Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM — Elimizde osy apta ishinde birqatar kadrlyq aýys-túıis boldy.
Qazaqstan Mádenıet jáne aqparat mınıstriniń buıryǵymen Álisher Muqajan Aqparat komıteti tóraǵasy qyzmetine taǵaıyndaldy.
Álisher Qýatuly 1992 jyly Almaty qalasynda dúnıege kelgen.
Ál-Farabı atyndaǵy Qazaq ulttyq ýnıversıtetin, D.Qonaev atyndaǵy Eýrazııalyq zań akademııasyn, Turan ýnıversıtetin bitirgen.
Eńbek jolyn 2015 jyly jeke qurylymdarda bastady.
2017 jyldyń qańtar-maýsym aılarynda QR Din isteri jáne azamattyq qoǵam mınıstrligi Mádenıetter men dinderdiń halyqaralyq ortalyǵynyń aǵa sarapshysynyń mindetin atqarýshy;
2017–2018 jyldary — QR Din isteri jáne azamattyq qoǵam mınıstrligi baspasóz qyzmetiniń sarapshysy.
2019–2023 jyldary — QR Aqparat jáne qoǵamdyq damý mınıstrligi BAQ-pen ózara is-qımyl departamentiniń sarapshysy, QR Aqparat jáne qoǵamdyq damý mınıstrligi (keıinnen Mádenıet jáne aqparat mınıstrligi) BAQ salasyndaǵy memlekettik saıasat departamenti dırektorynyń orynbasary boldy.
Manarbek Buharbaev Qarjy mınıstrligi Qazynashylyq komıtetiniń Aqtóbe oblysy boıynsha Qazynashylyq departamentiniń basshysy bolyp taǵaıyndaldy.
Manarbek Mýsınuly Buharbaev 1998 jyly Aqmola qarjy-ekonomıkalyq kolledjin, 2003 jyly Almaty ekonomıka jáne statıstıka akademııasyn támamdaǵan.
Eńbek jolyn 1998 jyly QR Qarjy mınıstrliginiń Qazynashylyq komıteti Aqtóbe oblystyq qazynashylyq basqarmasynda jetekshi maman-júrgizýshi qazynashy qyzmetinen bastaǵan.
Ár jyldary túrli laýazymdarda eńbek etken. Aqtóbe oblysy boıynsha Qazynashylyq departamenti basshysynyń orynbasary bolyp jumys istedi. Keıin Mańǵystaý oblysy boıynsha Qazynashylyq departamentiniń basshysy qyzmetin atqardy.
Memlekettik qyzmettegi eńbegi elenip, «Qazaqstan Respýblıkasynyń Táýelsizdigine - 25 jyl» merekelik medalimen, «Qarjy qyzmetiniń úzdigi» tósbelgisimen, sondaı-aq «QR Qarjy mınıstrligine - 100 jyl» mereıtoılyq medalimen marapattalǵan.
Qyzylorda oblystyq kásipkerlik jáne ónerkásip basqarmasynyń basshysy bolyp Móldir Táýipbaeva taǵaıyndaldy.
Móldir Sultanbekqyzy 1978 jyly Taraz qalasynda dúnıege kelgen. Qazaq memlekettik basqarý akademııasynda «Halyqaralyq ekonomıkalyq qatynastar», Qaztutynýodaǵy Qaraǵandy ekonomıkalyq ýnıversıtetinde «Quqyqtaný», Almaty menedjment ýnıversıtetinde «Іskerlik ákimshilik» mamandyqtary boıynsha bilim alǵan.
«Bolashaq» baǵdarlamasynyń túlegi. Amerıka Qurama Shtattary Ońtústik Kalıfornııa ýnıversıtetiniń «Halyqaralyq memlekettik saıasat jáne basqarý» magıstri. Ekonomıka ǵylymdarynyń kandıdaty.
Eńbek jolyn 1999 jyly Qorqyt ata atyndaǵy Qyzylorda memlekettik ýnıversıtetiniń zertteýshisi bolyp bastaǵan. Ár jyldary Qyzylorda ınjenerlik-ekonomıkalyq ınstıtýtynda assıstent, oqytýshy, «Dabl Holdıng.Ink» korporatsııasynyń satyp alý jáne esepke alý koordınatory, Qazaq gýmanıtarlyq zań kolledjiniń oqytýshysy, qalalyq mádenı-demalys parkiniń dırektory, qalalyq bilim bólimi basshysynyń orynbasary boldy. Qyzylorda qalasy ákimi apparatynda túrli basshylyq laýazymdar atqarǵan.
Eldar Danııarov endi Abaı oblysy Polıtsııa departamentine jetekshilik etedi.
QR Іshki ister mınıstriniń orynbasary Aıdar Saıtbekov Abaı oblysy Polıtsııa departamentiniń jańa bastyǵyn tanystyrdy.
