Qazaqstanda árbir úshinshi jol-kólik oqıǵasyna jaıaý júrginshiniń qatysy bar
NUR-SULTAN. QazAqparat – Jaıaý júrginshilerdiń tártibine qatysty problema bar. Bul týraly QR ІІM Ákimshilik polıtsııa komıteti tóraǵasynyń orynbasary Serik Túsipov aıtty, dep habarlaıdy QazAqparat tilshisi.
«Taldaý nátıjesine súıensek, qazirgi kezde joldaǵy ólim-jitimge jol-kólik oqıǵalarynyń úsh negizgi túri baılanysty bolyp otyr. Osy oraıda jaıaý júrginshilerdi qaǵyp ketý, kóliktiń aýdarylýy men avtomobılderdiń soqtyǵysýy jaǵdaılary bar. Jol-kólik oqıǵalarynyń osy túrlerinen ólim-jitim basqa jol apattarynynan qaza bolǵandardyń 58 paıyzyn qurady», - dedi S. Túsipov onlaın brıfıngide.
Osy oraıda ol jaıaý júrginshilerge qatysty málimetterdi atap ótti.
«Jaıaý júrginshiler qaýipsizdigi máselesi ózekti bolyp tur. Elimizdegi árbir úshinshi jol-kólik oqıǵasy, árbir tórtinshi qaza bolǵan men jaraqat alǵan olardyń úlesine tıesili. Sonymen qatar, jaıaý júrginshilerdiń tártibine qatysty problema bar ekenin atap ótken jón. Jyl basynan olardyń tarapynan 155 myńnan astam ereje buzý anyqtaldy», - dedi ol.
Budan buryn habarlanǵandaı, bıylǵy 7 aıda jol erejesin buzýdyń 4 mln-ǵa jýyq jaǵdaıy anyqtaldy.
