aqtaý, Atyraý áskerılerin, al ekinshi sanatqa qalǵan qalalardy engizý eskerildi. Qazirgi kezde tıisti esep-qısapty júrgizip jatyrmyz. Budan bólek, úshinshi nusqada jınaq bóligin el boıynsha ortasha deńgeıde belgilep, al arendalyq bóligin óńirler boıynsha saralaý usynyldy. 26 qazanda osy jumystarǵa kiristik. Onyń qorytyndysy boıynsha barlyq máseleni Qarjy mınıstrligimen kelisip, tıisti usynysty engizemiz», - dedi Talǵat Janjúmenov.
Budan buryn habarlanǵandaı, bıyl 4 myńǵa tarta áskerı qyzmetshi jeke baspanasyn alady.