Bul qyzmetke buǵan deıin Astana qalasy Polıtsııa departamenti bastyǵynyń birinshi orynbasary bolǵan polıtsııa polkovnıgi Eldar Nurlanuly Danııarov taǵaıyndaldy.
Baýyrjan Muratuly «Qazaqteńizkólikfloty» UTKQK» JShS bas dırektory qyzmetin atqaratyn boldy.
Kompanııa ujymyna jańa basshyny «QazMunaıGaz» UK AQ tasymaldaý jáne logıstıka departamentiniń dırektory Erbolat Meńdibaev tanystyrdy.
Baýyrjan Muratuly 1986 jyly Taldyqorǵan qalasynda dúnıege kelgen.
2008 jyly Býndesver Áskerı-teńiz akademııasyn shtýrman qyzmeti (keme júrgizý) mamandyǵy boıynsha, 2017 jyly Ó.Joldasbekov atyndaǵy Ekonomıka jáne quqyq akademııasyn zańtaný mamandyǵy boıynsha jáne 2018 jyly Býndesver Bas shtabynyń akademııasyn bitimgershilik kontıngentterdi basqarý mamandyǵy boıynsha bitirgen.
2025 jyly Almaty menedjment ýnıversıtetin támamdap, iskerlik ákimshilendirý magıstri dárejesine ıe boldy.
Eńbek jolyn QR Qarýly kúshteri Áskerı-teńiz kúshteri Áskerı-teńiz bazasynyń (budan ári — QR QK ÁTK ÁTB) ártekti kemeleriniń jekelegen dıvızıonynyń shtýrmandyq jaýyngerlik bóliminiń komandıri bolyp bastaǵan.
Ár jyldary QR QK ÁTK ÁTB shtabynyń jedel bólimshesiniń aǵa ofıtseri, shtabty jumyldyrý jáne jasaqtaý bólimshesiniń bastyǵy, «Qazaqstan» zymyran-artıllerııalyq kemesiniń komandıri, QR Qorǵanys mınıstrliginiń áskerı-tehnıkalyq saıasat departamentiniń aǵa ofıtseri, QR QK ÁTK ÁTB ártekti kemeleriniń jekelegen dıvızıonynyń komandıri, QR QK ÁTK áskerı-teńiz bazasynyń komandıri — bas qolbasshynyń orynbasary, «FSSA» JShS teńiz logıstıkasy jónindegi menedjeri qyzmetterin atqardy.
Soltústik Qazaqstan oblysy ákiminiń ókimimen halyqtyń áleýmettik jaǵynan osal sanattarynyń quqyqtaryn qorǵaý jónindegi óńirlik ýákil bolyp Baqyt Jaılaýbaeva taǵaıyndaldy.
Baqyt Jaılaýbaeva SQO Esil aýdany Qaraǵaı aýylynyń týmasy.
Petropavl medıtsına ýchılışesiniń túlegi. Sondaı-aq M.Qozybaev atyndaǵy Soltústik Qazaqstan ýnıversıtetin «Pedagog-psıholog» mamandyǵy boıynsha támamdaǵan.
Eńbek jolyn oblystyq týberkýlezge qarsy dıspanserde ýchaskelik medbıke bolyp bastady. Ár jyldary Petropavldaǵy psıhonevrologııalyq syrqattarǵa arnalǵan úı-ınternatta, Petropavl áleýmettik qyzmet kórsetý ortalyǵynda medbıke bolyp jumys istedi.
2019 jyldan beri Petropavl áleýmettik qyzmet kórsetý ortalyǵynda áleýmettik jumys boıynsha dırektordyń orynbasary qyzmetin atqaryp keledi.
Mundaı laýazym buryn bolmaǵan. Halyqtyń áleýmettik jaǵynan osal sanattarynyń quqyqtary jónindegi ýákil ınstıtýtyn qurý týraly Prezıdenttiń jarlyǵyna sáıkes taǵaıyndaldy. Óńirlik ýákil ár aıdyń ekinshi sársenbisinde saǵat 11:00-den 13:00-ge deıin Petropavldaǵy SQO ákimdiginiń jumyspen qamtýdy úılestirý jáne áleýmettik baǵdarlamalar basqarmasy ǵımaratynda qabyldaıdy.
Álııa Bekmaǵambetova Qostanaı oblysy ákimdiginiń Qoǵamdyq damý basqarmasynyń basshysy laýazymyna aýysty.
Álııa Moldabaıqyzy 1979 jyly Qostanaı oblysynda dúnıege kelgen.
Qostanaı gýmanıtarlyq ınstıtýtyn «Qazaq tili men ádebıeti muǵalimi» mamandyǵy boıynsha, sondaı-aq A. Baıtursynov atyndaǵy Qostanaı óńirlik ýnıversıtetin «Quqyq bakalavry» mamandyǵy boıynsha bitirgen.
Eńbek jolyn Álııa Moldabaıqyzy 2000 jyly tarıh pániniń muǵalimi ári oqý bóliminiń meńgerýshisi qyzmetinen bastaǵan.
