Qazaqstanda Armenııadan ákelingen 11 myń kólik tirkeýden ótti - mınıstrlik

NUR-SULTAN. QazAqparat – Qazirgi kezde Armenııadan Qazaqstanǵa jetkizilgen 11 myń avtokólik tirkeldi. Bul týraly QR ІІM Ákimshilik polıtsııa komıteti tóraǵasynyń orynbasary Serik Túsipov málim etti, dep habarlaıdy QazAqparat tilshisi.

«Memleket basshysynyń tapsyrmasy boıynsha Armenııadan jetkizilgen avtomobılderdi tirkeý tetigin Úkimet ázirlegen bolatyn. 20 mamyrda Úkimet qaýlysy qabyldanyp, onda osy kólikterdi tirkeýdiń naqty tártibi aıqyndaldy. Azamattar úshin tirkeý talaptary aıtarlyqtaı qolaıly. 1 maýsymnan tirkeý sharalary bastaldy. Búginde tirkeý talaptaryna enip turǵan 14 myń kóliktiń 11 myńǵa jýyǵy tirkeldi. Kún saıyn shamamen 400-den astam avtomobıl tirkeýden ótip jatyr», - dedi S. Túsipov Ortalyq kommýnıkatsııalar qyzmetinde.

Onyń sózine qaraǵanda, Armenııadan jetkizilgen osy kólikter Qazaqstanda tirkelgennen keıin, ony paıdalaný merzimine shekteý jasalmaıdy. Eger kólik ıesi óziniń kóligin Qazaqstandaǵy tirkeýden shyǵarǵysy kelse, ol tıisti merzimge kólik salyǵyn tólep, qazaqstandyq nómir men tehpasportty tapsyryp, mamandandyrylǵan halyqqa qyzmet kórsetý ortalyǵynda armıan tehpasporty men memlekettik nómirin qaıtaryp alady.

Eske sala keteıik, basqarý organdary sol jaqta ornalasqan, Armenııa Respýblıkasynyń ýákiletti organdarynda Qazaqstan azamattaryna tirkelgen jáne olar Qazaqstanǵa 2020 jylǵy 1 aqpanǵa deıin ákelgen avtomobılder tirkeýge jatady (Qazaqstan Respýblıkasy Úkimetiniń aǵymdaǵy jylǵy 20 mamyrdaǵy№ 306 qaýlysy).