Qazaqstanda áskerı telearna qurý usynyldy
«Elimizdegi áskerı tárbıe júıesin jaqsartý jáne jetildirý, áskerı tártipti nyǵaıtý maqsatynda 1993 jylǵy 19 qańtarda «Qazaqstan Respýblıkasynyń Qarýly Kúshterinde komandırlerdiń (bastyqtardyń) tárbıe jáne áleýmettik-quqyqtyq jumys jónindegi orynbasarlarynyń ınstıtýtyn qurý týraly» el Prezıdentiniń N1084 Jarlyǵy qabyldandy. Elbasy Jarlyǵyna sáıkes, «TÁQJ boıynsha orynbasarlar ınstıtýty» bastapqyda Qorǵanys mınıstrligi ortalyq apparatynan bastap, barlyq býyndarǵa deıin engizildi. Alaıda keıin bul sala ózgeriske ushyrap, Qarýly Kúshterde atalǵan jumys Bas shtabqa júktelgen. Osynyń nátıjesinde, bunymen QR QK Bas shtabynyń Tárbıe jáne ıdeologııalyq jumystar departamenti aınalysyp keledi. Jarlyq erejesi tolyqqandy oryndalýy maqsatynda tárbıe jáne áleýmettik-quqyqtyq jumys deńgeıin kóterip, jeke quramnyń moraldyq-psıhologııalyq ahýaly men áskerı tártipti nyǵaıtý kerek. Bul rette Qorǵanys mınıstrliginde tárbıe jáne áleýmettik-quqyqtyq jumys jónindegi orynbasary laýazymyn qaıta qalpyna keltirýdi usynamyn», - dep atap ótti depýtat Májilistiń jalpy otyrysynda.
Budan bólek B. Smaǵuldyń depýtattyq saýalynda jeke áskerı telearna qurý bastamasyn qarastyrý usynysy da qamtylǵan.
Onyń paıymynsha, búginde ekshn stılindegi otandyq tolyq metrajdy kórkem fılmder, QR QK basqa da áskerler men áskerı qurylymdary týraly oqý, derekti, ǵylymı-tanymdyq, aǵartý fılmderdi jasap shyǵarý boıynsha belsendi áreketter joq.
Munymen qosa ol Elbasy jarııalaǵan «Rýhanı jańǵyrý» baǵdarlamasyndaǵy bastamany úlgi ete otyryp, táýelsiz Qazaqstannyń Otan qorǵaýshylarynyń qaharmandyǵy men jetistikterin kórsetip, qoǵam arasynda nasıhattaıtyn «Áskerdegi 100 jańa esim» jobasyn ótkizý bastamasyn kóterdi.
