Qazaqstanda áskerı qyzmetshilerdi baǵalaýdyń jańa júıesiniń jobasy synamadan ótýde (FOTO)

ASTANA. QazAqparat - QR Qarýly Kúshterinde áskerı qyzmetshilerdi baǵalaýdyń reıtıngtik júıesiniń eksperımentaldi jobasy synamadan ótýde. Buǵan QR QK Qurlyq áskerleri men Áýe qorǵanysy kúshteriniń 27943, 32363, 97617 jáne 55652 tórt áskerı bóliminiń ofıtserleri tańdap alyndy, dep habarlaıdy QR Qorǵanys mınıstrliginiń baspasóz qyzmeti.

Osy júıe boıynsha áskerı qyzmetshin 40 krıterıı boıynsha synalady, laýazymyna qaramastan barlyq ofıtserlerdi baǵalaý úshin 35 suraq belgilendi jáne úsh taraýǵa bólindi: jalpy minez-qulqy, kásibı daıyndyǵy, erekshe qasıetteri. Qalǵan 5 suraq komandalyq jáne shtabtyq laýazymdar boıynsha ofıtserlerdi bólek baǵalaýdy qamtıdy.

Atalǵan qaǵıdat mektepte test tapsyrýdy eske salady. Bul rette suraqtarǵa testileýden ótetin adam emes onyń tikeleı komandıri jaýap beredi. Barlyq derekter óńdeledi jáne avtomatty rejimde eseptelinedi. Sebebi, jaýaptar paraǵy skanerlenip, avtomattandyrylǵan júıemen tanylady. Odan keıin kompıýter 100 baldyq júıe boıynsha qorytyndy baǵa shyǵarady. Mundaı reıtıngtik tetikterdi qoldaný QR QK týraly naqty jáne anaǵurlym dáıekti málimet alýǵa, sonymen qatar jeke quramnyń kásibı turǵyda ósýin yntalandyrady. Alaıda, eksperımentke qatysqan árbir ofıtserdi baǵalaýdyń nátıjeleri alynyp, zerdelenbeıinshe jańa júıeniń tıimdiligi týraly aıtý áli erte.

Aıta keteıik, mundaı júıe Túrkııa men AQSh Qarýly Kúshterinde sátti qoldanylyp júr.