Qazaqstanda apta ishinde bolǵan kadrlyq taǵaıyndaýlar

Memleket basshysynyń kelisimimen jáne Bas Prokýrordyń buıryǵymen 3-synypty memlekettik ádilet keńesshisi Baýyrjan Qypshaquly Myrzakerov Túrkistan oblysynyń prokýrory laýazymyna taǵaıyndaldy.

Baýyrjan Myrzakerov eńbek jolyn Qapshaǵaı garnızony áskerı prokýrorynyń kómekshisi bolyp bastady. Ár jyldary Saryózek, Óskemen, Qapshaǵaı garnızondarynyń áskerı prokýrory, Bas áskerı prokýrordyń orynbasary, Pavlodar oblysy prokýrorynyń orynbasary, Bas prokýratýranyń Qyzmet bastyǵynyń orynbasary, Qyzmet bastyǵy, Nur-Sultan qalasynyń prokýrory bolyp qyzmet istegen.

2022 jylǵy mamyrdan Qaraǵandy oblysynyń prokýrory boldy. Qyzmettik mindetterin minsiz atqarǵany úshin I jáne II dárejeli «Dańq» ordenderimen nagradtalǵan. Prokýratýranyń qurmetti qyzmetkeri.

Qaraǵandy oblysynyń prokýrory bolyp Murat Tileýberdıev taǵaıyndaldy

1973 jylǵy 20 qarashada Almaty oblysynyń Kaskeleń aýdanynda dúnıege kelgen. Qazaq memlekettik zań ýnıversıtetinde «Quqyqtaný» mamandyǵy boıynsha bilim alǵan.

Murat Ájinuruly prokýratýra organdaryndaǵy qyzmetin 1999 jyly Almaty qalasy Bostandyq aýdanynyń prokýrorynyń kómekshisi laýazymynan bastaǵan. Qyzmet jolynda qadaǵalaý organynyń túrli qurylymdarynda eńbek etip, qarapaıym qyzmetkerden bastap jetekshilik laýazymdarǵa deıin kóterildi.

Ár jyldary Almaty qalasy prokýratýrasynda bólim jáne basqarma basshysy qyzmetterin atqardy. 2018 jyldyń sáýir aıynan bastap Almaty qalasynyń Áýezov jáne Almaly aýdandarynyń prokýrory, keıin Almaty qalasy prokýrorynyń orynbasary boldy. Keıin Qazaqstan Respýblıkasynyń Bas prokýratýrasynda kadrlyq damý departamentin basqardy. 2023 jyldyń mamyr aıynan bastap Túrkistan oblysynyń prokýrory qyzmetin atqaryp keldi.

QR Ádilet mınıstrligi apparat basshysynyń buıryǵyna sáıkes, Danıel Ǵalıhanuly Tataev Pavlodar oblysy ádilet departamenti basshysy laýazymyna taǵaıyndaldy.

Danıel Ǵalıhanuly 1976 jyly Qostanaı oblysy Arqalyq qalasynda dúnıege kelgen. A.Baıtursynov atyndaǵy memlekettik ýnıversıtetiniń túlegi.

Eńbek jolyn 1994 jyly Arqalyq et kombınatynyń ton-teri tsehynyń jumysshysy bolyp bastaǵan. 2001 jyldan bastap Ádilet mınıstrliginde jetekshi maman, halyqty tirkeý jónindegi jumysty uıymdastyrý basqarmasy bastyǵynyń orynbasary, qujattamalyq qamtamasyz etý basqarmasynyń basshysy, Іshki ákimshilik departamenti dırektorynyń orynbasary jáne taǵy basqa jaýapty qyzmetterdi atqarǵan. Sońǵy laýazymdyq qyzmeti — Ádilet mınıstrligi Baqylaý jáne qujattamalyq qamtamasyz etý departamenti qujattardy baqylaý basqarmasy basshysy.

QR Úkimetiniń qaýlysymen Bekbolat Moldabekov ulttyq ekonomıka vıtse-mınıstri qyzmetine taǵaıyndaldy.

Bekbolat Serikuly 1991 jyly Jambyl oblysy, Taraz qalasynda dúnıege kelgen. T.Rysqulov atyndaǵy Qazaq ekonomıkalyq ýnıversıtetin, M.Nárikbaev atyndaǵy KAZGıÝÝ ýnıversıtetin bitirgen.

