Qazaqstanda áskerı ushaqtardy kommertsııalyq maqsatta qoldanýǵa ruqsat bermek
ASTANA. KAZINFORM – Qorǵanys mınıstrligi áskerı-kólik avıatsııasyn kommertsııalyq jáne ózge de maqsatta paıdalaný boıynsha zańnamalyq sharalar keshenin ázirledi. Qujat jobasy «Ashyq NQA» portalynda jarııalandy.
Qazaqstan zańnamasynda memleket menshigindegi avıatsııany Halyqaralyq azamattyq avıatsııa uıymynyń (IKAO) standarttary men usynylatyn praktıkasyna sáıkes aqyly negizde paıdalanýǵa múmkindik beretin norma joq.
Búginde birqatar elde, onyń ishinde Ulybrıtanııa, Koreıa, Germanııa, Túrkııa, Mysyr, Reseı jáne Belarýstiń tájirıbesi áskerı-kólik avıatsııasynyń azamattyq maqsatta tıimdi qoldanylý múmkin ekenin kórsetip otyr.
Osy oraıda jańa jobada shekteýdi alyp tastap, memlekettik avıatsııany aqyly negizde paıdalanýǵa zańnamalyq deńgeıde múmkindik berý usynylady. Degenmen áskerı ushaqtardy paıdalaný áskerı bólimshelerdiń jaýyngerlik daıyndyǵy men jaýyngerlik qabiletine nuqsan keltirmeýi tıis.
Qujatqa sáıkes, qazir Qazaqstan Qarýly kúshteri áskerı-kólik avıatsııasynyń 15 áýe kemesin paıdalanyp otyr. Olardy jóndeý men qyzmet kórsetýge jyl saıyn memlekettik bıýdjetten shamamen 7 mlrd teńge bólinedi. Alaıda, bólinetin qarjy kólemi tehnıkanyń tozǵan úlgilerin ýaqtyly aýystyrýǵa múmkindik bermeıdi.
- Júrgizilgen taldaý kórsetkendeı, azamattyq sektorda júk tasymalyn qıyn, qoljetimsiz óńirler men jergilikti qaqtyǵys aımaqtaryna jetkizetin tetikter joq. Usynylyp otyrǵan normalardy engizýdiń kútiletin nátıjesinde, áskerı avıatsııany qoldaný aıasyn keńeıtý, onyń júktemesin arttyrý, logıstıka salasyndaǵy bızneske qoldaý kórsetý, bıýdjetke túsetin júktemeni azaıtý jáne avıatsııany jóndeý men damytýǵa qosymsha qarjy kózderin tabý múmkindigi bar,- delingen qujat jobasynda.
Sondaı-aq jańa qujat jobasynda memlekettik avıatsııany basqa memlekettik organdardyń múddesi úshin, onyń ishinde elden tys jerlerde de paıdalaný múmkindigi qarastyrylǵan. Odan bólek osy mamyrda jobany Ádilet mınıstrligine aldyn ala qorytyndy alý úshin joldaý josparlanyp otyr. 2026 jylǵy shildede qoǵamdyq tyńdaýlar ótedi, al 2026 jylǵy jeltoqsanda zań jobasy Parlament Májilisine engiziledi.
Keshe Qarýly kúshterde ushqyshsyz ushý júıesiniń úzdik operatorlary marapattalǵany týraly jazǵan edik.