Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM — Osy aptada elimizdiń ortalyq jáne óńirlik deńgeıinde birqatar mańyzdy kadrlyq taǵaıyndaýlar jasaldy. Memlekettik basqarý júıesi men quqyq qorǵaý qurylymdarynda, sondaı-aq jergilikti atqarýshy organdarda jańa basshylar qyzmetke keldi.
Aptanyń alǵashqy kúni Memleket basshysynyń Jarlyǵymen Jaslan Mádıev Qazaqstan Respýblıkasynyń Premer-Mınıstriniń orynbasary — Jasandy ıntellekt jáne tsıfrlyq damý mınıstri bolyp taǵaıyndaldy.
Aıta keteıik, Jaslan Hasenuly eńbek jolyn 2007 jyly London qalasyndaǵy «Morgan Stanley» ınvestıtsııalyq bankinde baǵaly qaǵazdar jáne oblıgatsııalar saýdasy departamentiniń jetekshi treıderi retinde bastaǵan. Keıin QR Prezıdenti Ákimshiliginiń Strategııalyq ázirlemeler jáne taldaý ortalyǵynda sarapshy, «Samuryq-Qazyna» Ulttyq ál-aýqat qory» AQ Qazynashylyq departamentiniń dırektory qyzmetterin atqardy.
Sonymen qatar «Kazyna Capital Management» AQ men «Qazaqstannyń damý banki» AQ basqarma tóraǵasynyń orynbasary boldy.
Ulttyq bankte Monetarlyq operatsııalar jáne aktıvterdi basqarý jónindegi dırektordyń orynbasary, Premer-Mınıstrdiń keńesshisi qyzmetterin atqardy.
2020–2022 jyldary Strategııalyq josparlaý jáne reformalar agenttigi tóraǵasynyń orynbasary, 2022 jyly Tsıfrlyq damý, ınnovatsııalar jáne aeroǵarysh ónerkásibi mınıstrliginiń birinshi vıtse-mınıstri boldy.
2022–2024 jyldary Binance Kazakhstan bas menedjeri qyzmetin atqardy.
2024 jylǵy 6 mamyrda Tsıfrlyq damý, ınnovatsııalar jáne aeroǵarysh ónerkásibi mınıstri bolyp taǵaıyndalǵan edi.
Sonymen qatar Memleket basshysynyń Jarlyǵymen Juldyz Súleımenova Qazaqstan Respýblıkasynyń Oqý-aǵartý mınıstri laýazymyna taǵaıyndaldy.
Juldyz Súleımenova eńbek jolyn 2004 jyly Almaty Ekonomıka jáne statıstıka akademııasynyń Aqtóbe ınstıtýtynda oqytýshy bolyp bastap, Jastarmen is jónindegi komıtetiniń tóraıymy qyzmetin atqardy.
2006 jyly «Nur Otan» partııasynyń Aqtóbe oblystyq fılıalynda konsýltant, keıin «Jas Otan» jastar qanaty respýblıkalyq keńesi tóraǵasynyń orynbasary boldy.
2007–2008 jyldary Almaty qalasyndaǵy Y. Altynsarın atyndaǵy № 159 gımnazııada tarıh jáne quqyq pániniń muǵalimi bolyp eńbek etti.
2008–2011 jyldary Ál-Farabı atyndaǵy Qazaq ulttyq ýnıversıtetinde jetekshi maman, prorektordyń orynbasary jáne Jastar ákimshiliginiń tóraǵasy boldy.
2011–2012 jyldary Qazaq memlekettik qyzdar pedagogıkalyq ýnıversıtetinde ǵylymı hatshy qyzmetin atqardy.
2012–2019 jyldary Nazarbaev Zııatkerlik mektepterin damytý departamentinde aǵa menedjer, dırektordyń orynbasary jáne dırektor laýazymdarynda jumys istedi.
2019–2021 jyldary Almaty qalasyndaǵy fızıka-matematıka baǵytyndaǵy Nazarbaev Zııatkerlik mektebin basqardy.
2021–2023 jyldary VII saılanǵan Májilis depýtaty, áleýmettik-mádenı damý komıtetiniń múshesi boldy.
2023 jyldan bastap VIII saılanǵan Májilis depýtaty retinde qyzmetin jalǵastyrdy.
Memleket basshysynyń ókimimen Jandos Ómirálıev Qazaqstan Respýblıkasynyń Bas prokýrorynyń birinshi orynbasary bolyp taǵaıyndaldy.
