Qazaqstanda asfalt sapasyna jaýapty 382 zaýytqa ınspektsııa aıaqtaldy

ASTANA. KAZINFORM - Kólik mınıstrligi eldegi barlyq asfalt-beton zaýyttaryn tekserip jatyr.

Mınıstrlik asfalt-beton zaýyttarynyń jumysyn (ABZ) tekserip, baqylaýdy kúsheıtti. Inspektsııalyq jumystardy avtomobıl kóligi komıtetine qarasty jol aktıvteriniń ulttyq sapa ortalyǵy júzege asyryp jatyr.

Búgingi tańda elimizdegi 431 zaýyttyń 382-si, ıaǵnı 89% tekserýden ótti. Astana, Shymkent qalalary men Almaty, Jetisý, Qostanaı, Pavlodar, Aqtóbe oblystaryndaǵy barlyq jumys istep turǵan ABZ tolyq qamtyldy.

- Tekserý barysynda asfalt-beton zaýyttary jáne zaýyt zerthanalarynyń qoldanystaǵy normatıvtik qujattardyń talaptaryna sáıkestigi jan-jaqty zerdelendi. Ásirese, sapa qyzmetine jaýapty mamandardyń bolýy, jol qurylysy materıaldaryn saqtaý jáne tasymaldaý erejelerin saqtaý máselelerine erekshe nazar aýdaryldy. Sondaı-aq, sapany baqylaý boıynsha tehnologııalyq reglamentterdiń bar-joǵy baǵalandy, - dep jazdy vedomstvodan.

Inspektsııa qorytyndysy boıynsha birqatar ABZ-ǵa qyzmetin jetildirý jáne jańǵyrtý jóninde naqty usynystar berildi. Bul aldaǵy ýaqytta zaýyttardyń qajetti sapa deńgeıine shyǵýyna múmkindik beredi.

Aldaǵy ýaqytta qalǵan zaýyttar da dál osyndaı tekseris jumystarymen qamtylady.

Aıta keteıik, jaqynda Nurlan Saýranbaev Kólik mınıstri bolyp taǵaıyndaldy.