Elimizde ár 3-5 jyl saıyn topyraqty mindetti zertteý usynyldy
ASTANA. KAZINFORM – Bul týraly Astanada Aýyl sharýashylyǵy mınıstri Aıdarbek Saparovtyń tóraǵalyǵymen vedomstvo alqasynyń otyrysynda aıtyldy, dep habarlaıdy QR Aýyl sharýashylyǵy mınıstrliginiń baspasóz qyzmeti.
-Qazaqstan úshin jer – azyq-túlik qaýipsizdigin qamtamasyz etetin strategııalyq resýrs. Qazirgi tańda aınalymda 117,7 mln gektar jer bar. Onyń ishinde 26,5 mln gektary – egistik, 83,9 mln gektary – jaıylym, 2,4 mln gektary – shabyndyq jáne 4,9 mln gektary ózge sanattaǵy jerler. Tabıǵı jáne antropogendik faktorlardyń áserinen jerdiń tozý qaýpi áli de saqtalyp otyr.
Osy máseleni júıeli túrde sheshý úshin memleket birqatar keshendi sharany júzege asyryp jatyr. Sonyń ishinde BUU-nyń Shóleıttenýge qarsy kúres jónindegi konventsııasy aıasynda jerdiń tozýyn beıtaraptandyrý kórsetkishterine qol jetkizý baǵytyndaǵy jumystar júrgizilý ústinde, – dedi Aıdarbek Saparov alǵy sózinde.
Aýyl sharýashylyǵy vıtse-mınıstri Azat Sultanov jer sapasyn baqylaý júıesin reformalaý nátıjeleri týraly málimdedi.
Atap ótkenindeı, aýdıttiń jańa standarttaryna kóshý aıasynda «JerZJJMI» mamandary 53,5 mln gektar aýmaqtaǵy jerdiń tozý kartalaryn jańartqan. Zerttelgen aýmaqtardaǵy naqty tozǵan jer kólemi 2,7 mln gektardy nemese shamamen 5%-dy quraıdy. Barlyq 182 mln gektar aýyl sharýashylyǵy alqaptaryna monıtorıng júrgizý jumystary 2029 jylǵa deıin aıaqtalady dep josparlanyp otyr.
Eldiń basty baılyǵyn qorǵaýdaǵy mańyzdy qadamdardyń biri – qazirgi tańda Parlament Májilisinde qaralyp jatqan «Topyraqty qorǵaý týraly» zań jobasy. Qujatta aýyl sharýashylyǵy jerlerine ár 3–5 jyl saıyn mindetti agrohımııalyq zertteý júrgizý, jer ýchaskelerin berý kezinde topyraqtyń sapalyq sıpattamalary kórsetilgen mindetti «jer pasporty» júıesin engizý, sondaı-aq jer komıssııalary men konkýrstyq rásimderdiń jumysyn tolyq tsıfrlyq onlaın formatqa kóshirý kózdelgen.
Osyǵan deıin topyraqtyń qunarlyǵy týraly málimetter biryńǵaı bazaǵa engiziletini týraly jazdyq.
