Qazaqstanda ár altynshy bala kún saıyn gazdalǵan qantty sýsyn ishedi
ASTANA. KAZINFORM – Qazaqstanda 6–9 jas aralyǵyndaǵy ár altynshy bala kún saıyn gazdalǵan qantty sýsyn ishedi. Bul týraly QR Densaýlyq saqtaý mınıstrligi Kazinform agenttiginiń resmı saýalyna bergen jaýabynda málim boldy.
Mınıstrliktiń málimetinshe, balalar men jasóspirimderdiń tamaqtaný daǵdylaryna júrgizilgen zertteýler qant qosylǵan sýsyndardy tutyný deńgeıiniń joǵary ekenin kórsetken.
– Dúnıejúzilik densaýlyq saqtaý uıymynyń Balalar arasyndaǵy semizdikti epıdemıologııalyq qadaǵalaý (COSI) zertteýiniń nátıjesi boıynsha, 6–9 jas aralyǵyndaǵy balalardyń 16,7 paıyzy gazdalǵan qantty sýsyndy kún saıyn, al 30,8 paıyzy aptasyna tórt-jeti ret tutynady, – delingen mınıstrlik jaýabynda.
Sonymen qatar, 2022 jyly 11–15 jas aralyǵyndaǵy mektep oqýshylary arasynda júrgizilgen Mektep jasyndaǵy balalardyń densaýlyǵyna qatysty minez-qulqy (HBSC) halyqaralyq zertteýi oqýshylardyń 66,7 paıyzy qant qosylǵan sýsyndardy aptasyna keminde bir ret tutynatynyn kórsetti. Bul kórsetkish 2018 jylǵy 60,1 paıyzdan 66,7 paıyzǵa deıin artqan.
Zertteý nátıjesine sáıkes, 11–15 jas aralyǵyndaǵy balalardyń 26,6 paıyzy táttilerdi kún saıyn tutynady. Qyzdar arasynda bul kórsetkish 30,4 paıyz, al uldar arasynda 22,9 paıyz. Sondaı-aq jasóspirimderdiń 20,5 paıyzy, ıaǵnı ár besinshisi energetıkalyq sýsyndardy apta saıyn ishedi.
– Qant qosylǵan sýsyndardy, tátti taǵamdardy jáne energetıkalyq sýsyndardy jıi tutyný balalar men jasóspirimder arasynda artyq salmaq pen semizdiktiń negizgi qaýip faktorlarynyń biri sanalady, – delingen mınıstrlik jaýabynda.
Mınıstrlik málimetinshe, osyǵan baılanysty mekteptegi tamaqtanýdy jetildirý, «Salamatty mektep» bastamasyn damytý, durys tamaqtaný mádenıetin qalyptastyrý, juqpaly emes aýrýlardyń qaýip faktorlaryn azaıtý jáne olardyń aldyn alý baǵytyndaǵy jumystar jalǵasyp jatyr.
Eske salaıyq, buǵan deıin Densaýlyq saqtaý mınıstrligi qazaqstandyqtarǵa semizdik pen sozylmaly aýrýlardyń aldyn alý úshin qant tutynýdy shekteýge keńes bergen edi.