Eńbek jolyn «Elıt Qurylys Stroı» JShS-da ınjener-baǵdarlamashy bolyp bastaǵan. 2014–2016 jyldary — QR Investıtsııalar jáne damý mınıstrligi Baılanys, aqparattandyrý jáne aqparat komıteti basqarmasynyń bas sarapshysy. 2016–2018 jyldary — QR Aqparat jáne kommýnıkatsııalar mınıstrligi Aqparattandyrý departamentiniń bas sarapshysy, basqarma basshysy, orynbasary. 2018–2019 jyldary — QR Aqparat jáne kommýnıkatsııalar mınıstrliginiń tsıfrlandyrý departamenti dırektorynyń orynbasary.

2019–2022 jyldary — Tsıfrlandyrý departamenti dırektorynyń orynbasary, dırektory, Tsıfrlyq transformatsııa departamentiniń dırektory, Tsıfrlyq sheshimder departamentiniń dırektory, QR Tsıfrlyq damý, ınnovatsııalar jáne aeroǵarysh ónerkásibi mınıstrligi Memlekettik qyzmetter komıteti tóraǵasynyń orynbasary. 2022 jyldyń qarasha aıynan bastap qazirgi ýaqytqa deıin QR ádilet vıtse-mınıstri qyzmetin atqardy.

Pavlodar oblysynyń tsıfrlyq tehnologııalar basqarmasynyń basshysy bolyp Erdos Júsipov taǵaıyndaldy.

Erdos Janatuly 1989 jyly dúnıege kelgen. Eki joǵary bilimi bar: 2011 jyly Innovatsııalyq Eýrazııa ýnıversıtetin «Jýrnalıstıka» mamandyǵy boıynsha, al 2023 jyly Toraıǵyrov ýnıversıtetin «Computer Science» mamandyǵy boıynsha támamdaǵan. Óńirlik kadr rezerviniń múshesi. Eńbek jolyn 2011 jyly «Shahar Press» JShS-de tilshi bolyp bastaǵan. 2014-2023 jyldar aralyǵynda aqparattyq tehnologııalar salasynda túrli laýazymdarda qyzmet atqardy. 2024 jyldan bastap osy laýazymǵa taǵaıyndalǵanǵa deıin «PetroRetail» JShS-niń Astana qalasy jáne Pavlodar oblysy boıynsha fılıalynda óńirlik menedjer qyzmetin atqardy.

Qazaqstan Respýblıkasy Tótenshe jaǵdaılar mınıstrliginiń buıryǵymen Qazaqstan Respýblıkasy Tótenshe jaǵdaılar mınıstrliginiń Apparat basshysy bolyp Muhanov Murat Seıtmoldauly taǵaıyndaldy.

Buǵan deıin Mańǵystaý oblysy Tótenshe jaǵdaılar departamentiniń bastyǵy qyzmetin atqarǵan. Murat Seıtmoldauly 1985 jyly Mańǵystaý oblysynda dúnıege kelgen. 2006 jyly Qazaqstan Respýblıkasy TJM Kókshetaý tehnıkalyq ınstıtýtyn, al 2020 jyly Reseı TJM Memlekettik órtke qarsy qyzmetiniń Sankt-Peterbýrg ýnıversıtetin támamdaǵan. Azamattyq qorǵaý organdarynda 2002 jyldan beri qyzmet atqaryp keledi.

Qyzmet jolyn Málik Ǵabdýllın atyndaǵy Azamattyq qorǵaý akademııasynyń kýrsanty retinde bastap, Tótenshe jaǵdaılar departamentiniń bastyǵyna deıingi barlyq qyzmettik satylardan ótken. Eńbek jolyn Mańǵystaý oblysynyń Tótenshe jaǵdaılar salasyndaǵy memlekettik baqylaý jáne qadaǵalaý basqarmasynyń normatıvtik-tehnıkalyq bóliminiń bas mamany qyzmetinen bastaǵan.

2006-2010 jyldary memlekettik órt baqylaý baǵyty boıynsha ártúrli laýazymdarda qyzmet atqardy. 2010 jyly memlekettik órt baqylaý bóliminiń bastyǵy bolyp taǵaıyndaldy. 2016 jyly órt qaýipsizdigi salasyndaǵy baqylaý jáne profılaktıkalyq qyzmet basqarmasynyń bastyǵy boldy. 2017 jyldan bastap departament bastyǵynyń orynbasary qyzmetin atqardy. 2020 jyldan beri Mańǵystaý oblysy Tótenshe jaǵdaılar departamentiniń bastyǵy bolyp jumys istedi.

