Qazaqstanda asa aýyr qylmystary úshin sotty bolǵan adamdar poıyz basshysy qyzmetterin atqaryp kelgen - baspasóz máslıhaty
ASTANA. Qarashanyń 25-i. QazAqparat /Gúlmıra Álıakparova/ - Qazaqstanda poıyz basshylary bolyp, buryn asa aýyr qylmystary úshin sotty bolǵan adamdar jumys istep kelgen. Bul týraly búgin ótken baspasóz máslıhaty barysynda «Jolaýshylar tasymaly» AQ Basqarma tóraǵasy Baıdaly Dárimbetov aıtty,
dep habarlaıdy QazAqparat.
«Fılıaldardyń basshylary (red. - «Jolaýshylar tasymaly» AQ) sotty bolǵandaryna qaramastan para alý arqyly jolserikterin jáne poıyz basshylaryn qyzmetke alǵan. Buryn zorlaý qylmysy úshin sottalǵan adamdardyń poıyz basshysy bolyp istegen oqıǵalary da boldy», - dedi ol.
«Búginde mundaı tulǵalar jumystan shyǵaryldy», - dep atap ótti basqarma tóraǵasy.
«Jolaýshylar tasymaly» AQ-nyń baspasóz qyzmeti taratqan aqparatqa sáıkes, poıyz basshylarynyń sapalyq quramyna júrgizilgen taldaý nátıjesi, jumyskerlerdiń úshten biriniń biliktilikteri talaptarǵa sáıkes kelmeıtindigin anyqtaǵan. Onymen birge, 224 poıyz basshysynyń 10 paıyzǵa jýyǵy asa aýyr qylmystary úshin sotty bolǵan.
Sondaı-aq poıyz brıgadalary men bılet kassırleriniń jumysyna qatańdyqty kúsheıtý jáne birtutas talaptar qoıý maqsatynda jyl basynan beri júrgizilgen jumystardyń nátıjesinde, 109 bılet kassıri (10 paıyzy), 31 poıyz basshysy (14 paıyzy) jáne 252 jolserik (4 paıyzy) jaǵymsyz sebepterimen qyzmetterinen bosatyldy. Laýazym mindetterin durys oryndamaǵany úshin 180 poıyz brıgadasynyń úshten biri taratyldy (54 bıgada).
Sonymen qatar, sońǵy bir jarym jyl ishinde 6206 jumysshy tártiptik jaýapkershilikke tartylyp, 331 qyzmetkermen eńbek kelisimsharttary buzyldy.
