Qazaqstanda arheologııalyq jumystarǵa 5 jyldyq lıtsenzııa engiziledi
ASTANA. KAZINFORM – Astanada tarıhı-mádenı mura obektilerin qorǵaý salasyndaǵy zańnamalyq ózgerister men olardyń iske asyrylý máselelerine arnalǵan dóńgelek ústel ótti.
Kezdesý barysynda arheologııalyq jáne ǵylymı-restavratsııalyq jumystardyń sapasyn arttyrý, saladaǵy jaýapkershilikti kúsheıtý, eskertkishterdiń saqtalýyn qamtamasyz etý, sondaı-aq lıtsenzııalaý men tsıfrlandyrý máseleleri talqylandy.
Іs-sharaǵa QR Mádenıet jáne aqparat mınıstrligi, QR Ǵylym jáne joǵary bilim mınıstrligi, Á.H. Marǵulan atyndaǵy Arheologııa ınstıtýty, QR Ulttyq mýzeıi, oblystyq tarıhı-mádenı muralardy qorǵaý jónindegi memlekettik ınspektsııa ókilderi, oblystyq mádenıet basqarmalarynyń basshylary jáne sala mamandary qatysty.
«Tarıhı-mádenı mura obektilerin qorǵaý jáne paıdalaný týraly» zańǵa engizilgen ózgerister 2025 jyldyń 26 jeltoqsanynda qabyldandy. Bul shara Memleket basshysynyń arheologııa salasyn retke keltirý jónindegi tapsyrmalaryn oryndaý maqsatynda júzege asyryldy.
QR Mádenıet jáne aqparat vıtse-mınıstri Aıbek Sydyqov óz sózinde buryn lıtsenzııa berý tártibi, qazba jumystary men tabylǵan jádigerlerge qatysty biryńǵaı derekqordyń bolmaýy, sondaı-aq arheologııalyq materıaldardy esepke alý men tapsyrý isindegi kemshilikterge nazar aýdardy. Jańa ózgerister ulttyq qundylyqtardy qorǵaý, tarıhı murany saqtaý jáne ǵylymı negizdelgen ádisterdi engizý úshin jasalǵan. Endi arheologııalyq jáne ǵylymı-restavratsııalyq jumystar jeke-jeke lıtsenzııa negizinde júrgiziledi, al lıtsenzııanyń merzimi 5 jyldy quraıdy.
Dóńgelek ústel barysynda Qazaqstanda 11 846 tarıhı-mádenı eskertkish tirkelgeni habarlandy. Onyń 8 877-si arheologııalyq nysandarǵa jatady. Olardyń ishinde 276 nysan respýblıkalyq mańyzǵa ıe, 10 nysan ıÝNESKO tizimine engen, al taǵy 26 nysandy tizimge qosý jumystary júrgizilýde. Bul kórsetkishter eldegi tarıhı-mádenı murany saqtaý jáne qorǵaý baǵytyndaǵy jumystardyń aýqymyn kórsetedi.
Eske salsaq, osyǵan deıin BQO-da Altyn Orda dáýirine jatatyn arheologııalyq nysandar tabylǵanyn jazǵan edik.
