Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM — Elimizde osy apta ishinde birqatar kadrlyq aýys-túıis boldy.
Atap aıtqanda, Aıbek Ǵalymjanov rotatsııa tártibimen Ulttyq statıstıka bıýrosynyń Aqtóbe oblysy boıynsha departamentiniń basshysy bolyp taǵaıyndaldy.
Jańa basshyny ujymǵa QR SJRA Ulttyq statıstıka bıýrosy basshysynyń orynbasary Ásel Shaýenova tanystyrdy.
Aıbek Ǵalymjanov Qazaq kólik jáne kommýnıkatsııa akademııasyn «Kólik kásiporyndaryndaǵy ekonomıka jáne menedjment» mamandyǵy boıynsha bitirgen.
Statıstıka salasynda eńbek jolyn 2002 jyly Qostanaı oblysynyń Jangeldi aýdandyq statıstıka bóliminiń bastyǵy bolyp bastaǵan.
2005-2012 jyldary Qostanaı oblysynyń Statıstıka esepteý ortalyǵynyń dırektory qyzmetin atqardy.
2012-2015 jyldary Qamysty aýdany (Qamysty aýyly) ákimdigi apparaty men Qostanaı qalasy ákimdiginde ártúrli laýazymdarda jumys istedi.
2015-2019 jyldary QR QM MMJK Qostanaı memlekettik múlik jáne jekeshelendirý departamentinde bólim basshysy, basshy qyzmetterin atqardy.
2019 jylǵy qarashadan bastap jańa taǵaıyndaýǵa deıin Ulttyq statıstıka bıýrosynyń Qostanaı oblysy boıynsha departamentiniń basshysy laýazymynda boldy.
«Qurmet» ordenimen jáne «Birinshi ulttyq aýyl sharýashylyǵy sanaǵy» jáne «Statıstıka úzdigi» tósbelgilerimen marapattalǵan.
Talǵat Jaılaýov hokkeıden Qazaqstan quramasynyń bas bapkeri bolyp taǵaıyndaldy.
Talǵat Jaılaýov qazir «Barys» komandasynyń jattyqtyrýshylar shtabynda qyzmet etedi, munda ol buǵan deıin de 2023 jyldyń jeltoqsanynan 2024 jyldyń qazanyna deıin jumys istegen.
2024 jylǵy Olımpıadalyq irikteý týrnırinde, 2025 jylǵy Azııa chempıonatynda, sondaı-aq 2025 jylǵy álem chempıonatynda ulttyq quramanyń bas bapkeriniń kómekshisi boldy.
Hokkeıshi retinde jasóspirimder, jastar jáne ulttyq quramalar sapynda óner kórsetti.
Eresekter quramasynda 2006 jyly debıýt jasap, 9 álem chempıonatyna, úsh olımpıadalyq irikteý týrnırine jáne 2007, 2011 jyldardaǵy Azııa oıyndaryna qatysty. IIHF aıasynda 59 resmı match ótkizgen.
Ár jyldary ózi túlep ushqan klýby «Qaztsınk-Torpedo», «Barys» jáne «Nomad» komandalarynda oınady.
Oıynshy retindegi mansabyn 2020 jyly Qaraǵandynyń «Saryarqa» klýbynda aıaqtady.
Sonymen qatar «Pavlodar» áleýmettik-kásipkerlik korporatsııasynyń dırektorlar keńesiniń sheshimimen Dáýren Jambaıbek basqarma tóraǵasy laýazymyna taǵaıyndaldy.
Dáýren Jambaıbek 1981 jyly dúnıege kelgen. Qazaqstan Respýblıkasy Prezıdenti janyndaǵy Memlekettik basqarý akademııasyn támamdaǵan.
Eńbek jolyn Qazaqstan Respýblıkasynyń básekelestikti qorǵaý jáne tabıǵı monopolııalardy retteý agenttiginiń jetekshi mamany retinde bastaǵan. Ár jyldary QR Parlamenti Májilisiniń depýtatynyń kómekshisi, ekonomıka jáne bıýdjettik josparlaý, óńirlik damý, ulttyq ekonomıka mınıstrlikterinde ártúrli laýazymdarda qyzmet atqardy.
