Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM – Osy aptada elimizdegi kadrlyq aýys-túıis ádettegiden az boldy. Bul turǵyda sport salasynda birneshe taǵaıyndaý jasaldy.
Qala ákiminiń ókimimen Shymkent qalasynyń turǵyn úı basqarmasynyń basshysy laýazymyna Nurbol Ábdirahmanuly Júnisbekov taǵaıyndaldy.
N. Ábdirahmanuly 1985 jyly 15 qyrkúıekte Ońtústik Qazaqstan oblysy, Saıram aýdany, Aqsý aýylynda týǵan. Ulty qazaq, bilimi joǵary. S.Seıfýllın atyndaǵy Qazaq agrarlyq ýnıversıtetin jáne Taraz ınnovatsııalyq-gýmanıtarlyq ýnıversıtetin bitirgen, mamandyǵy boıynsha biliktiligi — Jer resýrstaryn basqarý jáne jerdi úılestirý ınjeneri, quqyqtaný.
Eńbek jolyn 2009 jyly Shymkent qalasynyń jer kadastry fılıalynda ınjener jerge ornalastyrýshy bolyp bastady.
2012-2018 jyldary Jer kadastry ǵylymı óndiristik ortalyǵynyń sektor basshysy, ınjener-jerge ornalastyrýshysy, Saıram aýdandyq bólimshe basshysynyń orynbasary, 2018-2021 jyldary «Azamattarǵa arnalǵan Úkimet» memlekettik korporatsııasy kommertsııalyq emes aktsıonerlik qoǵamnyń Jer kadastry jáne jyljymaıtyn múlik boıynsha Túrkistan qalasy bóliminiń basshysy, 2021-2023 jyldary Shymkent qalasynyń sáýlet, qala qurylysy jáne jer qatynastary basqarmasy basshysynyń orynbasary qyzmetterin atqardy.
2023-2025 jyldary Shymkent qalasynyń sáýlet, qala qurylysy jáne jer qatynastary basqarmasynyń basshysy boldy.
13.01.2025 — 28.02.2025 jyldary Shymkent qalasynyń jer qatynastary basqarmasy basshysynyń mindetin ýaqytsha atqarýshy laýazymynda qyzmet etti.
***
Týrızm jáne sport mınıstrligi Sport jáne dene shynyqtyrý isteri komıtetine qarasty «Ulttyq jáne at sporty túrleri ortalyǵy» dırektory laýazymyna Pazylbek Qaırat taǵaıyndaldy.
Buǵan deıin ol qazaq kúresi boıynsha aǵa jattyqtyrýshy qyzmetin atqarǵan.
Pazylbek Qaırat qazaq kúresinen Qazaqstan Respýblıkasynyń sport sheberi, ulttyq sanattaǵy tóreshi, qazaq kúresinen tóreshiler alqasynyń tóraǵasy, sondaı-aq «Qazaqstan Barysy» respýblıkalyq týrnıriniń bas tóreshisi bolǵan. Sondaı-aq ol «Dene shynyqtyrý jáne sportty damytýǵa sińirgen eńbegi úshin» tósbelgisimen (2023 j.) jáne «Eren eńbegi úshin» tósbelgisimen (2024 j.) marapattalǵan.
***
Qazaqstan sý sporty túrleri federatsııasynyń prezıdenti aýysty.
Atap aıtqanda, osy aptada Qazaqstan sý sporty túrleri federatsııasynda byltyrǵy maýsymdy qorytyndylaý jáne jańa maýsymǵa daıyndyq jıyny ótti. Jıynda federatsııa prezıdenti Andreı Krıýkov óz qyzmetin merziminen buryn toqtatatynyn málimdedi.
Onyń ornyna federatsııa prezıdenttigine «Samuryq-Qazyna» ulttyq ál-aýqat qory» AQ basqarma tóraǵasy Nurlan Jaqypovtyń kandıdatýrasy usynylyp, jıynǵa qatysýshylar, onyń ishinde oblystyq federatsııa basshylary men sport qaýymdastyǵy ókilderi biraýyzdan qoldady.
Sondaı-aq federatsııa vıtse-prezıdenti bolyp, «Samuryq-Qazyna» Ulttyq ál-aýqat qory» AQ ekonomıka jáne qarjy jónindegi teń basqarýshy dırektory Mırat Maratuly Ótepov saılandy.
Aıta keteıik, Qazaqstan sý sporty túrleri federatsııasy 1998 jyly qurylǵan. Onyń quramyna júzý, sý doby, kórkem júzý, sýǵa sekirý jáne ashyq sýda júzý kiredi.
***
28 naýryzdan bastap KASE basqarma tóraıymy Alına Aldambergenniń ókilettigi onyń óz bastamasy boıynsha merziminen buryn toqtatyldy.
A. Aldambergenniń basshylyǵymen KASE-niń bırjalyq aınalymy 4 eseden astam artqan. Qor naryǵyndaǵy saýda-sattyq kólemi 5 ese, mámile sany 44 ese, aktsııa naryǵyn kapıtaldandyrý kólemi 2,7 ese, al KASE ındeksi 6,5 ese ósken. KASE tobynyń operatsııalyq kirisi 10 ese kóbeıse, komıssııalyq kirisi 6 ese, paıyzdyq kirisi 37 ese artty. KASE tobynyń taza paıdasy 15 ese, menshikti kapıtaly 8 ese kóbeıdi. KASE aktsıonerlerine dıvıdend tóleı bastady. 2024 jyly dıvıdend somasy 9,26 mlrd teńge boldy.