Qazaqstanda áskerge shaqyrý protsesi tsıfrlyq formatqa kóshiriledi
ASTANA.KAZINFORM — Qazaqstanda áskerge shaqyrý jáne áskerı esepke alý úderisteri tolyqtaı tsıfrlyq formatqa kóshirilmek. Úkimet qaýlysyna sáıkes, azamattardyń derekteri men shaqyrý komıssııalarynyń sheshimderi endi biryńǵaı tsıfrlyq júıe arqyly rásimdelip, memlekettik organdardyń aqparattyq júıelerimen ıntegratsııalanady.
Qazaqstan Úkimeti 2026 jylǵy 22 maýsymdaǵy qaýlysymen azamattardy áskerı qyzmetke shaqyrý jáne ony uıymdastyrý qaǵıdalaryna ózgerister engizdi.
Jańa ózgeristerdiń negizgi maqsaty – áskerge shaqyrý protsesin tsıfrlandyrý jáne memlekettik organdardyń aqparattyq júıelerin ózara baılanystyrý.
Tsıfrlyq júıe engiziledi
Endi Qorǵanys mınıstrliginde Tsıfrlyq júıe (TsMO RK) iske qosylady. Bul júıe azamattardyń áskerı esebin júrgizýge, derekterdi saqtaýǵa jáne basqa memlekettik tsıfrlyq júıelermen baılanys ornatýǵa arnalǵan.
Derekter elektrondy túrde alynady
Áskerge shaqyrýmen aınalysatyn bólimder qajet málimetterdi memlekettik derekqorlar arqyly avtomatty túrde alady. Eger júıeler arasynda baılanys bolmasa, aqparat tıisti organdardan 3 jumys kúni ishinde suraý arqyly alynady.
Qyzmet kórsetý tártibi jańardy
-
Áskerge shaqyrylatyn azamattardy irikteý protsesine Qarýly Kúshter, arnaıy jáne ózge de áskerı qurylymdar qatysa alady
-
Memlekettik kúzet qyzmeti men Shekara qyzmetine irikteý basym tártippen júrgiziledi
-
Ulttyq ulanǵa irikteý osy organdardan keıin júzege asyrylady
Elektrondy qujat aınalymy
2026 jyldyń 12 shildesinen bastap:
-
shaqyrý komıssııalarynyń sheshimderi elektrondy hattama túrinde rásimdeledi
-
barlyq qujattar Tsıfrlyq júıege engizilip, elektrondyq tsıfrlyq qoltańbamen bekitiledi
Tehnıkalyq aqaý bolǵan jaǵdaıda qujattar ýaqytsha qaǵaz túrinde jasalyp, keıin júıege engiziledi.
Áskerge shaqyrý protsesi tolyq tsıfrlanady
Azamattardyń medıtsınalyq tekseris nátıjeleri, jeke derekteri, sottylyǵy týraly málimetter jáne ózge qujattar elektrondy bazaǵa júkteledi.
Shaqyrylýshylar jeke derekterin óńdeýge kelisim berip, bul qujattar tsıfrlyq kartaǵa tirkeledi.
Áskerı buıryqtar da elektrondy túrde shyǵarylady
Áskerge shaqyrý nemese áskerı jıyndarǵa jiberý týraly buıryqtar endi tsıfrlyq júıe arqyly rásimdeledi. Qajet jaǵdaıda ýaqytsha qaǵaz nusqasy qoldanylyp, keıin júıege engiziledi.
Áskerı jıyndar da tsıfrlanady
Áskerı jıyndarǵa qatysty barlyq sheshimder, esepke alý jáne qujattandyrý protsesteri de tsıfrlyq formatqa kóshiriledi.
Qaýly 4 shildeden bastap qoldanysqa enedi.
Buǵan deıin Qarýly kúshterde quqyqbuzýshylyqtar týraly ótinish berýdiń tsıfrlyq júıesi engiziletinin jazdyq.
