Qazaqstanda aptap ystyqtyń júkti áıelderge áseri zertteledi
ASTANA. KAZINFORM – Qazaqstan Respýblıkasynyń Densaýlyq saqtaý mınıstri BUU-nyń Qazaqstandaǵy halyq sany salasyndaǵy qorynyń (ıÝNFPA) ókili Chınve Ogbonnamen kezdesý ótkizdi, onyń barysynda taraptar ıÝNFPA-nyń 2026-2030 jyldarǵa arnalǵan altynshy Eldik baǵdarlamasy sheńberinde jańa birlesken jobalardy iske asyrýdy talqylady.
QR Densaýlyq saqtaý mınıstrligi baspasóz qyzmetini ńhabarlaýynsha, kezdesýdi ashqan mınıstr ıÝNFPA-ǵa kópjyldyq áriptestigi úshin, sondaı-aq bıylǵy mamyr aıynda Qazaqstanǵa BUU Bas hatshysynyń orynbasary, ıÝNFPA Atqarýshy dırektory doktor Dıene Keıtanyń resmı saparyn uıymdastyrǵany úshin alǵysyn bildirdi.
Vedomstvo basshysynyń aıtýynsha, sol kezde qol jetkizilgen ýaǵdalastyqtar birlesken bastamalardy praktıkalyq iske asyrýǵa negiz boldy.
-Biz ıÝNFPA-men yntymaqtastyǵymyzdy densaýlyq saqtaý júıesin nyǵaıtýǵa, ǵylymı áleýetti damytýǵa jáne halyqqa zamanaýı medıtsınalyq qyzmetterdiń qoljetimdiligin arttyrýǵa baǵyttalǵan strategııalyq áriptestik retinde qarastyramyz, – dedi Aqmaral Álnazarova.
Kelissózder barysynda taraptar aldaǵy ózara is-qımyldyń birqatar basym baǵyttaryn aıqyndady.
Negizgi bastamalardyń biri – klımattyń ózgerýiniń halyq densaýlyǵyna áseri máselelerine basymdyq bere otyryp, Qazaqstanda BUU ýnıversıteti men Qoǵamdyq densaýlyq saqtaý mektebiniń platformasyn qurý boldy.
Sondaı-aq taraptar ıÝNFPA-men birlesip, aptap ystyqtyń júkti áıelder men jańa týǵan nárestelerdiń densaýlyǵyna áserin zerdeleýge arnalǵan zertteý júrgizý máselesin talqylady. Zertteý elimizdiń eń ystyq óńirleri – Qyzylorda, Túrkistan jáne Mańǵystaý oblystarynda júrgiziledi dep josparlanyp otyr.
ıÝNFPA-men tabysty áriptestiktiń kelesi baǵyty retinde Jastar densaýlyq ortalyqtaryn (JDO) damytý aıqyndaldy. Onyń aıasynda aýyldyq jerde turatyn jasóspirimderge, jastarǵa jáne áıelderge qashyqtan psıhologııalyq jáne reprodýktıvtik kómek kórsetýdiń jańa tásilderin engizý josparlanyp otyr.
-Pılottyq jobanyń sheńberinde JDO bazasynda óńirlik telepsıhologııa ortalyqtaryn qurýdy, aýyl jastaryna bilikti psıhologtardyń qashyqtan konsýltatsııalaryn uıymdastyrýdy jáne shalǵaı eldi mekenderge shyǵatyn mobıldik mýltıdıstsıplınarlyq toptar qalyptastyrýdy usynamyz. Sonymen qatar zorlyq-zombylyq, sýıtsıd qaýpi, daǵdarystyq júktilik, reprodýktıvtik joǵaltýlar, mazasyzdyq pen depressııalyq jaǵdaılar máseleleri boıynsha daǵdarystyq konsýltatsııalarǵa erekshe nazar aýdarý qajet, – dedi vedomstvo basshysy.
Búginde elimizde jastarǵa qolaıly medıtsınalyq, psıhologııalyq jáne áleýmettik qyzmetter kórsetetin 90-ǵa jýyq osyndaı ortalyq jumys isteıdi. Olar jyl saıyn bir mıllıonǵa jýyq jas azamatty qamtıdy.
ıÝNFPA-nyń róli halyqaralyq saraptamalyq qoldaý kórsetý, granttyq jáne tehnıkalyq kómek usyný, qazaqstandyq mamandar men sýpervızorlardy daıarlaý, sondaı-aq jobanyń nátıjelerin tek ıesizdendirilgen jáne jınaqtalǵan kórsetkishter negizinde táýelsiz baǵalaý baǵyttaryn qamtýy múmkin.
Mınıstr sondaı-aq BUU Qoryna halyqaralyq uıymnyń tájirıbesi men densaýlyq saqtaý júıesiniń áleýetin paıdalana otyryp, elimizdegi jastar eriktiler qozǵalysyn damytýǵa jáne densaýlyq eriktileri korpýsyn qurýǵa qoldaý kórsetýdi usyndy.
Kezdesý qorytyndysy boıynsha taraptar halyq densaýlyǵyn saqtaýǵa, ǵylymı áleýetti damytýǵa, reprodýktıvtik densaýlyqty jetildirýge jáne densaýlyq saqtaý júıesiniń zamanaýı syn-qaýipterge tózimdiligin arttyrýǵa baǵyttalǵan birlesken jobalardy iske asyrý men yntymaqtastyqty odan ári nyǵaıtýǵa daıyn ekendikterin rastady.
Osyǵan deıin elimizde densaýlyq saqtaý resýrstaryn basqarýdyń biryńǵaı tsıfrlyq platformasy iske qosylǵany týraly jazdyq.
