Qazaqstanda áskerı-patrıottyq jáne sporttyq-saýyqtyrý qozǵalysy belsendi damyp keledi - QR QM
QR QK Bas shtaby bastyǵynyń orynbasary polkovnık M.Talasov «Nur Otan» partııasy ortalyq apparatynda ótken sarapshylar tobynyń birlesken otyrysynda osylaı aıtty.
Búgingi tańda respýblıkada jastardyń áskerı-patrıottyq jáne sporttyq-saýyqtyrý qozǵalystaryn damytýda belsendi atsalysyp kele jatqan kóptegen uıymdar jumys isteıdi. Bıyl jastardyń 11 myńnan astam ókili jas armııashylar birlestikteri respýblıkalyq shtabynyń qoldaýymen ótken áskerı-patrıottyq is-sharalarǵa qatysqan. Bul shtabtyń 2010 jyly qurylǵannan bastap respýblıkalyq jáne óńirlik deńgeılerde 40-tan astam is-shara ótkizgenin atap ótken jón. Bul rette is-sharaǵa qatysatyn jastardyń sany 5 jyl ishinde bes esege artty (2010 jyly - 2635 adam).
Budan basqa, búgingi tańda 217 jergilikti áskerı basqarý organynyń bazasynda 202 jas armııashylar ortalyqtary quryldy.
Óńirlerde áskerı-qoldanbaly sport túrlerin damytýdy nasıhattaý jumysyn Áskerı-sporttyq klýbtar federatsııasy júrgizip keledi. 2014 jyly ol 8 myńǵa jýyq adam qatysqan 10 is-shara ótkizdi.
Elbasy tapsyrmasyna sáıkes áskerı-tehnıkalyq mektepter bazasynda 15 óńirlik patrıottyq tárbıe ortalyqtary quryldy. Onda áskerı-qoldanbaly sport túrleri men tehnıkalyq shyǵarmashylyq boıynsha 7-18 jas aralyǵyndaǵy 1500-den astam bala men jasóspirimder tartylǵan 25 sporttyq sektsııa men klýb jumys isteıdi.
Sońǵy bes jyl ishinde áskerı-tehnıkalyq mektepter 7 mamandyq boıynsha 28 myńnan astam áskerı-tehnıkalyq mamandy tegin daıarlap, áskerı oqytylǵan rezerv daıarlaý kýrsy boıynsha 10 myńnan astam azamatqa aqyly negizde bilim berdi, dep habarlaıdy QR Qorǵanys mınıstrliginiń baspasóz qyzmeti.
