Qazaqstanda árbir jetinshi ata-ana jumysbastylyǵyna baılanysty balasyna kóńil bóle almaıdy

ASTANA. KAZINFORM – Qazaqstanda árbir jetinshi ata-ana jumysbastylyǵyna baılanysty balasyna jetkilikti kóńil bóle almaıdy, dep habarlaıdy Balalardyń quqyqtaryn qorǵaý komıteti.

Elimizde Balalardyń ál-aýqaty ındeksiniń qorytyndysy aıasynda keń aýqymdy áleýmettik zertteý júrgizildi. Zertteýge barlyǵy 93 120 adam qatyssa, olardyń 52 754-i – ata-analar, al 40 366-sy oqýshylar boldy.

Zertteý nátıjesinde ata-analardyń 13,9 paıyzy jumystyń kóptiginen balalaryna jetkilikti ýaqyt bóle almaıtynyn aıtqan. Eń joǵary kórsetkishter Soltústik Qazaqstan oblysynda (17,9%), Almaty qalasynda (17,8%), Qostanaı (17,3%) jáne Aqmola (16,1%) oblystarynda tirkelgen.

Al eń tómen kórsetkishter Shyǵys Qazaqstan (9,1%), Batys Qazaqstan (10%) jáne Atyraý (10,6%) oblystarynda baıqaldy.

– Ata-ananyń turaqty nazary men bala ómirine qatysýy onyń emotsınaldyq saýlyǵy men jan tynyshtyǵynyń basty kepili. Úlkenderdiń jumysbastylyǵy men balalarmen sırek sóılesýi otbasy ishindegi senim men ózara qoldaýdy álsiretedi. Osy baǵytta “Adal Azamat” baǵdarlamasy aıasynda qurylǵan ata-analarǵa pedagogıkalyq qoldaý kórsetý ortalyqtary mańyzdy ról atqaryp keledi. Bıylǵy oqý jylynan bastap bul ortalyqtar jańartylǵan baǵdarlama negizinde jumys istep, zamanaýı tsıfrlyq formattardy jáne balalardyń psıhıkalyq saýlyǵy men emotsııalyq damýyna arnalǵan taqyryptardy qamtıdy, – dedi Balalardyń quqyqtaryn qorǵaý komıtetiniń tóraǵasy Nasymjan Ospanova.

UNICEF halyqaralyq zertteýlerine sáıkes, ata-ananyń balamen kún saıyn 10-15 mınýt esh alańsyz sóılesýi ózara senimdi nyǵaıtyp, mazasyzdyqty azaıtyp, balanyń emotsııalyq turaqtylyǵyn arttyrady.

Balalardyń quqyqtaryn qorǵaý komıteti ata-analarǵa kún saıyn keminde bes mınýt ýaqytyn balasyna arnap, smartfon men ózge de gadjetterdi paıdalanbaı, ashyq ári mazmundy áńgimege kóńil bólýge keńes beredi. Mundaı qysqa da mándi qarym-qatynas balanyń óz otbasynda ózin qaýipsiz ári senimdi sezinýine yqpal etedi.

Eger balada mazasyzdyq, tuıyqtyq nemese ashýshańdyq belgileri baıqalsa, ata-analar mektep psıhologyna, Psıhologııalyq qoldaý ortalyqtarynyń mamandaryna nemese otbasy men bala máseleleri jónindegi táýlik boıy jumys isteıtin «111» baılanys ortalyǵyna júginýi qajet.

Aıta keteıik, ShQO-da qaraýsyz qalǵan 4 bala óz úıinde órtenip kete jazdady.