Qazaqstanda ár aýdan men qalada Otbasyn qoldaý ortalyǵy ashylady
ASTANA. KAZINFORM — Bıyl Otbasyn qoldaý ortalyqtaryna 50 myńnan astam azamat júgindi, dep habarlaıdy Mádenıet jáne aqparat mınıstrliginiń baspasóz qyzmeti.
Bıyl Otbasy kúni aıasynda elimizdiń barlyq óńirinde 12 myńǵa jýyq adamdy qamtyǵan myńnan astam is-shara ótkizildi. Otbasylyq jáne ulttyq qundylyqtardy dáripteýge, ata-analardyń bala tárbıesine qatysty bilimi men daǵdysyn arttyrýǵa, balalar men jastardyń densaýlyǵyn nyǵaıtýǵa, sondaı-aq turmystyq zorlyq-zombylyqtyń aldyn alýǵa baǵyttalǵan taqyryptyq aktsııalar, kezdesýler, semınarlar men aǵartýshylyq is-sharalar uıymdastyryldy.
Otbasy ınstıtýtyn nyǵaıtý — Prezıdent Qasym-Jomart Toqaevtyń aıryqsha nazaryndaǵy memlekettik saıasattyń basym baǵyttarynyń biri. Bul rette Qazaqstan Respýblıkasynyń jańa Konstıtýtsııasynyń mańyzy erekshe. Onda neke zańda belgilengen tártippen memleket tirkegen er men áıeldiń erikti ári teń quqyqty odaǵy retinde aıqyndalǵan.
Sonymen qatar 2024 jyly áıelderdiń quqyqtary men balalardyń qaýipsizdigin qamtamasyz etý máseleleri jónindegi Qazaqstan Respýblıkasynyń Zańy qabyldandy. Qujatqa sáıkes turmystyq zorlyq-zombylyq úshin qylmystyq jaýapkershilik engizilip, balalarǵa qatysty zorlyq-zombylyqtyń barlyq túri úshin jaýapkershilik kúsheıtildi. Osy zańnamalyq normalardy iske asyrý aıasynda turmystyq zorlyq-zombylyqtyń aldyn alýǵa, otbasy ınstıtýtyn nyǵaıtýǵa jáne kámeletke tolmaǵandardyń qaýipsizdigin qamtamasyz etýge arnalǵan keshendi sharalar ázirlendi.
— Otbasylarǵa kórsetiletin ataýly kómekti kúsheıtý maqsatynda Otbasyn qoldaý ortalyqtarynyń jumysy jańǵyrtyldy. Qazir elimizde osyndaı 160 ortalyq jumys isteıdi. Aldaǵy ýaqytta olardyń sanyn 208-ge jetkizip, Qazaqstannyń árbir aýdany men qalasynda ashý josparlanyp otyr. 2026 jyldyń basynan beri Otbasyn qoldaý ortalyqtaryna 50 myńnan astam azamat júgindi. 43 myńnan astam otbasyna konsýltatsııalyq kómek kórsetilip, 6 myńǵa jýyq otbasy uzaq merzimdi áleýmettik súıemeldeýge alyndy. Bul ortalyqtar otbasylarǵa keshendi kómek kórsetip keledi. Sondaı-aq olar áleýmettik qaterlerdiń aldyn alýǵa yqpal etip, qıyn ómirlik jaǵdaıǵa tap bolǵan azamattarǵa qoldaý bildiredi, — delingen mınıstrlik taratqan aqparatta.
Budan bólek, Otbasy jáne neke ınstıtýtyn saqtaý men nyǵaıtý jónindegi 2025-2027 jyldarǵa arnalǵan is-sharalar jospary ázirlenip, qabyldandy. Qujat ajyrasýdyń aldyn alýǵa, azamattardyń otbasylyq ómirge sanaly túrde daıyndalýyna jáne jaýapty ata-ana mádenıetin qalyptastyrýǵa baǵyttalǵan.
Mádenıet jáne aqparat mınıstrliginiń qoldaýymen júzege asyrylyp jatqan «Ata-analar akademııasy» jobasy da jalǵasyp keledi. Onyń maqsaty — otbasy ınstıtýtyn nyǵaıtý, ata-analardyń bala tárbıesine qatysty bilimi men daǵdysyn arttyrý jáne jaýapty tárbıe mádenıetin qalyptastyrý. 2026 jyly joba aıasynda elimiz boıynsha 40 myńnan astam adamdy qamtý josparlanǵan. Olardyń qatarynda ata-analar, pedagogter jáne áleýmettik sala mamandary bar.
Memlekettik otbasy saıasaty aıasynda eńbek pen otbasylyq mindetterdi qatar alyp júrýge qolaıly jaǵdaı jasaý sharalary da júıeli túrde júzege asyrylyp keledi. Máselen, Mádenıet jáne aqparat mınıstrligi BUU-nyń Halyqtyń qonystanýy salasyndaǵy qorymen birlesip, «Otbasyna qolaıly jumys orny» jobasyn júzege asyryp keledi. Bastama qyzmetkerlerdiń otbasylyq jaǵdaıy men mindetteri eskeriletin korporatıvtik mádenıetti damytýǵa jáne jumys isteıtin ata-analardy qoldaýǵa baǵyttalǵan.
2026 jyly memlekettik organdar men jumys berýshilerdiń ókilderine arnalǵan oqytý baǵdarlamasy iske qosyldy. Baǵdarlama uıymdarda otbasylyq mindetterdi eskeretin jumys tásilderin engizýdi kózdeıdi. Bul sharalar otbasyndaǵy birlik pen qoldaýdy kúsheıtip, onyń qaýipsizdigi men ál-aýqatyna qamqorlyq jasaýda memleket pen qoǵamnyń ortaq jaýapkershiligin arttyrýdy kózdeıdi.
Budan buryn Memleket basshysy Qasym-Jomart Toqaev qazaqstandyqtardy Otbasy kúnimen quttyqtaǵanyn jazǵanbyz.