Atalǵan laýazymǵa taǵaıyndalǵanǵa deıin, 2023 jyldan bastap Pavlodar oblysy ákiminiń orynbasary qyzmetin atqardy.
Sondaı-aq «Qaısar» fýtbol klýbyn aldaǵy jyly qazaqstandyq Andreı Ferapontov jattyqtyrady.
Tájirıbeli maman Premer-lıgada ózindik qoltańbasyn qaldyrǵan. Ol bas bapker laýazymyn «Maqtaaral» fýtbol klýbynda bastap, «Oqjetpes» komandasynda jalǵastyrdy.
Andreı Ferapontov «Aqtóbe», «Ordabasy», «Qaırat», belarýstik «Rýh» komandalarynyń bapkerlik shtabynda qyzmet atqarǵan. Qurama deńgeıinde de tájirıbesi jetkilikti. Búginde Qazaqstan jastar quramasynyń bas bapkeri mindetin atqarady.
Álııa Rústemova densaýlyq saqtaý vıtse-mınıstri boldy.
1970 jyly Almaty oblysynda dúnıege kelgen. Almaty memlekettik medıtsına ýnıversıtetin, І.Júnsúgirov atyndaǵy Jetisý memlekettik ýnıversıtetin bitirgen.
Eńbek jolyn 1992 jyly Talǵar aýdandyq aýrýhanasynda dáriger-terapevt qyzmetinen bastaǵan.
1993–1994 jyldary — Almaty qalasyndaǵy № 7 emhananyń, № 5 Qalalyq klınıkalyq aýrýhanasynyń dáriger-terapevti.
1994–2000 jyldary — Almaty qalasynyń medıtsınalyq ǵylymı uıymdarynda klınıkalyq ordınator, aspırant.
2000–2001 jyldary Talǵar qalasynyń medıtsınalyq mekemelerinde bas dárigerdiń orynbasary bolyp jumys istedi.
2001–2005 jyldary — Almaty oblysy Densaýlyq saqtaý basqarmasynyń bas mamany.
2005–2009 jyldary Almaty oblysy boıynsha Medıtsınalyq qyzmetter kórsetý salasyndaǵy baqylaý komıtetiniń aýmaqtyq bólimshelerinde basshylyq qyzmet atqardy.
2009–2010 jyldary — Qyzylorda oblysy boıynsha Medıtsınalyq qyzmetterge aqy tóleý komıteti departamentiniń dırektory.
2010–2011 jyldary — Almaty qalasy Densaýlyq saqtaý basqarmasy bastyǵynyń orynbasary.
2011–2012 jyldary — Almaty qalasy boıynsha Medıtsınalyq jáne farmatsevtıkalyq qyzmetti baqylaý komıteti departamentiniń dırektory.
2012–2015 jyldary Astana qalasynda Travmatologııa jáne ortopedııa ǴZI ǵylymı hatshysy, ınnovatsııalyq damý bóliminiń meńgerýshisi bolyp jumys istedi.
2015–2018 jyldary — Soltústik Qazaqstan oblysy boıynsha medıtsınalyq qyzmetti baqylaý jáne qoǵamdyq densaýlyqty saqtaý departamentteri basshysynyń orynbasary, basshysy.
2018 jyly — Astana qalasy boıynsha Eńbek, áleýmettik qorǵaý jáne kóshi-qon komıteti departamenti basshysynyń orynbasary.
2018–2022 jyldary — Nur-sultan qalasy Qoǵamdyq densaýlyq saqtaý basqarmasy basshysynyń orynbasary.
2023 jyldyń qyrkúıeginen bastap qazirgi ýaqytqa deıin Astana qalasy Qoǵamdyq densaýlyq saqtaý basqarmasynyń basshysy qyzmetin atqardy.
Buǵan deıin ótken aptada Qazaqstanda bolǵan kadrlyq taǵaıyndaýlar týraly jazǵanbyz.