Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM — Osy aptada elimizdiń memlekettik basqarý júıesinde, jergilikti atqarý organdarynda jáne sport salasynda mańyzdy kadrlyq aýys-túıis boldy.
Apta basynda Elnur Beısenbaev QR Prezıdenti Ákimshiliginiń Іshki saıasat bóliminiń meńgerýshisi laýazymyna taǵaıyndaldy.
Elnur Sabyrjanuly Beısenbaev 1986 jyly 27 maýsymda Kentaý qalasynda dúnıege keldi. Ál-Farabı atyndaǵy Qazaq ulttyq ýnıversıtetiniń túlegi. Saıasattanýshy, áleýmettik ǵylymdar magıstri.
Ál-Farabı atyndaǵy QazUÝ-dyń fılosofııa jáne saıasattaný fakýltetin bitirgen.
Eńbek jolyn «Jastar úni» Jastar qoǵamdyq uıymynda maman retinde bastap, keıinnen 2009 jyly tóraǵa boldy.
2012-2015 jyldary tarıh pániniń muǵalimi, Qazaqstan kommýnıstik halyq partııasynyń Almaty qalalyq fılıalynda ıdeologııa jáne nasıhat jónindegi hatshy qyzmetterin qosa atqardy.
2016 jyldan 2017 jylǵa deıin Almaty qalasy ákimdiginiń jastar jobalary jáne uıymdastyrý jumystary bóliminiń basshysy, jastar saıasaty máseleleri basqarmasynyń basshysy laýazymdarynda eńbek etti.
2017 jyldan 2018 jylǵa deıin Abaı atyndaǵy Qazaq ulttyq pedagogıkalyq ýnıversıtetinde tárbıe jumysy departamentiniń dırektory boldy.
2019 jyly Nur-Sultan qalasy ákiminiń áleýmettik máseleler jónindegi keńesshisi.
2020 jyly «Nur Otan» partııasy janyndaǵy «Jas Otan» Jastar qanatynyń tóraǵasy.
2021 jylǵy qańtardan 2023 jylǵy qańtarǵa deıin — Jetinshi shaqyrylǵan Qazaqstan Respýblıkasy Parlamenti Májilisiniń depýtaty.
2023 jylǵy qańtardan 2023 jylǵy tamyz — «AMANAT» partııasynyń atqarýshy hatshysy.
2023 jyldyń naýryzynan bastap qazirgi ýaqytqa deıin — Segizinshi shaqyrylǵan Qazaqstan Respýblıkasy Parlamenti Májilisiniń depýtaty, «AMANAT» partııasy Fraktsııasynyń jetekshisi bolǵan.
Ǵabıt Muqanov Astana qalasynyń prokýrory laýazymyna taǵaıyndaldy.
Ǵabıt Muqanov eńbek jolyn Almaty oblysy Kerbulaq aýdany prokýrorynyń kómekshisi retinde bastady.
Ár jyldary Almaty oblysy Talǵar aýdanynyń prokýrory, Almaty qalasy Medeý aýdanynyń prokýrory, Astana qalasy prokýratýrasynyń Apparat basshysy-basqarma bastyǵy, Astana qalasy prokýrorynyń orynbasary, Bas prokýratýranyń Kadrlyq damytý departamentiniń bastyǵy laýazymdaryn atqardy.
2021 jylǵy tamyzdan Shymkent qalasynyń prokýrory laýazymynda qyzmet etti.
Qyzmettik mindetterin minsiz atqarǵany úshin «Jaýyngerlik erligi úshin» medalimen jáne II dárejeli «Aıbyn» ordenimen nagradtalǵan. Prokýratýranyń qurmetti qyzmetkeri.
QR Úkimetiniń qaýlysymen Talasbek Qanafın QR Aýyl sharýashylyǵy vıtse-mınıstri qyzmetine taǵaıyndaldy.
Talasbek Qanafın 1986 jyly Qaraǵandy oblysynda dúnıege kelgen. Qaraǵandy memlekettik tehnıkalyq ýnıversıtetin bitirgen.
Eńbek jolyn 2008 jyly Astana qalasynda «Astyqjan-Qaraǵandy» JShS-niń júıelik ákimshisi bolyp bastaǵan.
2009 jyldan 2016 jylǵa deıin «Ulttyq aqparattyq tehnologııalar» AQ qurylymynda bas mamannan bastap jetekshi ınjener, joba jetekshisine deıin ártúrli laýazymdarda jumys istedi.
2017–2019 jyldary — QR Qorǵanys jáne aeroǵarysh ónerkásibi mınıstrligi Memlekettik materıaldyq rezervter komıtetiniń «Rezerv» ShJQ RMK Aqparattyq tehnologııalar bóliminiń bastyǵy, bas dırektorynyń orynbasary. 2019–2024 jyldary — QR Syrtqy ister mınıstrliginiń qurylymynda Ákimshilik jumys jáne baqylaý departamenti basshysy orynbasarynyń mindetin atqarýshydan bastap Tsıfrlandyrý departamenti dırektorynyń orynbasaryna deıingi ártúrli laýazymdarda jumys istedi.
