Qazaqstanda arnaıy mektepterdiń túlekteri budan bylaı kolledjge túse alady
ASTANA. QazAqparat - Erekshe bilim berý qajettiligi bar balalardyń sany artyp keledi. Dese de, elimizde ınklıýzıvti bilim berý júıesi jetkilikti dárejede damydy dep aıta almaımyz. Ótkir másele týraly Feısbýktegi paraqshasynda Bilim jáne ǵylym vıtse-mınıstri Ashat Aımaǵambetov jazdy, dep habarlaıdy QazAqparat tilshisi.
Vıtse-mınıstr atap ótkendeı, pedagogtardyń tamyz keńesi aıasynda ınklıýzıvti bilim berý boıynsha úlken sektsııa ótkizilgen. Oǵan búkil Qazaqstannan bes júzge tarta maman qatysqan.
Qolda bar málimet kórsetip otyrǵandaı, sońǵy 20 jylda aýtızm spektrimen aýyrǵandardyń sany artyp keledi.
«Inklıýzıvıany keı kezde materıaldyq-tehnıkalyq máselelerdiń, pandýstar men ózge de zattardyń aıasynda túsiný jaǵdaılary kezdesedi. Biraq, pandýstar men kedergisiz orta júıesin 100 paıyzǵa jetkizsek te, biz beıimdelgen oqý baǵdarlamasyna, ondaı balalardyń múmkindigin biletin mamandarǵa, oqyp jatqandarmen ártúrli deńgeıdegi jumys qurý bilýge qatysty kúrdeli máselelermen betpe-bet kelýimiz múmkin», - deıdi vıtse-mınıstr.
Atalǵan máselelerdiń ishinde - tıýtorlardyń bolmaýy da bar. Ashat Aımaǵambetov túsindirip ótkendeı, tıýtor - bala men pedagog arasyndaǵy deldal nemese jeke kómekshi.
«Mektepterde ol týraly baıaǵydan aıtylyp keledi. Mine, sondyqtan, mınıstrlik Tıptik shtatqa ózgeris engizip, tıýtorlardyń shtatyn kóbeıtip jatyr», - deıdi ol.
Ekinshiden, buryn aqyl-esi kem balalarǵa arnalǵan mektepterdiń túlekterine tek anyqtama beriletin. Mine, bul shekteý balalardyń quqyǵyn buzyp, olar kolledjge túse almaıtyn. Sebebi, kolledjderde tek attestatpen oqýǵa alady. Endigi ýaqytta, vıtse-mınıstr atap ótkendeı, osy máseleni retteý úshin 30-shy buıryqqa ózgeris engizilip, erekshe qajettiligi bar adamdarǵa attestat beriletin boldy. Sonymen birge, kolledjderge qabyldaý erejelerine ózgerister engizilip, arnaıy mektepterdiń túlekterine kolledjderge oqýǵa túsýge múmkindik týyp otyr.
Taǵy bir ótkir máselelerdiń biri aýytqýshylyqtyń barlyq 8 túri boıynsha arnaıy mektepterge arnalǵan Tıptik oqý josparlary men baǵdarlamalar joq bolatyn. Jyldar boıy muǵalimderdiń ózderi qajettiligi bar balalarǵa oqý baǵdarlamasyn barynsha beıimdep kelgen.
«Endi budan bylaı arnaıy mektepter men balabaqshalarǵa arnalǵan baǵdarlamalar men Tıptik oqý josparlary jasap shyǵaryldy», - deıdi Ashat Aımaǵambetov.
