Qazaqstanda áskerge shaqyrylǵandardy SMS habarlama arqyly habardar etedi
Keńeıtilgen keńes QR Qorǵanys mınıstriniń birinshi orynbasary – Qarýly kúshter Bas shtabynyń bastyǵy general-leıtenant Murat Bektanovtyń basshylyǵymen ótti.
Jıynda áskerge shaqyrý naýqany kezinde áskerge shaqyrylýshylardy ýaqtyly habardar etý máselesi tolyq sheshilmegeni aıtyldy. Osyǵan baılanysty «elektrondy úkimettiń» derekter bazasymen ıntegratsııalaý boıynsha jumys júrgizilip jatyr. Bul áskerge shaqyrylýshylardy belgileýdi jeńildetedi jáne olardy SMS habarlama arqyly ýaqtyly habardar etýdi qamtamasyz etedi.
Mınıstrliktiń málimdeýinshe, COVID-19 pandemııasy shaqyrý naýqanynyń barysyna aıtarlyqtaı áser etkenine qaramastan, 2020 jyly 34 myńǵa jýyq azamat áskerı qyzmetke shaqyrylǵan.
Qorǵanys mınıstrliginiń Ortalyq áskerı-dárigerlik komıssııasynyń aqparaty boıynsha, medıtsınalyq kýálandyrý sapasy jaqsardy. Máselen, 2019 jyly áskerı qyzmetke qatysty emes 22 syrqat túri anyqtalǵan. Ótken jyly rastalǵany ekeý.
«Áskerge shaqyrylýshylardyń barlyǵy mindetti áleýmettik medıtsınalyq saqtandyrý júıesimen qamtylmaǵan, sondyqtan alǵashqy medıtsınalyq kýálandyrýdan keıin odan ári emdeý maqsatynda olarǵa qajetti medıtsınalyq qyzmetter árdaıym qoljetimdi bola bermeıdi. Bul úshin áskerı-dárigerlik komıssııa (ÁDK) mamandarynyń Densaýlyq saqtaý mınıstrliginiń aqparattyq júıelerine qoljetimdiligi qamtamasyz etiletin bolady», delingen habarlamada.