2020 jyldyń aqpan aıynan bastap qazirgi ýaqytqa deıin QR Syrtqy ister mınıstrliginiń Tsıfrlandyrý departamentiniń dırektory qyzmetin atqarǵan.
Energetıka mınıstrligi apparatynyń basshysy laýazymyna Aıdyn Jumabekuly Ashýev taǵaıyndaldy.
Aıdyn Ashýev 1976 jyly Almatyda dúnıege kelgen. Qazaq memlekettik basqarý akademııasyn, «Qarjy akademııasy» AQ bitirgen.
Eńbek jolyn 1995 jyly «Aqjol» JShS menedjer bolyp bastaǵan.
1999-2003 jyldary aralyǵynda QR Statıstıka agenttiginde túrli qyzmetterdi atqarǵan.
2003-2005 jyldary — «Saraptyq kredıtter men ınvestıtsııalardy saqtandyrý jónindegi memlekettik saqtandyrý korporatsııasy» AQ bas maman, Basqarma tóraǵasynyń kómekshisi.
2006-2007 jyldary — QR Ádilet mınıstrligi «Zııatkerlik menshik ulttyq ınstıtýty» RMQK qurylymynda basshylyq qyzmetterdi atqarǵan.
2007-2009 jyldary aralyǵynda «QazAgro» Ulttyq holdıngi» AQ jáne «Qazagrogarant» AQ jumys istegen.
2009-2011 jyldary — QR TJM «Rezerv» RMK bas dırektorynyń orynbasary, «QR Statıstıka agenttiginiń Aqparattyq-esepteý ortalyǵy» RMK dırektory.
2011-2014 jyldary — QR Statıstıka agenttigi tóraǵasynyń orynbasary.
2016-2018 jyldary — «Amangeldi Gaz» JShS qarjy jáne ekonomıka bas dırektorynyń orynbasary.
2019-2021 jyldary Memlekettik satyp alý komıtetiniń tóraǵasy, Qazynashylyq komıtetiniń tóraǵasy, QR Qarjy mınıstrliginiń jaýapty hatshysy, QR Prezıdenti Ákimshiliginiń memlekettik ınspektorynyń m. a. qyzmetterin atqarǵan.
2022-2023 jyldary — «Áleýmettik medıtsınalyq saqtandyrý qory» QAQ basqarma tóraǵasy.
2025 jyldyń shildesinen osy ýaqytqa deıin QR energetıka mınıstriniń keńesshisi qyzmetin atqarǵan.
Ulttyq qorǵanys ýnıversıtetiniń basshysy laýazymyna Baýyrjan Ábjanov taǵaıyndaldy.
Baýyrjan Ábjanov 1968 jyly 10 sáýirde Aqmola oblysynda dúnıege kelgen. 1990 jyldan bastap Qazaqstannyń ishki áskerleri men Ulttyq ulan sapynda qyzmet atqardy, vzvod komandırinen bastap basshylyq laýazymdarǵa deıin kóterildi. «Shyǵys» óńirlik qolbasshylyǵyn jáne Petropavldaǵy Ulttyq ulan akademııasyn basqardy.
Bul taǵaıyndaýǵa deıin ol QR Ulttyq ulany Bas qolbasshysynyń orynbasary laýazymyn atqarǵan. General-maıor ataǵyn ıelengen.
Sporttyq taǵaıyndaý boıynsha Nursultan Temirov áıelder kúresinen Qazaqstan ulttyq quramasynyń bas jattyqtyrýshysy qyzmetine taǵaıyndaldy.
Qazaqstan kúres federatsııasynan málim etkenindeı, Nursultan Temirov eńbek jolyn 2014 jyly bastady.
Ár jyldary jasóspirimder jáne jastar quramasynyń, sonymen qatar ulttyq quramanyń aǵa jattyqtyrýshysy qyzmetin atqarǵan. Úsh jyl boıy áıelder kúresinen memlekettik jattyqtyrýshy bolyp eńbektendi.
QR eńbek sińirgen jattyqtyrýshysy Nursultan Temirov — álem chempıonatynyń 4 dúrkin júldegeri Jámılá Baqbergenova jáne basqa sportshylardyń jeke bapkeri.
Óńirler boıynsha, Eldos Saǵıev Shymkent qalasynyń prokýrory laýazymyna taǵaıyndaldy.
Eldos Saǵıev Prokýratýra organdaryndaǵy qyzmetin Aqmola oblysy Shortandy aýdany prokýrorynyń kómekshisi retinde bastaǵan.
