Qazaqstanda AquaLab sý ınnovatsııalary ortalyǵy qurylady
ASTANA. KAZINFORM — Qazaqstanda sý tasqyny men qurǵaqshylyq týraly jalpyulttyq erte eskertý júıesi ázirlenip, AquaLab sý ınnovatsııalary ortalyǵy qurylady. Bul bastamalardy júzege asyrý maqsatynda Sý resýrstary jáne ırrıgatsııa mınıstrligi halyqaralyq seriktestermen birqatar yntymaqtastyq kelisimine qol qoıdy. Bul týraly vedomstvonyń baspasóz qyzmeti málim etti.
Astanada «Qazaqstanda sý únemdeýdi ilgeriletý: memleket pen halyqaralyq seriktesterdiń kúsh-jigerin úılestirý» taqyrybynda Sý resýrstary jáne ırrıgatsııa mınıstrligi janyndaǵy Sý sektoryn damytý jónindegi seriktesterdiń úılestirý keńesiniń III otyrysy ótti.
Іs-sharaǵa Sý resýrstary jáne ırrıgatsııa mınıstri Nurjan Nurjigitov, BUU Damý baǵdarlamasynyń Qazaqstandaǵy Turaqty ókili Katarjına Vavernıa, sondaı-aq sarapshylar, memlekettik organdardyń, halyqaralyq uıymdardyń, qarjy ınstıtýttarynyń, sheteldik damý agenttikteriniń, dıplomatııalyq korpýstyń jáne bıznes qaýymdastyqtyń ókilderi qatysty.
Otyrysqa qatysýshylar 2024-2030 jyldarǵa arnalǵan Sý salasyndaǵy seriktestik bastamasynyń iske asyrylý barysyn, sý únemdeý salasyndaǵy memlekettik saıasattyń basymdyqtaryn, reformalary men damý perspektıvalaryn, sý sharýashylyǵyn tsıfrlandyrýdy, sondaı-aq sýdy tıimdi únemdeý maqsatyndaǵy sý ınfraqurylymyn damytý máselelerin talqylady.
Sonymen qatar seriktestik týraly kelisimderge qol qoıý rásimi ótti. Sý resýrstary jáne ırrıgatsııa mınıstrliginiń «Sý resýrstarynyń aqparattyq-taldaý ortalyǵy» KEAQ pen Agip Karachaganak B.V. kompanııasy arasynda sý tasqyny men qurǵaqshylyq týraly jalpyulttyq erte eskertý júıesin ázirleý jáne sý sharýashylyǵy ınfraqurylymy týraly derekterdi biriktirý jónindegi yntymaqtastyq týraly kelisimge qol qoıyldy.
Qazaqstanda AquaLab sý ınnovatsııalary, STEM-bilim berý jáne ekologııalyq aǵartý ortalyǵyn qurý maqsatynda «Sý resýrstarynyń aqparattyq-taldaý ortalyǵy» KEAQ pen Caravan of Knowledge korporatıvtik qory arasynda yntymaqtastyq týraly kelisim jasaldy. Sondaı-aq osy ortalyqty qurý jobasyn birlesip qarjylandyrý jáne iske asyrý jónindegi úshjaqty kelisimge «Sý resýrstarynyń aqparattyq-taldaý ortalyǵy» KEAQ, Qazaqstannyń ekologııalyq uıymdary qaýymdastyǵy jáne Coca-Cola kompanııasynyń Ortalyq Azııa men Kavkazdaǵy ókildigi qol qoıdy.
— Sý únemdeý búginde jeke bir jumys baǵyty emes, sý resýrstaryn basqarýdyń jańa modeline aınaldy. Bul Qazaqstan úshin erekshe mańyzdy, óıtkeni sý qaýipsizdigi máseleleri ekonomıkanyń turaqtylyǵymen, ekologııalyq ál-aýqatpen jáne halyqtyń ómir súrý sapasymen tikeleı baılanysty. Halyqaralyq yntymaqtastyq búginde naqty nátıjesin berip otyr. Іri ınfraqurylymdyq jobalar júzege asyrylyp, sýdy basqarýdyń zamanaýı tehnologııalary engizilýde, tsıfrlyq sheshimder damytylyp, bilim berý baǵdarlamalary keńeıtilip, salanyń kadrlyq áleýeti nyǵaıtylyp keledi. Sonymen qatar árbir joba sý resýrstaryn basqarý salasyndaǵy biryńǵaı memlekettik saıasattyń ajyramas bóligine aınalyp, ulttyq basymdyqtardy eskerip, naqty ári ólshenetin nátıje berýi qajet. Infraqurylymdyq sheshimder basqarýdyń zamanaýı tehnologııalarymen qatar júrýi tıis. Tsıfrlyq quraldar biryńǵaı aqparattyq keńistikti qalyptastyrýǵa qyzmet etýi kerek, — dedi Sý resýrstary jáne ırrıgatsııa mınıstri Nurjan Nurjigitov.
Mınıstrdiń pikirinshe, jańa tehnologııalardy engizý bilikti mamandar daıarlaýmen jáne sýdy uqypty paıdalaný mádenıetin qalyptastyrýmen ushtasýy qajet.
— Eki jyl ishinde Úılestirý keńesi jaı ǵana dıalog alańy emes, memlekettiń, halyqaralyq seriktester men qarjy ınstıtýttarynyń kúsh-jigerin biriktiretin tıimdi tetikke aınaldy. Bul jumystyń shynaıy qundylyǵy ótkizilgen kezdesýlerdiń sanymen emes, búginde ınvestıtsııalyq jobalarǵa ulasyp, memlekettik saıasatty jetildirýge yqpal etip jatqan birlesken sheshimdermen ólshenedi. BUUDB osy úderistiń bir bóligi bolǵanyn maqtan tutady jáne Qazaqstanda sý únemdeý saıasatyn ilgeriletý men eldiń uzaq merzimdi sý qaýipsizdigin qamtamasyz etý baǵytyndaǵy qoldaýyn jalǵastyra beredi, — dedi BUU Damý baǵdarlamasynyń Qazaqstandaǵy Turaqty ókili Katarjına Vavernıa.
Sý sektoryn damytý jónindegi seriktesterdiń úılestirý keńesi 2024 jyldyń qyrkúıeginde Sý resýrstary jáne ırrıgatsııa mınıstrligi men Qazaqstandaǵy BUU Damý baǵdarlamasynyń bastamasymen qurylǵan. Búginde keńes quramyna 40-tan astam seriktes uıym kiredi.
