Qazaqstanda asharshylyq týraly jańa fılm túsirilip bitti

ASTANA. QazAqparat - Ardaq Ámirqulov jańa fılmin kórermen nazaryna usynady, dep habarlaıdy QazAqparat Ulttyq kınony memlekettik qoldaý ortalyǵyna silteme jasap.

Belgili qazaqstandyq rejısser Ardaq Ámirqulov («Otyrardyń kúıreýi», «Qosh, Gúlsary!») «Jel toqtaǵan jer» atty jańa fılmin kórermen nazaryna usynýǵa daıyndalyp jatyr.

Týyndy QR Mádenıet jáne sport mınıstrliginiń tapsyrysy boıynsha Ulttyq kınony qoldaý memlekettik ortalyǵynyń kómegimen túsirilgen.

Sıýjet Jupar esimdi jas áıeldiń taǵdyryna negizdelgen. HH ǵasyrdyń 30-shy jyldarynyń basynda eki kishkentaı balanyń anasy jalǵan aıyppen Sibirge jer aýdarylǵan kúıeýin izdep jolǵa shyǵady.

Saıahat barysynda Jupar túrli qıyndyq pen synaqtan ótip, jol boıynda Qazaqstannyń sheksiz dalasynda asharshylyqtan ólýge qalǵan adamdardy kezdestiredi.

Fılmniń túsirilim jumystary ótken jyldyń kúzinde Almaty oblysy Jambyl aýdany Myńbaev aýylynda, Qosqudyq temirjol stantsııasynda jáne Qonaev qalasynyń mańynda ótti.

Basty rólderdi Janar Shopanova, Salıh Beısenbaı, Meıirjan Musaqoja jáne basqalar somdap shyqty.

Jobanyń stsenarıı avtorlary men rejısserleri - Ardaq Ámirqulov pen Baǵlan Qudaıberlıev.

Ámirqulovtyń aıtýynsha, fılm kópshilik kórermenge arnalǵan, óıtkeni kartına baıandaıtyn tragedııany is júzinde qazaqtyń ár otbasy bastan keshken.

Fılm aq-qara formatta túsirilgen.

«Aq-qara format sol jyldardaǵy atmosferany sezindirý úshin tańdaldy, ol kórermendi derekti shejirege baǵyttaıdy», - deıdi rejısser.

Qazirgi ýaqytta fılmdi montajdaý jumysy júrip jatyr.

Kartınany prokatqa shyǵarý osy jyldyń kúzine josparlanǵan. Sondaı-aq, fılm avtorlary halyqaralyq kınofestıvalderge de qatysý oıda bar deıdi.