Qazaqstanda áskerı rezervtiń atys daıyndyǵy kúsheıtildi
ASTANA. KAZINFORM – Gvardeısk garnızonynda zapastaǵy áskerı qyzmetshiler atys daıyndyǵynan praktıkalyq sabaqtarǵa kiristi, dep habarlaıdy QR Qorǵanys mınıstrliginiń baspasóz qyzmeti.
Jambyl jáne Almaty oblystarynyń, sondaı-aq Almaty qalasynyń 200-den astam turǵyny oqý baǵdarlamasy aıasynda shtattyq qarýdy qoldaný daǵdylaryn jetildirip, túrli jattyǵýlardy oryndap jatyr.
Praktıkalyq sabaqtar áskerı-eseptik mamandyqtar boıynsha qaıta daıarlaý sheńberinde uıymdastyrylǵan.
Oqý jıynyna qatysýshylar Kalashnıkov avtomatyn, Dragýnov mergender vıntovkasyn, Kalashnıkov pýlemetin jáne RPG-7V qol granataatqyshyn qoldanyp, oqý-jattyǵý atystaryn ótkizip, sheberlikterin shyńdap jatyr. Jattyǵýlar jaýyngerlik jaǵdaıǵa barynsha jaqyndatylǵan.
Sabaq barysynda atys normatıvterin oryndaýǵa, qaýipsizdik talaptaryn saqtaýǵa, atys shebindegi is-qımyldarǵa jáne árbir áskerı mindettiniń jeke daıarlyǵyn jetildirýge erekshe kóńil bólingen. Oqý protsesiniń barysyn tájirıbeli ofıtserler men nusqaýshylar qadaǵalaıdy.
– Atys daıarlyǵy – áskerı mindettilerdi qaıta daıarlaýdyń negizgi baǵyttarynyń biri. Praktıkalyq atystar shtattyq qarýmen jumys isteý daǵdylaryn qalpyna keltirip, olardy nyǵaıtýǵa, derbes daıarlyq deńgeıin arttyrýǵa jáne qoıylǵan mindetterdi senimdi oryndaýǵa múmkindik beredi. Zamanaýı oqytý ádisteri men nusqaýshylardyń tájirıbesi oqý protsesiniń tıimdiligi men qaýipsizdigin qamtamasyz etedi, – dedi oqý jıyny shtabynyń bastyǵy podpolkovnık Jaqsylyq Myrzaǵalıev.
QR Qarýly kúshteriniń jaýyngerlik daıarlyq josparyna sáıkes ótkizilgen oqý jıyny áskerı daıarlanǵan rezervti qalyptastyrýǵa jáne jumyldyrý ázirligin joǵary deńgeıde ustaýǵa baǵyttalǵan.
Osyǵan deıin áskerı oqý oryndarynda qandaı jańa mamandyqtarǵa basymdyq beriletini týraly jazdyq.
