Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM – Osy aptada Prezıdenti Ákimshiliginde jáne oblystarda birqatar kadrlyq aýys-túıis boldy. Kazinform agenttigi 27 qazan men 2 qarasha aralyǵyndaǵy taǵaıyndaýlarǵa sholý usynady.
Apta basynda Abzal Núkenuly Núkenov QR Prezıdenti Ákimshiliginiń Іshki saıasat bóliminiń meńgerýshisi laýazymynan bosatyldy. Keıinirek ol Almaty ákiminiń orynbasary bolyp taǵaıyndaldy.
Abzal Núkenov 1978 jyly 21 shildede Jetisý oblysynda dúnıege kelgen. Ál-Farabı atyndaǵy Qazaq ulttyq ýnıversıtetin támamdaǵan. Saıası ǵylymdar kandıdaty.
Eńbek jolyn 2000 jyly bastaǵan. Almaty ishki saıasat departamentinde jumys istegen, Áýezov aýdany ákiminiń orynbasary bolǵan.
Ár jyldary Qaýipsizdik Keńesiniń Sıtýatsııalyq ortalyǵyn basqarǵan, Din isteri jáne azamattyq qoǵam vıtse-mınıstri, Qaraǵandy oblysy ákiminiń orynbasary, sondaı-aq Qazaqstan Respýblıkasy Prezıdenti Ákimshiliginde basshylyq laýazymdarda qyzmet atqarǵan.
Bul taǵaıyndaýǵa deıin QR Prezıdenti Ákimshiliginiń Іshki saıasat bóliminiń meńgerýshisi bolyp jumys istegen.
Óńirler boıynsha, Shymkent qalasy bilim basqarmasynyń basshysy laýazymyna Qýanysh Ǵalymjanuly Ysqaqov taǵaıyndaldy.
Qýanysh Ǵalymjanuly 1984 jyly 31 naýryzda týǵan, qazaq, bilimi joǵary. Qarjy jáne nesıe, quqyqtaný, pedagogıka jáne psıhologııa mamandyqtary boıynsha joǵary bilim alǵan.
Eńbek jolyn 2005 jyly Shymkent qalasy ákimdiginiń qarjy bóliminiń bas mamany laýazymynan bastaǵan.
2006-2021 jyldary jeke sektorda jáne memlekettik organdarda jaýapty basshylyq qyzmetter atqardy.
2021-2024 jyldary Túrkistan oblysy Kentaý qalasy ákiminiń orynbasary, 2024-2025 jyldary Shymkent qalasynyń mádenıet, tilderdi damytý jáne arhıvter basqarmasy basshysynyń orynbasary bolyp jumys istegen.
2025 jyldyń 4- qyrkúıeginen búginge deıin Shymkent qalasynyń bilim basqarmasy basshysynyń orynbasary laýazymynda qyzmet atqaryp keldi.
Al Qyzylorda oblystyq Tótenshe jaǵdaılar departamentiniń bastyǵy bolyp polkovnık Madııar Myrzageldıev taǵaıyndaldy.
Madııar Myrzageldıev 1987 jyly Aqmola oblysy Qorǵaljyn aýdanynyń Qorǵaljyn aýylynda dúnıege kelgen. 2008 jyly QR TJM Kókshetaý tehnıkalyq ınstıtýtyn órt qaýipsizdigi mamandyǵy boıynsha támamdaǵan. 2025 jyly QR TJM M.Ǵabdýllın atyndaǵy Azamattyq qorǵaý akademııasyn bitirip, órt qaýipsizdigi ınjeneri, ulttyq qaýipsizdik jáne áskerı ister magıstri biliktiligin alǵan. Eńbek jolyn Astana qalasy órtke qarsy qyzmet departamentiniń memlekettik órt baqylaý basqarmasynyń memlekettik órt baqylaý bóliminiń ınjeneri bolyp bastaǵan. Odan keıin basqarmada aǵa ınjener laýazymynda qyzmet etken.
