Qazaqstanda áskerı esepke alý júıesi zamanaýı formatqa kóshedi
ASTANA. KAZINFORM — Astanada Parlament Senatynyń Halyqaralyq qatynastar, qorǵanys jáne qaýipsizdik komıtetiniń áskerge shaqyrý naýqanyn uıymdastyrýdyń ózekti máselelerine arnalǵan kóshpeli otyrysy ótti. Bul týraly Qorǵanys mınıstrligi málim etti.
Іs-sharaǵa Senat depýtattary, Qorǵanys, Іshki ister, Densaýlyq saqtaý, Tótenshe jaǵdaılar, Jasandy ıntellekt jáne Tsıfrlyq damý mınıstrlikteriniń, UQK Shekara qyzmetiniń, jergilikti atqarýshy organdardyń jáne basqa da múddeli vedomstvolardyń ókilderi qatysty.
— Áskerı qyzmet — abyroıly mindet qana emes, bul jaýapkershilik, tártip pen azamattardy el qorǵaýshy retinde qalyptastyratyn mańyzdy ómir kezeńi. Búginde áskerge deıingi jastarmen júıeli jumysty kúsheıtip, olarmen ózara is-qımyldyń tıimdiligin arttyrý asa mańyzdy, — dedi Senattyń beıindi komıtetiniń tóraǵasy Andreı Lýkın.
Otyrysta kóktemgi áskerge shaqyrý naýqanyn uıymdastyrý, áskerı-dárigerlik komıssııalardyń jumysyn jetildirý, ınfraqurylym nysandary, áskerı esepke alý úderisterin tsıfrlandyrý jáne vedomstvoaralyq ózara is-árekettiń tıimdiligin arttyrý máseleleri qaraldy.
Qatysýshylar sondaı-aq Almaty, Saryarqa jáne Baıqońyr aýdandarynyń qorǵanys isteri jónindegi basqarmalary ornalasqan elordalyq jınaý pýnktiniń jumysymen tanysty.
Astana qalasy qorǵanys isteri jónindegi departamentiniń bastyǵy polkovnık Rýslan Baltemirovtiń aıtýynsha, nysan zamanaýı medıtsınalyq jabdyqtarmen tolyq qamtamasyz etilgen. Shaqyrylýshylarǵa jaıly jaǵdaı jasalyp, tolyqqandy tamaqtaný men ornalastyrý uıymdastyrylǵan.
Budan ózge qazirgi ýaqytta Qarýly kúshterdi jasaqtaý aıaqtalǵanyn, al 25 mamyrdan keıin Ulttyq ulan bólimshelerin jasaqtaý bastalatynyn málimdedi. Áskerge shaqyrý naýqany 30 maýsymǵa deıin jalǵasady.
Kezdesýde áskerge shaqyrý naýqanynyń medıtsınalyq qamtamasyz etilýi men áskerı-dárigerlik komıssııalar jumysynyń sapasyna erekshe nazar aýdaryldy. Qatysýshylar shaqyrylýshylardyń densaýlyq jaǵdaıyn dıagnostıkalaýdy, psıhologııalyq tekserýdi jetildirý jáne medıtsına qyzmetkerleri qabyldaıtyn sheshimder úshin jaýapkershilikti kúsheıtý qajettigin atap ótti.
— Áskerı esepke alý men áskerge shaqyrý júıesine tsıfrlyq sheshimder men jasandy ıntellekt elementterin engizý jumysy oń baǵalandy. Sonymen qatar IT jáne kıberqaýipsizdik salasyndaǵy jas mamandardy áskerı qyzmet pen ǵylymı qyzmetke tartýdyń mańyzdylyǵy da aıtyldy, — delingen habarlamada.
Otyrysty qorytyndylaǵan Andreı Lýkın áskerge shaqyrý júıesin tıimdi damytý Qazaqstan áskeriniń jaýyngerlik daıyndyǵyn arttyrýǵa jáne eldiń qorǵanys qabiletin nyǵaıtýǵa tikeleı áser etetinin atap ótti. Sonymen qatar ol áskerı qyzmet, medıtsınalyq qamtamasyz etý jáne áskerge shaqyrýdan jaltarǵany úshin jaýapkershilik máselelerin retteıtin zańdy jetildirýge depýtattyq korpýs qajetti qoldaý kórsetýge daıyn ekenin jetkizdi.
Buǵan deıin Qorǵanys mınıstrligi áskerge shaqyrý tártibi men oǵan qatysty zańsyzdyqtar týraly eskertken bolatyn.
