Qazaqstanda áseri kúshti preparattardyń zańsyz aınalymyna qylmystyq jaza engiziledi

ASTANA. KAZINFORM – Qazaqstanda keıbir preparattardy medıtsınalyq emes maqsatta paıdalaný aıtarlyqtaı ósti. ıAǵnı sıntetıkalyq esirtkiniń áserin kúsheıtý úshin satyp alynady. Bul týraly Májilistiń jalpy otyrysynda tıisti zań jobasyn talqylaý kezinde depýtat Snejanna Imasheva aıtty.

«Atap aıtqanda, «tramadol», «tropıkamıd», «azottyń totyǵy», «somnol», «pregabalın» jáne taǵy sol sııaqty medıtsına preparattaryn jastar kóp paıdalanyp jatyr. Bul zattardy esirtkige táýeldi adamdar sıntetıkalyq esirtkiniń áserin kúsheıtý úshin paıdalanady. Nátıjesinde olarǵa medıtsınalyq emes suranys aıtarlyqtaı ósti. Máselen, tropıkamıd kóz tamshylaryn nashaqorlar murynǵa tamyzady nemese kóktamyrǵa jiberedi. Osydan galıýtsınogendik áser alady nemese sıntetıkalyq esirtkiniń áserin kúsheıtedi», - dedi S. Imasheva.

Onyń aıtýynsha, qazir osy dárilik zattardy retseptsiz bergeni jáne olarmen jumys isteý qaǵıdalaryn buzǵany úshin tek ákimshilik jaýaptylyq qarastyrylǵan.

«Bul jaǵdaı osy preparattardy medıtsınalyq emes maqsatta satatyn qaskóılerge tosqaýyl bola almaı tur. Mysaly, 2022 jyly búkil elge tanymal, farmatsevtıkalyq bilimi joq Tramadol Koroli (N. Karpov) kúshti áser etetin zattardyń iri partııasymen birneshe ret ustaldy. Biraq, onda dárihana qyzmetine formaldy túrde lıtsenzııasy bolǵandyqtan, kúshti áser etetin medıtsınalyq preparattardy zańsyz taratqany úshin ákimshilik aıyppul tólep qutylyp ketti. Sondyqtan, jobada atalǵan medıtsınalyq preparattar quramy bar kúshti áser etetin zattardyń zańsyz aınalymy, olarmen jumys isteý qaǵıdalaryn buzǵany, sondaı-aq olardy urlaǵany úshin qylmystyq jaýaptylyqty engizý usynylyp otyr», - dedi depýtat.