Jandos Jánibekuly 1978 jyly týǵan. 2000 jyly aýdan prokýrorynyń kómekshisi bolyp eńbek jolyn bastaǵan.
2010–2011 jyldary Bas prokýrordyń erekshe tapsyrmalar jónindegi aǵa kómekshisi ári zańdylyqty, quqyqtyq tártipti qamtamasyz etý jáne qylmysqa qarsy kúres jónindegi úılestirý keńesiniń hatshysy boldy.
2011–2017 jyldary Almaty qalasy prokýrorynyń orynbasary, 2017–2018 jyldary Bas prokýratýranyń kadrlardy damytý basqarmasynyń bastyǵy qyzmetin atqardy.
2018–2022 jyldary Batys Qazaqstan oblysynyń prokýrory, 2022 jylǵy 8 maýsymnan bastap Bas prokýrordyń orynbasary boldy.
Osy aptadaǵy sheshimmen ol Bas prokýrordyń birinshi orynbasary laýazymyna bekitildi.
Sonymen qatar Prezıdenttiń kelisimimen prokýratýra júıesinde de birqatar óńirlik taǵaıyndaýlar júzege asty.
Batys Qazaqstan oblysynyń prokýrory bolyp aǵa ádilet keńesshisi Nurbek Ulasbekuly, al Mańǵystaý oblysynyń prokýrory bolyp aǵa ádilet keńesshisi Serikqalı Qushalıev taǵaıyndaldy.
Sonymen qatar birqatar prokýrorlar rotatsııa tártibimen jańa qyzmetterge keldi.
Atap aıtqanda, QR Bas prokýratýrasy janyndaǵy Quqyq qorǵaý organdary akademııasynyń rektory — Nurǵalym Ábdirov, Bas kólik prokýrory — Berik Júıriktaev,
Atyraý oblysynyń prokýrory — Madııar Basshybaev, Jambyl oblysynyń prokýrory — Berik Ábilov,
Jetisý oblysynyń prokýrory — Baýyrjan Jumaqanov, Qostanaı oblysynyń prokýrory — Marat Seksembaev,
Pavlodar oblysynyń prokýrory — Almat Baısholaqov, Shyǵys Qazaqstan oblysynyń prokýrory — Tımýr Súleımenov bolyp bekitildi.
Memleket basshysynyń ókimimen Ernar Lazar Prezıdenttiń halyqaralyq máseleler jónindegi keńesshisi bolyp taǵaıyndaldy.
Energetıka salasynda da jańa kadrlyq taǵaıyndaý jasaldy. Qaıyrhan Tutqyshbaev Qazaqstan Respýblıkasynyń Energetıka vıtse-mınıstri qyzmetine keldi.
1991 jyly Almaty qalasynda dúnıege kelgen. 2009 jyly eńbek jolyn «Ortalyq Azııa taý-ken odaǵy» qoǵamdyq birlestiginde bastaǵan.
2011–2014 jyldary «Degdar Engineering» JShS-de taý-ken jumysy men jabdyǵyn jobalaý bóliminiń ınjeneri boldy.
Ár jyldary Energetıka mınıstrliginiń Jer qoınaýyn paıdalaný departamentinde bas sarapshy, basqarma basshysy jáne dırektor qyzmetterin atqardy.
2022–2023 jyldary Ekologııa, geologııa jáne tabıǵı resýrstar mınıstrligi Geologııa komıteti tóraǵasynyń orynbasary, 2023–2024 jyldary Ónerkásip jáne qurylys mınıstrligi Geologııa komıteti tóraǵasynyń orynbasary boldy.
2024 jyly «Qazatomónerkásip» ulttyq kompanııasynda sırek jáne sırek kezdesetin metaldardy geologııalyq barlaý jáne damytý jónindegi basqarýshy dırektor qyzmetin atqardy.
Sońǵy ýaqytta «Graphite Minerals» JShS bas dırektory bolǵan.
Almaty qalasy ákiminiń orynbasary qyzmetine Ábdirahym Nurlan Erǵalıuly taǵaıyndaldy. Ol áleýmettik sala, halyqty jumyspen qamtý jáne densaýlyq saqtaý baǵyttaryna jetekshilik etedi.
1980 jyly týǵan. «Qaınar» ýnıversıtetin jáne Prezıdent janyndaǵy Memlekettik basqarý akademııasyn bitirgen.
2001 jyly eńbek jolyn «Astanaenergoservıs» aktsıonerlik qoǵamynda abonenttik ýchaskeniń baqylaýshysy bolyp bastaǵan. Keıin Ádilet mınıstrliginde túrli laýazymdarda jumys istep, Zııatkerlik menshik komıtetiniń tóraǵasy boldy.
