Qazaqstanda arnaýly áleýmettik qyzmet kórsetetin 617 uıym lıtsenzııa aldy
ASTANA. KAZINFORM — Qazaqstanda arnaýly áleýmettik qyzmet kórsetetin uıymdardy mindetti memlekettik lıtsenzııalaýdyń ótpeli kezeńi aıaqtalýǵa jaqyn. 2026 jylǵy 1 shildedegi jaǵdaı boıynsha elde mundaı qyzmet kórsetetin 617 uıym memlekettik lıtsenzııa alǵan.
Arnaýly áleýmettik qyzmet kórsetetin uıymdardy mindetti lıtsenzııalaý 2025 jylǵy 1 qańtarynan bastap engizildi. Onyń negizgi maqsaty — áleýmettik qyzmetterdiń sapasy men qaýipsizdigin arttyrý, sondaı-aq zańnamada belgilengen biryńǵaı talaptardyń saqtalýyn qamtamasyz etý.
Lıtsenzııalaý barysynda uıymdardyń biliktilik talaptaryna sáıkestigi tekseriledi. Atap aıtqanda, qaýipsizdik talaptarynyń oryndalýy, ǵımarattardyń múgedektigi bar azamattar úshin qoljetimdiligi jáne qyzmet kórsetý jaǵdaılarynyń belgilengen standarttarǵa saı bolýy baǵalanady.
Eńbek jáne halyqty áleýmettik qorǵaý mınıstrliginiń málimetinshe, lıtsenzııa alǵan uıymdardyń 451-i — kommýnaldyq memlekettik mekeme, al 166-sy — úkimettik emes sektor uıymdary.
Qazirgi tańda Qazaqstanda 104 myńǵa jýyq adam arnaýly áleýmettik qyzmetterdi paıdalanyp otyr. Olardyń qatarynda qarttar, múgedektigi bar adamdar, belgili bir turǵylyqty jeri joq azamattar, turmystyq zorlyq-zombylyq pen adam saýdasynyń qurbandary, sondaı-aq bas bostandyǵynan aıyrý oryndarynan bosatylǵan jáne probatsııa esebinde turǵan adamdar bar.
Eń kóp suranysqa ıe qyzmet túri — úıde kórsetiletin áleýmettik qyzmet. Búginde mundaı kómekti 60 myńnan astam adam alyp otyr.
Eske salaıyq, buǵan deıin Astanada áleýmettik qyzmet kórsetý kólemi 3,2% artqanyn habarlaǵanbyz.