Dáýren Tileýbergenov QR Qarjy mınıstrligi Memlekettik qazynashylyq komıteti Pavlodar oblysy boıynsha departamentiniń basshysy bolyp taǵaıyndaldy.

Burynǵy atqarǵan laýazymy — Qazaqstan Respýblıkasy Qarjy mınıstrligi Memlekettik qazynashylyq komıteti Jetisý oblysy boıynsha Memlekettik qazynashylyq departamenti basshysynyń orynbasary.

Oqý-aǵartý mınıstri Juldyz Súleımenovanyń buıryǵymen Seıfýlla Smaıylov Qazaqstan Respýblıkasy Oqý-aǵartý mınıstrliginiń Respýblıkalyq bilim berý mazmunyn saraptaý ǵylymı-praktıkalyq ortalyǵynyń dırektory bolyp taǵaıyndaldy.

Seıfýlla Smaıylov Omby memlekettik pedagogıkalyq ınstıtýtyn «Geografııa pániniń muǵalimi jáne synyptan tys jumystardy uıymdastyrýshy» mamandyǵy boıynsha támamdaǵan. Geografııa ǵylymdarynyń kandıdaty jáne PhD dárejesiniń ıegeri.

Eńbek jolyn 1993 jyly geografııa pániniń muǵalimi bolyp bastaǵan. Keıin joǵary bilim berý júıesinde qyzmetin jalǵastyryp, Pavlodar memlekettik pedagogıkalyq ınstıtýty men Pavlodar pedagogıkalyq ýnıversıtetinde oqytýshy, aǵa oqytýshy, dotsent jáne qurylymdyq bólimshelerdiń basshysy qyzmetterin atqarǵan.

2021–2022 jyldary Y. Altynsarın atyndaǵy Ulttyq bilim akademııasynyń Orta bilim berý mazmuny ınstıtýtynda jetekshi ǵylymı qyzmetker boldy. 2022–2025 jyldary atalǵan ınstıtýtty basqaryp, orta bilim berý mazmunyn jetildirý jáne oqý-ádistemelik qamtamasyz etý máselelerine jetekshilik etti.

2025 jylǵy jeltoqsannan bastap osy ýaqytqa deıin Qazaqstan Respýblıkasy Oqý-aǵartý mınıstrliginiń Respýblıkalyq bilim berý mazmunyn saraptaý ǵylymı-praktıkalyq ortalyǵy dırektorynyń orynbasary qyzmetin atqardy.

30-dan astam ǵylymı eńbektiń, 6 oqý quralynyń, bir monografııa men entsıklopedııalyq basylymnyń avtory. Web of Science halyqaralyq derekter bazasynda jarııalanǵan ǵylymı maqalalary bar.

Konkýrstyq komıssııanyń sheshimimen jáne Semeı qalasy ákiminiń ókimimen Erkebulan Tursyn Semeı qalasy ákiminiń apparatynyń basshysy laýazymyna taǵaıyndaldy.

Erkebulan Serikqalıuly 1993 jyly Almaty oblysy Qonaev qalasynda dúnıege kelgen. Bilimi joǵary. 2013 jyly M.Áýezov atyndaǵy pedagogıkalyq kolledjdi «Shet tili» mamandyǵy boıynsha, 2016 jyly Semeı qalasyndaǵy Shákárim atyndaǵy ýnıversıtetti «Shet tili: eki shet tili» mamandyǵy boıynsha támamdaǵan. Sondaı-aq, Shákárim atyndaǵy ýnıversıtette «Menedjment» mamandyǵy boıynsha magıstratýrany aıaqtap, 2022–2025 jyldary L. N. Gýmılev atyndaǵy Eýrazııa ulttyq ýnıversıtetinde doktorantýrada bilim alǵan.

Eńbek jolyn 2012 jyly «Sana» Shyǵys Qazaqstan oblystyq jastar qoǵamdyq birlestiginde tóraǵa orynbasary qyzmetinen bastaǵan. Ár jyldary Semeı qalasynyń Shákárim atyndaǵy ýnıversıtetinde jáne «Qaınar joǵary kolledji» JShS-de oqytýshy, «Qazaqstan jastaryn qoldaý» Shyǵys Qazaqstan oblystyq jastar qoǵamdyq birlestiginiń tóraǵasy, «Sarzhal Agro» JShS-niń dırektory, Abaı oblysy boıynsha Eńbek mobıldiligi ortalyǵynyń dırektory qyzmetterin atqarǵan.