Prezıdent Ákimshiliginde memlekettik ınspektor jáne bólim meńgerýshisiniń orynbasary qyzmetterin atqardy.
2023 jyldyń sáýirinen bastap Almaty oblysy ákiminiń birinshi orynbasary bolǵan.
Sultanǵalı Kenjequlov «KAZAKH INVEST» UK» AQ basqarma tóraǵasy bolyp taǵaıyndaldy.
Sultanǵalı Kenjequlov 1982 jyly Almaty qalasynda dúnıege kelgen. Qazaq quqyqtaný jáne halyqaralyq qatynastar ınstıtýtyn, RF SІM Dıplomatııalyq akademııasyn támamdaǵan. Halyqaralyq qatynastar salasynyń mamany.
Eńbek jolyn 2003 jyly Qazaqstan Respýblıkasy Syrtqy ister mınıstrligi Konsýldyq qyzmet departamentiniń mamany bolyp bastaǵan.
2006–2016 jyldary — QR Syrtqy ister mınıstrligi Konsýldyq qyzmet departamentiniń attashesi, QR Qytaı Halyq Respýblıkasyndaǵy Elshiliginiń attashesi, úshinshi, ekinshi, birinshi hatshysy, QR SІM Azııa jáne Afrıka departamentiniń ekinshi hatshysy.
2016–2017 jyldary — QR Investıtsııalar jáne damý mınıstriniń ınvestıtsııa jónindegi arnaýly keńesshisi.
2017–2019 jyldary — «KAZAKH INVEST» UK» AQ Qytaı Halyq Respýblıkasyndaǵy ókili.
2019–2023 jyldary — QR SІM Azııa jáne Afrıka departamentiniń basqarma basshysy, QR Qytaı Halyq Respýblıkasyndaǵy Elshiliginiń saýda-ekonomıkalyq jáne ınvestıtsııalyq máseleler boıynsha keńesshisi.
2023 jyldan osy ýaqytqa deıin QR SІM Investıtsııa komıteti tóraǵasynyń orynbasary qyzmetin atqardy.
Abaı oblysy ákiminiń orynbasary bolyp Dýman Ospanov taǵaıyndaldy.
1979 jyly Abaı oblysy Maqanshy aýylynda týǵan.
2000 jyly Shákárim atyndaǵy memlekettik ýnıversıtetti «Qarjyger-ekonomıst» mamandyǵy boıynsha, 2006 jyly Qazaq quqyqtaný jáne halyqaralyq qatynastar ınstıtýtyn «Zańger» mamandyǵy boıynsha támamdaǵan.
Eńbek jolyn 2001 jyly «Naýryz bank Qazaqstan» aktsıonerlik qoǵamynda bastaǵan. Keıin bank jáne qarjy sektorynda, sonyń ishinde «Astana-Fınans» AQ, «Aýyl sharýashylyǵyn qarjylaı qoldaý qory» AQ jáne «Agrarlyq nesıe korporatsııasy» AQ qurylymdarynda qyzmet atqarǵan.
2022 jyldan beri «QazAgroFınans» AQ basqarýshy dırektory boldy.
Almaty qalasyn damytý ortalyǵynyń basshysy bolyp Rýslan Berdenov taǵaıyndaldy.
Ol 2023 jyldyń naýryzynan 2025 jyldyń aqpanyna deıin Parlament Májilisiniń VIII shaqyrylym depýtaty, Qarjy jáne bıýdjet komıtetiniń múshesi qyzmetin atqardy.
Bıyl aqpan-tamyz aılary aralyǵynda Shymkent qalasy ákiminiń orynbasary boldy.
Qyzylorda oblysy Qazaly aýdanynda ákim saılaýy ótti. Saılaý qorytyndysy boıynsha Almasbek Esmahanov aýdan ákimi bolyp saılandy. Ol 1982 jyly týǵan, Qyzylorda oblysy Qyzylorda qalasynda turady.
Aıta keteıik, ótken aptada da birqatar mańyzdy saıası kadrlyq aýys-túıister oryn alǵan bolatyn. Atalǵan ózgeristerge oraı Qazaqstan Respýblıkasy Prezıdentiniń kómekshisi — Prezıdenttiń baspasóz hatshysy Rýslan Jeldibaı sońǵy kadrlyq taǵaıyndaýlarǵa qatysty túsinikteme bergen edi.