Qazaqstanda ár besinshi balada artyq salmaq bar

ASTANA. KAZINFORM – Elde balalar arasyndaǵy artyq salmaq máselesi ózekti kúıinde qalyp otyr. 6-9 jas aralyǵyndaǵy ár besinshi balada artyq salmaq bar. Bul týraly QR DSM Qoǵamdyq densaýlyq saqtaý ulttyq ortalyǵynyń basqarma tóraǵasy Erık Baıjúnisov Ortalyq kommýnıkatsııalar qyzmetinde ótken brıfıngte málim etti.

Onyń aıtýynsha, osy jastaǵy balalardyń 6,6%-y semizdikke shaldyqqan. Bul artyq salmaqtyń keń taralǵanyn kórsetedi.

Mamandar artyq salmaqtyń sebepterin halyqaralyq sarapshylarmen birge zerttegen. Sonymen qatar júrgizilgen saýalnama nátıjesine sáıkes, halyqtyń 77,6%-y balalardaǵy artyq salmaqty qalypty jaǵdaı retinde qabyldaıdy. Bul aldyn alý sharalarynyń tıimdiligin tómendetýi múmkin.

Osyǵan baılanysty Qoǵamdyq densaýlyq saqtaý ulttyq ortalyǵy birqatar usynys ázirlegen.

– Biz Úkimetke jáne Densaýlyq saqtaý mınıstrligine naqty sharalar usynyp otyrmyz. Sonyń ishinde qant qosylǵan sýsyndarǵa aktsız engizý bar. Bul ónimderdiń baǵasyna shamamen 100 teńge qosylady. Úsh jyl ishinde osydan shamamen 420 mlrd teńge qarjy túsýi múmkin, – dedi Erık Baıjúnisov.

Onyń sózinshe, júrgizilgen taldaý buqaralyq aqparat quraldaryndaǵy jarnamanyń 22%-y qantty sýsyndarǵa, al 17%-y fastfýd ónimderine tıesili ekenin kórsetken. Jınalǵan qarajatty semizdikpen jáne temeki shegýmen kúreske, sondaı-aq paıdaly ónim shyǵaratyn óndiristerdi qoldaýǵa baǵyttaý usynylady.

Sondaı-aq, ol 1-7 sáýir aralyǵynda elde densaýlyq kúnderi aıasynda mektepterde ashyq esik kúnderi ótetinin habarlady. Sharaǵa sportshylar men qoǵam ókilderi qatysyp, oqýshylarǵa salaýatty ómir salty týraly aqparat beredi.

Aıta keteıik, QR Densaýlyq saqtaý mınıstriniń buıryǵyna sáıkes 31 naýryzdan bastap mektepterde tamaqtaný talaptary jańartylyp, taǵam sapasyna baqylaý kúsheıtiledi.