2009–2022 jyldar aralyǵynda Sarykól aýdandyq ákimdiginde birqatar basshylyq laýazymda qyzmet atqardy: mádenıet jáne tilderdi damytý bóliminiń basshysy, aýdan ákimi apparatynyń basshysy, aýdan ákiminiń orynbasary.
2022–2023 jyldary Qostanaı oblysy ákimi apparatynyń uıymdastyrý-ınspektorlyq bólimin basqardy.
2023 jylǵy mamyr aıynan 2025 jylǵy qyrkúıek aıyna deıin Sarykól aýdany ákiminiń orynbasary laýazymynda boldy.
Dáýren Sálimbaev Qarjy naryǵyn retteý jáne damytý agenttigi Tóraǵasynyń orynbasary boldy.
— Memleket basshysynyń ókimimen Dáýren Nııazbekuly Sálimbaev Qazaqstan Respýblıkasynyń Qarjy naryǵyn retteý jáne damytý agenttigi Tóraǵasynyń orynbasary laýazymyna taǵaıyndaldy, — delingen Aqordanyń baspasóz qyzmeti taratqan habarlamada.
Erbolat Dosaev jańa qyzmetke taǵaıyndaldy.
- Memleket basshysynyń Jarlyǵymen Erbolat Asqarbekuly Dosaev Qazaqstan Respýblıkasy Prezıdentiniń Ákimshiligi Basshysynyń orynbasary laýazymyna taǵaıyndaldy, - delingen Aqorda taratqan aqparatta.
Aıta keteıik, Erbolat Asqarbekuly 1970 jylǵy 21 mamyrda Almaty qalasynda dúnıege kelgen.
Ol 1993 jyly Almaty energetıkalyq ınstıtýtyn, sondaı-aq Máskeýdiń Baýman atyndaǵy memlekettik tehnıkalyq ýnıversıtetin bitirgen. Mamandyǵy – elektrondyq tehnıka ınjeneri.
Eńbek joly:
– 1993 - 1994 jj. – menedjer, «Іsker» halyqaralyq ǵylymı-óndiristik kásiporny;
– 1994 j. – dırektordyń orynbasary, «Vega» shaǵyn kásiporny;
– 1994 - 1996 jj. – dırektordyń orynbasary, dırektor, «Fırma «Aktsept» JShS;
– 1996 - 1997 jj. – dırektor, birinshi vıtse-prezıdent, bas dırektor, «Korporatsııa «Aktsept» JTAQ;
– 1997 j. aqpan - tamyz – basqarma tóraǵasynyń orynbasary, «Bank Turan-Alem»;
– 1997 j. tamyz - 1998 j. naýryz – basqarma tóraǵasy, «Almatınskıı torgovo-fınansovyı bank» JAQ;
– 1998 j. naýryz - shilde – QR Premer-Mınıstriniń keńesshisi;
– 1998 j. shilde - 2000 j. aqpan – QR Energetıka, ındýstrııa jáne saýda vıtse-mınıstri;
– 1999 j. jeltoqsan - 2001 j. shilde – QR Baǵaly qaǵazdar jónindegi ulttyq komıssııasynyń múshesi;
– 2000 j. aqpan - 2001 j. qarasha – QR Qarjy vıtse-mınıstri;
– 2001 j. qarasha - 2002 j. tamyz – QR Tabıǵı monopolııalardy retteý, básekeni qorǵaý jáne shaǵyn bıznesti qoldaý agenttiginiń tóraǵasy;
– 2002 j. qyrkúıek - 2003 j. maýsym – QR Tabıǵı monopolııalardy retteý jáne básekeni qorǵaý agenttiginiń tóraǵasy;
– 2003 j. maýsym - 2004 j. sáýir – QR Qarjy mınıstri, EBRR-degi Qazaqstannyń basqarýshysy;
– 2004 j. sáýir - 2006 j. qyrkúıek – QR Densaýlyq saqtaý mınıstri;
– 2012 j. qyrkúıek - 2013 j. qańtar – QR Ekonomıkalyq damý jáne saýda mınıstri;
– 2013 j. qańtar - 2014 j. tamyz – QR Ekonomıka jáne bıýdjettik josparlaý mınıstri;
– 2014 j. tamyz - 2016 j. mamyr – QR Ulttyq ekonomıka mınıstri;
– 2016 j. mamyr - 2017 j. tamyz – «Báıterek» ulttyq basqarýshy holdıngi» AQ basqarma tóraǵasy;
– 2017 j. tamyz - 2019 j. aqpan – QR Premer-Mınıstriniń orynbasary;
– 2019 j. aqpan - 2022 j. qańtar – QR Ulttyq bank tóraǵasy;
– 2022 jylǵy 31 qańtardan beri – Almaty qalasynyń ákimi (2022 jylǵy 2 jeltoqsanda qaıta taǵaıyndaldy).