Ár jyldary Astana qalasy TJD Saryarqa aýdany TJB memlekettik órt baqylaý bóliminiń bas mamany, QR ІІM TJK Astana qalasy TJD Almaty aýdany tótenshe jaǵdaılar basqarmasynyń memlekettik órt baqylaý bóliminiń bastyǵy, Nur-Sultan qalasy TJD Almaty aýdany TJB bastyǵynyń orynbasary boldy. Sonymen qatar Astana qalasy TJD Saryarqa aýdany TJB bastyǵy, Astana qalasy TJD memlekettik órt baqylaý basqarmasynyń bastyǵy, Astana qalasy TJ departamenti bastyǵynyń orynbasary qyzmetin atqardy.
2025 jyldyń 13 maýsymynan osy taǵaıyndaýǵa deıin Qyzylorda oblysy TJD bastyǵynyń mindetin ýaqytsha atqaryp kelgen.
Sondaı-aq Qyzylorda oblystyq memlekettik múlik jáne jekeshelendirý departamentiniń basshylyǵyna Rınat Qudaıbergenov taǵaıyndaldy.
Rınat Májıtuly Qorqyt ata atyndaǵy Qyzylorda memlekettik ýnıversıtetin bitirgen.
Qyzylorda oblysynyń ekonomıka jáne bıýdjettik josparlaý departamentiniń jetekshi mamany, bas mamany, qarjy basqarmasy basshysynyń orynbasary, Qyzylorda oblysynyń ekonomıka jáne bıýdjettik josparlaý basqarmasy basshysynyń orynbasary laýazymdaryn atqarǵan.
Qazirge deıin Baıqońyr qalalyq memlekettik múlik jáne jekeshelendirý departamentiniń basshysy qyzmetinde bolǵan.
Sonymen birge, Ábish Kekilbaevtiń nemeresi Abyl Kekilbaev Petropavldaǵy «Qyzyl-Jar» halyqaralyq áýejaıy dırektorynyń mindetin atqarýshy bolyp taǵaıyndaldy.
Abyl Kekilbaev Almatyda 1986 jyly dúnıege kelgen. Azamattyq avıatsııa akademııasyn «Áýe kóligin paıdalaný», Ál-Farabı atyndaǵy Qazaq Ulttyq ýnıversıtetin «Qarjy», Rıga aeronavıgatsııa ınstıtýtyn «Ushý apparattary men qozǵaltqyshtaryn paıdalaný» mamandyqtary boıynsha jáne Nazarbaev ýnıversıtetiniń Joǵary bıznes mektebin bitirgen. Sondaı-aq Kanada, Sıngapýr men Ázerbaıjan elderinde bilimin ushtaǵan.
Eńbek jolyn 2006 jyly Ortalyq Qazaqstan áýe qozǵalysyn uıymdastyrý óńirlik ortalyǵynda bólim dıspetcheri bolyp bastady.
2007-2008 jyldary - Aeronavıgatsııalyq aqparat qyzmeti basshysynyń orynbasary;
2008-2009 jyldary - Ortalyq Qazaqstan áýe qozǵalysyn uıymdastyrý óńirlik ortalyǵy basshysynyń orynbasary;
2009-2014 jyldary - Aeronavıgatsııalyq aqparatty basqarý departamentiniń basshysy boldy.
2016–2017 jyldary Kanadanyń Monreal qalasynda Halyqaralyq azamattyq avıatsııa uıymynyń aeronavıgatsııalyq bıýrosynda eńbek etti.
Abyl Kekilbaev – Halyqaralyq azamattyq avıatsııa uıymynyń Ortalyq hatshylyǵynda jumys istegen alǵashqy qazaq azamaty.
2017–2019 jyldary ol QR Indýstrııa jáne ınfraqurylymdyq damý mınıstriniń keńesshisi qyzmetin atqarǵan.
2020–2022 jyldary «Nursultan Nazarbaev» halyqaralyq áýejaıy basqarma tóraǵasynyń keńesshisi bolyp jumys istegen.