Qazaqstanda «Ashyq Úkimet» portalyn iske qosý josparlanýda

Bul týraly búgin xalyqaralyq konferentsııada QR Parlamenti májilisiniń depýtaty Máýlen Áshimbaev málim etti.

"Internette aqparattyń ashyqtyǵy men qoljetimdiligi boıynsha "biryńǵaı tereze" ashý josparlanýda. Ol "Ashyq Úkimet" dep atalatyn bolady. Sol "terezeni" basqan árbir adam ózin qyzyqtyrǵan aqparatyn ala alady", - dep atap ótti ol.

Onyń sózine qaraǵanda, "Ashyq Úkimet" aıasynda taǵy tórt portal ashylady.

"Ashyq málimetter" saıtynda memlekettik organdarda bar barlyq aqparattar ornalasady. Osy portalda resmı statıstıka málimetteri de jarııalanyp turmaq.

"Kelesi portal - ashyq normatıvtik-quqyqtyq aktiler saıty. Onda respýblıkalyq jáne aımaqtyq deńgeıde qabyldanǵan barlyq normatıvtik-quqyqtyq aktiler ornalastyrylady. Qazirgi ýaqytta aımaqtyq deńgeıde qabyldanǵan normatıvtik quqyqtyq aktiler jarııalanbaıdy. Ortalyq deńgeıde qabyldanǵan aktilerdiń keıbiri de qoljetimsiz", - dep atap ótti depýtat.

Qazaqstanda ashyqtyq prıntsıpteri bıýdjetke de engizilmek. Onyń ústine qazaqstandyqtar kelesi jyldarǵa arnalǵan bıýdjetti talqylap, ózderiniń usynystaryn da engize alady. Osy saıtta aımaqtyq bıýdjetter týraly barlyq málimetter enedi.

Sonymen qatar "Ashyq Úkimet" arqyly qazaqstandyqtar memlekettik organdardyń jumysyn baǵalaı alady jáne baǵdarlamalyq qujattardyń oryndalýyn baqylaýǵa múmkindik týady.

"Osylaısha "Ashyq Úkimet" biryńǵaı terezesi ashady. Ol arqyly memlekettik organdar, bıýdjetter, normatıvtik-quqyqtyq aktiler týraly aqparattardy paıdalanyp, kez kelgen qujat boıynsha óz pikirin jetkize alady", - dedi M. Áshimbaev.