Qazaqstanda «ashyq aspan» rejımi bar qalalar tizimi keńeıtilmek
NUR-SULTAN. QazAqparat – Qazaqstanda «ashyq aspan» rejımi bar qalalar tizimi keńeıtiledi. Bul jaıynda QR Premer-Mınıstri Asqar Mamınniń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat.
Úkimet basshysynyń atap ótýinshe, Memleket basshysynyń tapsyrmasyna sáıkes, 2019 jyldyń 1 qarashasynan Qazaqstannyń 11 áýejaıynda, atap aıtqanda Nur-Sultan, Almaty, Shymkent, Aqtaý, Qaraǵandy, Óskemen, Pavlodar, Kókshetaý, Taraz Petropavl jáne Semeı qalalarynda reısterdiń sany boıynsha shekteýlerdi alyp tastaldy jáne qazaqstandyq tasymaldaýshylar júzege asyrmaıtyn baǵyttar boıynsha sheteldik avıakompanııalarǵa 5 dárejeli «aýa erkindigin» usynýdy kózdeıtin «ashyq aspan» rejımi engiziledi. Bul rejımniń qoldanys merzimi 3 jyldy quraıdy jáne uzartylýy da múmkin.
«Birinshi kezeńniń qorytyndysyn eskere otyryp, qalalar tizilimin keńeıtý jáne 5 dárejeli «aýa erkindigi» boıynsha barlyq shekteýlerdi alyp tastaý josparlanyp otyr. Indýstrııa jáne ınfraqurylymdyq damý mınıstrligi Qazaqstanǵa reıster oryndaýǵa múddelik tanytatyn kez kelgen sheteldik avıakompanııaǵa Atyraý qalasynda turaqty halyqaralyq reıster oryndaýǵa arnalǵan qosymsha quqyqtar usyný múmkindigin qarastyrýǵa daıyn», - dep atap ótedi Premer-Mınıstr.