Ár jyldary Ekonomıkalyq qylmysqa jáne sybaılas jemqorlyqqa qarsy kúres agenttiginiń Qaraǵandy oblysy boıynsha departamentinde, Sybaılas jemqorlyqqa qarsy is-qımyl Ulttyq bıýrosynyń Qostanaı jáne Mańǵystaý oblystary boıynsha departamentterinde, Bas prokýratýranyń Arnaıy prokýrorlar qyzmetinde basshylyq laýazymdarda qyzmet atqardy.
2022 jylǵy tamyzdan Bas prokýratýranyń Sotqa deıingi tergep-tekserýdiń zańdylyǵyn qadaǵalaý jáne qylmystyq qýdalaý qyzmetiniń bastyǵy boldy.
Qyzmettegi joǵary jetistikteri úshin «Eren eńbegi úshin» medalimen, ІІ dárejeli «Aıbyn» jáne ІІ dárejeli «Dańq» ordenderimen nagradtalǵan.
Túrkistan oblysynyń Bilim basqarmasynyń basshysy qyzmetine Ǵalymjan Orynov taǵaıyndaldy.
Ǵalymjan Qaldykózuly 1975 jyly 16 qazanda burynǵy Ońtústik Qazaqstan oblysy, Qazyǵurt aýdanynda dúnıege kelgen, qazaq, bilimi joǵary.
Qazaq Tutyný kooperatsııa ınstıtýtyn jáne Q.ıAsaýı atyndaǵy Halyqaralyq qazaq-túrik ýnıversıtetin bitirgen. Mamandyǵy boıynsha biliktiligi — ekonomıst, zańger. Sondaı-aq «Bolashaq» baǵdarlamasy aıasynda Syracuse University (AQSh) bazasynda memlekettik saıasat jáne memlekettik basqarý salalary boıynsha bilimin jetildirgen. Ekonomıka ǵylymdarynyń magıstri. Halyqaralyq jáne ulttyq kásibı biliktilikterge ıe: ACCA (Ulybrıtanııa) aıasynda halyqaralyq aýdıt jáne memlekettik sektor aýdıti, sondaı-aq «Memlekettik aýdıtor» sertıfıkaty.
Eńbek jolyn 1996 jyly Ońtústik Qazaqstan oblysy Qazyǵurt aýdandyq Salyq ınspektsııasynda bastaǵan. Ár jyldary aýdandyq jáne oblystyq deńgeıdegi salyq organdarynda ınspektor, aǵa ınspektor, bas maman, bólim basshysy, salyq komıteti tóraǵasynyń orynbasary qyzmetterin atqardy.
2007-2011 jyldary Kentaý qalasy boıynsha Salyq komıtetiniń tóraǵasy, keıin Salyq basqarmasynyń bastyǵy boldy. 2011-2018 jyldary Ońtústik Qazaqstan oblysy boıynsha Salyq departamenti men Memlekettik kirister departamenti basshysynyń orynbasary bolyp eńbek etti.
2018-2019 jyldary Qazaqstan Qarjy mınıstrligi Memlekettik kirister komıtetiniń ortalyq apparatynda qarjylyq jáne uıymdastyrý baǵytyndaǵy basqarmalardy basqardy.
2019-2022 jyldary Qyzylorda oblysy boıynsha Memlekettik kirister departamentiniń, al 2022-2025 jyldary Ulytaý oblysy boıynsha Memlekettik kirister departamentiniń basshysy qyzmetin atqardy.
2025 jylǵy naýryz-shilde aılary aralyǵynda Túrkistan oblysy ákiminiń keńesshisi boldy. Osy ýaqytqa deıin Túrkistan oblysynyń Bilim basqarmasy basshysynyń mindetin ýaqytsha atqaryp kelgen.
«Mańǵystaýenergomunaı» JShS bas dırektory bolyp Qýanbek Shákiruly Bıǵalıev taǵaıyndaldy.
Qýanbek Bıǵalıev 1968 jyly dúnıege kelgen. 1992 jyly Almaty energetıkalyq ınstıtýtyn «Ónerkásiptik kásiporyndardy elektrmen jabdyqtaý» mamandyǵy boıynsha, 2004 jyly Sh. Esenov atyndaǵy Aqtaý memlekettik ýnıversıtetin «Ekonomıka» mamandyǵy boıynsha bitirgen.
Eńbek jolyn Mańǵystaý montajdaý-retteý basqarmasynyń Jetibaı ýchaskesinde ınjener-retteýshi bolyp bastady.
Ár jyldary «Ózenmunaıgaz» AQ qurylymdarynda ınjener-retteýshi, qabat qysymyn ustap turý tsehynyń bastyǵy, bas ınjener, «Ózenenergomunaı» basqarmasynyń dırektory qyzmetterin atqardy.
Bul laýazymǵa taǵaıyndalǵanǵa deıin «Mańǵystaýenergomunaı» JShS bas dırektorynyń óndiris jónindegi orynbasary boldy.
Qazaqstanda ótken apta ishinde bolǵan kadrlyq taǵaıyndaýlar týraly osy silteme arqyly oqı alasyz.