Qazaqstanda asa qaýipti ınfektsııalardyń taralý atlasy ázirlendi
ASTANA. 8 qazan. QazAqparat - «Qazaqstanda asa qaýipti ınfektsııalardyń taralý atlasy» ázirlendi, dep habarlaıdy Qazaqstan Respýblıkasy Densaýlyq saqtaý mınıstrliginiń Memlekettik sanıtarlyq-epıdemıologııalyq qadaǵalaý komıtetiniń baspasóz qyzmetinen.
Atlastyń 1000 danasy jumysynda paıdalaný úshin densaýlyq saqtaý mekemelerine jiberildi.
Onyń qoldanylý aıasy - densaýlyq saqtaý, aýyl sharýashylyǵy jáne halyq sharýashylyǵynyń basqa da salalary (geologııa, arheologııa, magıstraldyq munaı jáne gaz qubyrlary, avtomagıstraldar, temir joldar jáne basqa da kommýnıkatsııalar qurylysy).
Atlasta oba, tyrysqaq, kúıdirgi, týlıaremııa, saryp, leptospıroz, ıersınıoz, lısterıoz, gemorragııalyq qyzba, kene entsefalıti sekildi 12 asa qaýipti jáne zoonozdyq ınfektsııalarǵa jáne ınfektsııalardyń 12 negizgi tasymaldaýshylary men taratýshylaryna sıpattama berilgen.
Atlasta Qazaqstannyń Ulttyq atlasy kartasynyń elektrondyq nusqalary paıdalanyldy, bul Qazaqstannyń tabıǵı jaǵdaılaryn kásibı deńgeıde sıpattaýǵa múmkindik berip otyr.
Atlas ınfektsııalyq aýrýlardyń taralý zańdylyǵyn, halyq arasynda, tehnıkalyq, ekonomıkalyq jáne rekreatsııalyq jobalar úshin qaýip-qater deńgeıin kórsetedi.
Joba halyqtyń, medıtsına qyzmetkerleriniń saqtyǵyn arttyrýǵa, asa qaýipti ınfektsııalardy dıagnostıkalaýdy jaqsartýǵa, profılaktıkalyq is-sharalardyń tıimdiligin barynsha qamtamasyz etýge múmkindik beredi.
