Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM – 1-7 maýsym aralyǵynda Qazaqstannyń memlekettik basqarý júıesi men óńirlerinde birqatar kadrlyq ózgeris boldy. Kazinform osy aptadaǵy negizgi taǵaıyndaýlarǵa sholý jasaıdy.
Memleket basshysynyń Jarlyǵymen Erjan Jıenbaev QR Prezıdenti Ákimshiligi Basshysynyń orynbasary laýazymyna taǵaıyndaldy.
Erjan Jıenbaev 1981 jyly Almaty qalasynda dúnıege kelgen. 2002 jyly zań mamandyǵy boıynsha «Turan» Ýnıversıtetin, 2018 jyly RHShjMQA-nyń «Executive MBA» baǵdarlamasy boıynsha oqý bitirgen. 2002–2005 jyldary QR Qarjy mınıstrliginiń júıesinde eńbek atqarǵan. 2005-2012 jyldary QR Premer-Mınıstri Keńsesiniń qurylymynda jumys istedi. QR Premer-Mınıstri Keńsesiniń Zań bóliminiń aǵa sarapshysy, bas sarapshysy, bas keńesshisi, sektor meńgerýshisi, bólim meńgerýshiniń orynbasary qyzmetterin atqarǵan.
2012–2013 jyldary — QR Premer-Mınıstri Keńsesiniń Zańnama, qorǵanys jáne quqyqtyq tártip bólimi meńgerýshisiniń orynbasary. 2013 jyldan 2019 jylǵy shildege deıin QR Premer-Mınıstri Keńsesiniń Zań bóliminiń meńgerýshisi qyzmetin atqarǵan. 2019 jylǵy shilde – qazan aralyǵynda QR Premer-Mınıstriniń Keńsesi basshysynyń orynbasary qyzmetin atqarǵan. 2019 jylǵy qazannan 2023 jylǵy qyrkúıekke deıin QR Prezıdentiniń Ákimshiligi Basshysynyń orynbasary bolyp jumys istedi.
2023 jylǵy 1 qyrkúıekte Memleket basshysynyń Jarlyǵymen Qazaqstan Respýblıkasy Prezıdentiniń quqyqtyq máseleler jónindegi kómekshisi bolyp taǵaıyndaldy. «Qurmet» (2016), «Parasat» (2021) ordenderimen, QR Prezıdentiniń Alǵysymen (2020), QR Prezıdentiniń Qurmet gramotasymen marapattalǵan (2021), 7 mereıtoılyq medaldary bar.
QR Qarjy mınıstrliginiń Memlekettik múlik jáne jekeshelendirý komıtetiniń tóraǵasy qyzmetine Nurmahan Ádilbekov taǵaıyndaldy.
Nurmahan Ábilqasymuly 1973 jylǵy 19 aqpanda Ońtústik Qazaqstan oblysynda dúnıege kelgen. 1994 jyly Qazaq memlekettik basqarý akademııasyn, 2004 jyly Qazaq gýmanıtarlyq zań ýnıversıtetin támamdaǵan. Eńbek jolyn 1994 jyly Shymkent oblysyndaǵy «Pobeda» maqta ósirý sovhozynda bastaǵan. Keıin 1995 jyldan 2010 jylǵa deıin Memlekettik múlik jáne jekeshelendirý komıtetinde túrli qyzmetter atqardy.
2014-2020 jyldary «Aqparattyq-esepteý ortalyǵy» AQ-da ártúrli laýazymdarda jumys istedi. 2020-2022 jyldary Memlekettik múlik jáne jekeshelendirý komıtetiniń Respýblıkalyq menshik obektilerin satý jáne jekeshelendirýden keıingi baqylaý basqarmasyn basqardy.
Al 2022 jyldan bastap 2024 jylǵa deıin Qazaqstan Respýblıkasy Memlekettik múlik jáne jekeshelendirý komıtetiniń Shymkent memlekettik múlik jáne jekeshelendirý departamentiniń basshysy qyzmetin atqardy. Al 2024 jyldan beri QR Qarjy mınıstrligi Memlekettik múlik jáne jekeshelendirý komıteti tóraǵasynyń orynbasary boldy
Densaýlyq saqtaý mınıstrliginiń buıryǵyna sáıkes, Medıtsınalyq jáne farmatsevtıkalyq baqylaý komıteti Qyzylorda oblysy boıynsha departamentiniń basshysy laýazymyna Janerke Jaqsylyq taǵaıyndaldy.
Janerke Almasqyzy Jaqsylyq 1992 jyly Qyzylorda qalasynda dúnıege kelgen. Aqtóbedegi M.Ospanov atyndaǵy Batys Qazaqstan memlekettik medıtsına ýnıversıtetin támamdaǵan.
Eńbek jolyn densaýlyq saqtaý salasynda 2017 jyly Qyzylorda qalasynyń №3 emhanasynda jalpy tájirıbelik dáriger bolyp bastaǵan. Ár jyldary osy emhanada bólim meńgerýshisi, Qyzylorda qalalyq ortalyq emhanasynda bólim meńgerýshisi, №3 qalalyq emhanada dáriger bolyp eńbek etti. Sondaı-aq atalǵan emhanada bas dárigerdiń aýdıt jónindegi orynbasary boldy.
2024 jyldyń qarasha aıynan osy kúnge deıin Medıtsınalyq jáne farmatsevtıkalyq baqylaý komıteti Qyzylorda oblysy boıynsha departamenti basshysynyń orynbasary qyzmetin atqaryp keldi.
Sonymen birge, Erlan Dákenov Mádenıet jáne aqparat mınıstrligi Mádenıet komıtetiniń tóraǵasy qyzmetinen bosatyldy.
Ol 1977 jyly Qaraǵandy oblysynda dúnıege kelgen. Qaztutynýodaǵynyń Qaraǵandy ekonomıkalyq ýnıversıtetin, Aımaqtyq áleýmettik-ınnovatsııalyq ýnıversıtetti bitirgen. 2000–2008 jyldary – «Aqtoǵaı Transport kompanııasy» JShS menedjeri, zańgeri. 2008–2012 jyldary – Astana qalasynyń Mádenıet basqarmasy «Táýelsizdik saraıy» MKQK kadr bóliminiń qoıýshy-rejısseri, prodıýser mamany, baspasóz hatshysy, ınspektor - aǵa mamany.
2012–2016 jyldary – QR Mádenıet mınıstrligi Mádenıet komıteti «Aq jaýyn» memlekettik kameralyq orkestri» RMQK dırektory.
2016–2019 jyldary – QR Mádenıet mınıstrligi «Qazaqkontsert» memlekettik kontserttik uıymy» RMQK dırektorynyń orynbasary. 2019–2023 jyldary – Astana qalasy ákimdiginiń «Memlekettik akademııalyq fılarmonııa» MKQK bas dırektory.
2023 jylǵy tamyzdan bastap sońǵy taǵaıyndaýǵa deıin Astana qalasy ákimdiginiń «Erkeǵalı Rahmadıev atyndaǵy Memlekettik akademııalyq fılarmonııa» MKQK bas dırektory.
2025 jyldyń 15 shildesinen bastap Qazaqstan Respýblıkasy Mádenıet mınıstrligi Mádenıet komıtetiniń tóraǵasy boldy.
