Qazaqstanda áskerı oqý oryndaryna túsý anaǵurlym jeńildedi
ASTANA. QazAqparat - Qazaqstanda áskerı oqý oryndaryna túsý anaǵurlym jeńildetildi, dep habarlaıdy QR Qorǵanys mınıstrliginiń baspasóz qyzmetinen.
«Qabyldaýdyń barlyq qaǵıdalaryna qujattar resimdeý boıynsha ózgerister engizildi. Atap aıtqanda, aralyq satylar qysqartylyp, kásibı irikteý kezeńderiniń ádilettigi arttyryldy. Endi áskerı oqý oryndary oqyp-úırenýshilerdiń anaǵurlym sapaly kontıngentin irikteı alady», delingen habarlamada.
Qabyldaý qaǵıdalaryna engizilgen jańashyldyq mańyzdy jáne eleýli bolyp tabylady. «Jas ulandy» qosa eseptegende, barlyq respýblıkalyq áskerı mektep-ınternattaryna qabyldaý jergilikti áskerı basqarý organdarynan ótip baryp, 9 synyptan keıin (10 synyptan bastap) júzege asyrylady. Endi baıqaý UBT tapsyrý nátıjeleri boıynsha ǵana emes, kásibı irikteýdiń barlyq kezeńderinen ótý qorytyndysy boıynsha eseptelinetin reıtıngtik ball arqyly júrgiziletin bolady. UBT sertıfıkattarynda tańdaý boıynsha pánderdiń túrleri kóbeıedi. Atap aıtsaq, fızıka, hımııa, bıologııa, geografııa, «Áskerı is jáne qaýipsizdik» tobynyń barlyq mamandyqtaryna arnalǵan dúnıejúzi tarıhy.
Budan ózge, ǵylymı negizde kásibı-psıhologııalyq irikteý úshin jańa testiler ázirlenedi.
Sondaı-aq habarlamada QR Qarýly Kúshteriniń qurylý kezinen bastap áskerı kadrlardy daıarlaý máselelerine úlken kóńil bólinip kele jatqany aıtylǵan.
«Qoldanystaǵy áskerı oqý oryndary bilim berýdiń barlyq deńgeıleri men dárejelerin usynýda jáne serjanttardan bastap ofıtserlerge deıin áskerı mamandardy daıarlaýdy qamtamasyz etedi. Qoıylǵan maqsattarǵa qol jetkizý úshin, sondaı-aq qarýlanǵan kúres quraldarynyń damý úrdisin, áskerler men qarýdy basqarý, zamanaýı urystar men qarýly janjaldarda aqparatttar róliniń ulǵaıýyn eskere otyryp, kadrlardy daıarlaý júıesi udaıy jetildiriledi», delingen onda.
