Qazaqstanda áskerge shaqyrý júıesi tsıfrlyq formatqa kóshedi
ASTANA. KAZINFORM – Qazaqstanda azamattardy áskerı qyzmetke shaqyrý júıesin jetildirý maqsatynda Biryńǵaı shaqyrtý tizilimin engizý josparlanyp otyr.
QR Qorǵanys mınıstrliginde avıatsııa general-leıtenanty Dáýren Qosanovtyń tóraǵalyǵymen ótken vedomstvoaralyq keńeste osy másele talqylandy. Jıynǵa birqatar memlekettik organdardyń basshylary men ókilderi qatysty.
– Biryńǵaı shaqyrtý tizilimin engizý habarlaý júıesin jańa deńgeıge kóteredi. Bul azamattardy ýaqtyly ári tolyq aqparattandyrýǵa múmkindik beretin zamanaýı tsıfrlyq tetik bolady, – dedi Qorǵanys mınıstri Dáýren Qosanov.
Mınıstrlik málimetinshe, jańa júıe áskerge shaqyrý naýqanynyń ashyqtyǵyn arttyrýǵa jáne azamattardyń áskerı mindetin oryndaýyn tıimdi baqylaýǵa baǵyttalǵan. Sonymen qatar áskerge shaqyrýdan jaltaryp júrgen azamattarǵa qatysty ýaqytsha shekteý sharalaryn engizý múmkindigi qarastyrylyp jatyr.
Keńes barysynda memlekettik organdardyń aqparattyq júıelerin ıntegratsııalaý, derekter almasýdy jedeldetý jáne tsıfrlyq transformatsııany kúsheıtý máseleleri de kóterildi.
– Memlekettik organdardyń úılesimdi jumysy men tsıfrlyq sheshimderdi engizý júıeniń tıimdiligin arttyrýdyń negizgi sharty. Biz onyń ashyqtyǵyn, senimdiligin qamtamasyz etýimiz qajet, – dep atap ótti mınıstr.
Sondaı-aq jıynda merzimdi áskerı qyzmettiń tartymdylyǵyn arttyrý, áskerı qyzmetshilerdiń áleýmettik kepildikterin kúsheıtý jáne qarjylaı qamtamasyz etý máseleleri qaraldy.
Aıta keteıik, Biryńǵaı shaqyrtý tizilimin engizý eldiń jumyldyrý áleýetin nyǵaıtýǵa baǵyttalǵan mańyzdy qadam bolmaq.
Buǵan deıin Qorǵanys mınıstrligi áskerge shaqyrý, medkomıssııa jáne keıinge qaldyrý tártibin túsindirdi.
