Qazaqstanda árbir azamattyń elektrondyq densaýlyq tólqujaty bolady
Bul týraly «Qazaqstanda elektrondyq densaýlyq saqtaýdy damytý» taqyrybynda ótken baspasóz máslıhatynda QR DSM Respýblıkalyq elektrondyq densaýlyq saqtaý ortalyǵynyń bas dırektorynyń m.a. Oljas Ábishev jáne «Qazaqtelekom» AQ-nyń Aqparattyq júıeler dırektsııasy Bıznes-sheshimderdi ázirleý ortalyǵynyń basshysy Janar Murzahanova málim etti.
«Birlesken jobalardyń biri retinde Densaýlyq saqtaý mınıstrligi men «Qazaqtelekom» AQ Ulttyq mail.kz elektrondyq servısiniń portaly negizinde densaýlyq saqtaý salasynyń qyzmetkerlerine arnalǵan Biryńǵaı elektrondyq poshtalyq servısi jobasyn iske qosty, munda @med.mail.kz atty domendi medıtsınalyq uıymdardyń qyzmetkerlerine arnalǵan derbes poshtalyq servıs ázirlengen. Atalǵan servıs barlyq medıtsına qyzmetkerleriniń biryńǵaı aqparat almasý, medıtsına taqyrybyndaǵy qozǵalatyn máselelerdi talqylaý ortasy retinde qoldanýyna arnalǵan», - dedi Oljas Ábishev.
Budan bólek, «Bıýdjettik protsessterdiń aıqyndyǵyn qamtamasyz etý jáne medıtsınalyq uıymdar qyzmetiniń qarjylyq-sharýashylyq qyzmetin esepke alýdy qamatamasyz etý maqsatynda Densaýlyq saqtaý mınıstrligi men «Qazaqtelekom» AQ bultty tehnologııalar negizinde Býhgalterlik jáne kadrlyq eseptiń ortalyqtandyrylǵan júıesin iske asyrý týraly kelissózder júrgizilýde» - dedi Janar Murzahanova.
Oljas Ábishevtiń habarlaýynsha, qarasha aıynda bala kútimine jáne qamqor bolýǵa arnalǵan mobıldi qosymshalar iske qosylady.
«Osyǵan uqsas qosymshalar Ulybrıtanııada, Avstralııada, Shyǵys Eýropa jáne TMD elderinde paıdalanylady. 2017 jyldyń sońyna deıin patronaj meıirgeri jáne jas ata-analar kishkentaı balalarǵa kútim kórsetýge arnalǵan arnaıy mobıldi qosymshalardy paıdalana alady. Mobıldi qosymshalar búgingi tańda Qazaqstandaǵy Balalar qory (ıÝNISEF) men QR Densaýlyq saqtaý mınıstrliginiń Respýblıkalyq elektrondyq densaýlyq saqtaý ortalyǵy arasynda qol qoıylǵan kelisim sheńberinde ázirlenetin bolady. «Patronaj meıirgeri» mobıldi qosymshasyn paıdalaný bala týraly derekterdi toltyrý boıynsha jumystardy júrgizýdi jeńildetedi. Meıirger úı jaǵdaıynda balaǵa jáne ata-anaǵa kóbirek kóńil bóle alady. Aqparatty elektrondyq túrde engizý kórsetiletin qyzmetterdiń tıimdiligin arttyrady jáne derekterdi joǵaltý táýekelin azaıtady», - deıdi Oljas Ábishev.
Sondaı-aq, ol Dúnıejúzilik bankpen QR Densaýlyq saqtaý mınıstrliginiń birlesken jobasy týraly jete toqtalyp ótti.
«Platformanyń negizgi komponentteriniń biri Elektrondyq densaýlyq tólqujaty (ári qaraı - EDT) bolyp tabylady. Patsıentterge arnalǵan EDT densaýlyǵy jónindegi aqparatqa, derbestendirilgen usynymdar men eskertýlerge qoljetimdilik beredi. Medıtsına qyzmetkerleri úshin patsıenttiń densaýlyǵy týraly ómir boıy jınaqtalatyn aqparatqa qoljetimdilik beredi, klınıkalyq sheshimderdi qabyldaýǵa, medıtsınalyq qatelikterdi qysqartýǵa kómektesedi» - dedi Ábishev Oljas.
Esterińizge sala keteıik, Elbasy óziniń «Qazaqstannyń úshinshi jańǵyrýy: álemdik básekege qabilettilik» atty osy jolǵy Joldaýynda densaýlyq saqtaý júıesiniń aldynda densaýlyq saqtaýdy qajetti deńgeıde aqparattandyrýdy qamtamasyz etýdi tapsyrǵan.