2026 jyldyń sáýir aıynan bastap osy ýaqytqa deıin «Abaı oblysy Semeı qalasy ákiminiń apparaty» memlekettik mekemesiniń uıymdastyrý-ınspektorlyq jumys bóliminde qala ákiminiń bas ınspektory qyzmetin atqardy.

Aqtóbede tórt sottyń sýdıasy taǵaıyndaldy
https://kaz.inform.kz/news/aktobede-tort-sottin-sudyasi-tagayindaldi-8fde30b9
Aqtóbe oblystyq sotyndaǵy jıynda sýdıalar tanystyryldy. Atap aıtqanda Aqtóbe oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń tóraǵasy laýazymyna Erjan Qurmanov, Aqtóbe oblystyq sotynyń sýdıalary laýazymyna Juldyz Bımanova jáne Jeńiskúl Sultanova, Aqtóbe qalasynyń №2 sotynyń sýdıasy laýazymyna Damır Pangereı taǵaıyndaldy. Al Nurgúl Saǵyndyq Qobda aýdandyq sotynyń sýdıasy boldy.

Qostanaı oblystyq sotynda jalpy otyrys ótip, onda sot tóraǵasy Almat Ermanov oblystyń sot júıesine jańadan taǵaıyndalǵan sýdıalardy tanystyrdy.

2026 jylǵy 9 maýsymdaǵy QR Prezıdentiniń Jarlyǵyna sáıkes, Qostanaı oblystyq sotynyń sýdıasy qyzmetine Murat Naımanov taǵaıyndaldy. Ol buǵan deıin mamandandyrylǵan aýdanaralyq ekonomıkalyq sottyń sýdıasy bolǵan. Murat Naımanov Qaraǵandy joǵary ІІM mektebin támamdaǵan jáne sot júıesinde 30 jyldan astam eńbek ótili bar.

Jangeldın aýdandyq sotynyń tóraǵasy laýazymyna Abylaı Qojaqov taǵaıyndaldy. Onyń sot júıesindegi jumys ótili 10 jyldan asady.
Sonymen qatar Memleket basshysynyń Jarlyǵymen zeınetkerlikke shyǵýyna baılanysty Qostanaı qalasynyń mamandandyrylǵan tergeý sotynyń sýdıasy Batyrbek Qudabaev pen Jitiqara aýdandyq sotynyń sýdıasy Baqtybaı Ysmuhambetov qyzmetterinen bosatyldy. Ekeýiniń de sýdıalyq eńbek ótili 20 jyldan asady.

Sondaı-aq otyrys barysynda Qamysty aýdandyq sotynyń jańadan taǵaıyndalǵan sýdıasy Maksım Gagarın ant qabyldady.

Májilis tóraǵasynyń orynbasary Danııa Espaeva «Aq jol» demokratııalyq partııasynyń jańa tóraǵasy bolyp saılandy. 

Onyń kandıdatýrasyn partııanyń burynǵy tóraǵasy Azat Perýashev usyndy.

Daýys berý qorytyndysy boıynsha delegattar Danııa Espaevanyń kandıdatýrasyn qoldady.

Qyzylorda oblystyq sotynyń tóraǵasy Ádilhadı Shyǵambaev Qazaqstan Respýblıkasy Prezıdentiniń 2026 jylǵy 9 maýsymdaǵy №1312 jarlyǵyn sot ujymyna tanystyrdy. 

Jarlyqqa sáıkes Qyzylorda oblystyq sotynyń sýdıalary bolyp Rysdáýlet Shámshıev, Merýert Toǵyzbaeva, Elmıra Ahmetova taǵaıyndaldy. Qyzylorda qalasy №2 sotynyń tóraǵasy bolyp Isaǵalı Tuńǵyshbaev, Jalaǵash aýdandyq sotynyń tóraǵasy bolyp Oljas Ábdýqalyqov taǵaıyndaldy. Sonymen qatar Sanat Serjanov Qyzylorda qalasy №2 sotynyń sýdıasy laýazymyn ıelendi.
Tanystyrý rásiminen keıin jańadan taǵaıyndalǵan sýdıa Sanat Serjanov Qazaqstan sýdıalarynyń antyn qabyldady.