Qazaqstanda áskerı oqý oryndaryna túsý úshin úmitkerler iriktelip jatyr

ASTANA. QazAqparat - Qazaqstan Respýblıkasy áskerı basqarmasynyń jergilikti organdarynda Qorǵanys mınıstrliginiń joǵary áskerı oqý oryndaryna túsý úshin úmitkerler aldyn ala iriktelip jatyr. Bul týraly mınıstrliktiń baspasóz qyzmeti habarlady. 

Qazaqstan Respýblıkasynyń áskerı basqarmalary jergilikti organdarynyń laýazymdy tulǵalary joǵary áskerı oqý oryndaryna túsýge úmitkerlerdiń jeke qasıetterin, olardyń densaýlyq jaǵdaıyn, áskerı-kásibı baǵyttaryn, dene daıyndyqtary men jalpy bilim berý daıyndyqtary deńgeıin zertteý boıynsha belsendi jumys júrgizip jatyr.

Joǵary áskerı oqý oryndaryna túskisi keletin túlekterdi irikteý sharalary bıyl qańtarda bastalǵan jáne shildege deıin jalǵasady. Kásibı baǵdarlaý jumystary QR Qorǵanys mınıstrliginiń barlyq áskerı bólimderi men mekemelerinde aýmaqtyq bilim berý mekemelerimen jáne alǵashqy áskerı daıyndyqty uıymdastyrýshy-muǵalimdermen birlesip júrgizilýde.

Aıta ketken jón, Qazaqstanda «Bakalavr» baǵdarlamasy boıynsha áskerı mamandardy úsh joǵary oqý orny daıyndaıdy. Olarǵa Qurlyq áskerleri áskerı ınstıtýty, Radıoelektronıka jáne baılanys áskerı-ınjenerlik ınstıtýty, Áýe qorǵanysy kúshteriniń áskerı ınstıtýty kiredi.