Qazaqstanda árbir onynshy adam dárigerge ómirine qaýip tóngen kezde ǵana keledi - ÁMSQ
PETROPAVL. QazAqparat - Qazaqstanda aýrýhanaǵa jatyp emdeletinderdiń 70 paıyzǵa jýyǵy nemese 1,9 mıllıony dert meńdep, aýrýy asqynǵanda aýrýhanaǵa shuǵyl jetkizilgender, dep habarlaıdy QazAqparat tilshisi.
«Áleýmettik medıtsınalyq saqtandyrý qory» SQO boıynsha fılıaly baspasóz qyzmetiniń málimetinshe, Dúnıejúzilik densaýlyq kúni 7 sáýirde búkil álem halqynyń nazaryn halyqaralyq qoǵamdastyq aldynda turǵan negizgi densaýlyq saqtaý máselelerine aýdarý úshin atalyp ótedi.
Resmı statıstıkaǵa súıensek, 2018 jyly Qazaqstanda negizgi degen aýrýlardan 19,3 myń adam kóz jumǵan. Onyń 7,5 myńǵa jýyǵy - eńbekke qabiletti jastaǵylar. Halqynyń sany 18 mıllıonnan aspaıtyn elimiz jyl saıyn «tepse temir úzetin» 7,5 myń turǵynynan aıyrylyp otyrady.
Mamandardyń pikirinshe, buǵan ólim-jitimniń basty sebepkeri delinetin negizgi 5 aýrýdyń yqpaly mol. Ótken jyly qan aınalymy júıesi aýrýlary birinshi oryndy ıelendi, ol aýrýdan Qazaqstanda 9,7 myń adam qaıtys boldy. As qorytý organdarynyń aýrýlarynan 2,8 myń qazaqstandyq kóz jumdy. Úshinshi orynda - apattar, jaraqat jáne ýlaný tur. Odan keıin - obyr jáne tynys alý organdarynyń aýrýlary.
Statıstıka málimeti boıynsha, jyl saıyn 2,9 mıllıonǵa jýyq adam aýrýhanaǵa jatyp emdeledi. Onyń 70 paıyzǵa jýyǵy nemese 1,9 mıllıony - dert meńdep, aýrýhanaǵa shuǵyl túrde jetkizilgender. Bylaısha aıtqanda, Qazaqstanda árbir onynshy adam dárigerler aldyna jany qysylyp, ómirine qaýip tóngen kezde ǵana keledi. Mundaı jaǵdaıda naýqastyń tegin negizgi kómekten bólek, baǵasy qymbat protsedýralardyń aqysyn qaltasynan tóleýge májbúr bolatyny jasyryn emes.
«Búgingi kúni memlekettik kepildendirilgen medıtsınalyq kómektiń bóligi retinde naýqastar tek memlekettik medıtsınalyq uıymdarda ǵana emes, sonymen qatar jekemenshik uıymdarda da tegin em alady. Bıylǵy jyly Soltústik Qazaqstan oblysynda memlekettik tapsyrys boıynsha halyqqa 51 medıtsınalyq uıym qyzmet etedi, onyń 22-i jekemenshik uıym bolyp tabylady. Sonymen qatar, jaqyn arada SQO-da halyqqa tegin medıtsınalyq qyzmet kórsetetin medıtsınalyq saqtandyrý qorynyń qyzmet berýshileriniń tizimi jańa jekemenshik uıymdarmen tolyqtyrylady», - deıdi «ÁMSQ» SQO boıynsha fılıaly baspasóz qyzmeti mamandary.
Jalpy, 2019 jyly densaýlyq saqtaý salasyn qarjylandyrýǵa respýblıkalyq bıýdjetten 972,7 mlrd teńge bólindi. Onyń 395,4 mlrd-qa jýyǵy emhanalyq-ambýlatorlyq kómekke jumsalyp, profılaktıkalyq is-sharalarǵa basymdyq berilmek. Ótken jylmen salystyrǵanda qarjylandyrý kólemi 5% artqan.
