Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM — Osy aptada elimizdiń memlekettik basqarý júıesinde, jergilikti atqarý organdarynda jáne sport salasynda birqatar mańyzdy kadrlyq aýys-túıis boldy.
Apta basynda QR Prezıdentiniń keńesshisi — Strategııalyq josparlaý jáne reformalar agenttiginiń tóraǵasy laýazymyna Áset Erǵalıev taǵaıyndaldy.
Úkimet qaýlysymen QR jasandy ıntellekt jáne tsıfrlyq damý vıtse-mınıstri qyzmetine Bahtııar Muhametqalıev taǵaıyndaldy.
Bahtııar Abaıuly Muhametqalıev 1990 jyly 1 shildede Almaty oblysy Bostandyq aýdanynda dúnıege kelgen. T. Rysqulov atyndaǵy Qazaq ekonomıkalyq ýnıversıtetin jáne S. Seıfýllın atyndaǵy Qazaq agrotehnıkalyq ýnıversıtetin bitirgen. Eńbek jolyn 2010 jyly Almaty qalasynda «Qazposhta» AQ-da bas maman bolyp bastaǵan.
2010–2020 jyldar aralyǵynda «Qazposhta» AQ-da bas mamannan AT-ınfraqurylym jónindegi atqarýshy dırektor jáne E-commerce departamentiniń dırektoryna deıin túrli qyzmetter atqarǵan.
2021–2022 jj. — «Azamattarǵa arnalǵan úkimet» Memlekettik korporatsııasy» KeAQ basqarýshy dırektory.
2022–2023 jj. — QR Premer-mınıstriniń Keńsesiniń Baqylaý jáne qujattamalyq qamtamasyz etý bóliminiń meńgerýshisi.
2023–2025 jj. — QR Úkimeti Apparatynyń Baqylaý jáne qujattamalyq qamtamasyz etý bóliminiń meńgerýshisi.
2025 jyldyń mamyr aıynan qazirgi kúnge deıin — Jasandy ıntellekt jáne tsıfrlyq damý mınıstrliginiń «Tsıfrlyq úkimetti qoldaý ortalyǵy» ShJQ RMK bas dırektory bolǵan.
Kásipker Raıymbek Batalov Qazaqstan Prezıdentiniń kásipkerlikti damytý máseleleri boıynsha shtattan tys keńesshisi bolyp taǵaıyndaldy.
Raıymbek Batalov 1970 jylǵy 21 qarashada Almaty qalasynda dúnıege kelgen. Qazaq sáýlet-qurylys akademııasyn «ınjener-qurylysshy» mamandyǵy boıynsha támamdaǵan. 1990 jyldardyń basynan bastap ekonomıka sektorynda eńbek etti. Ár jyldary metallýrgııa, hımııa ónerkásibi, energetıka jáne agroónerkásip salalarynda basshylyq qyzmetter atqardy.
Atap aıtqanda, «Rıdder Invest» metallýrgııalyq keshenin, Jańa Jambyl fosfor zaýytyn, Tobyl elevatoryn, Merki qant zaýytyn, Shymkent JEO-3 nysanyn basqarǵan.
1992 jyly «Raıymbek» saýda fırmasyn quryp, keıin ol Raimbek Group atty kópsalaly holdıngke aınaldy.
Ol jyldar boıy eldegi iskerlik kún tártibin qalyptastyrýǵa belsendi aralasty:
2002 jyldan — Qazaqstan kásipkerleri forýmynyń keńes tóraǵasy
2005 jyldan — ShYU Іskerlik keńesiniń qazaqstandyq bóliginiń jetekshisi
2007 jyldan — Májilis janyndaǵy Qoǵamdyq palata múshesi
2009 jyldan — Sý asty sporty federatsııasynyń prezıdenti
2010 jyldan — Premer-mınıstr janyndaǵy úılestirý keńesiniń múshesi
2012 jyldan — EEK konsýltatıvtik komıtetiniń táýelsiz sarapshysy
2015 jyldan — ENACTUS Kazakhstan dırektorlar keńesiniń tóraǵasy
2017 jyly — Azııa velosport konfederatsııasynyń vıtse-prezıdenti bolyp saılandy
2022 jylǵy aqpannan 2026 jylǵy qańtarǵa deıin Qazaqstan ulttyq kásipkerler palatasy prezıdıýmynyń múshesi, «Atameken» QR UKP prezıdıýmynyń tóraǵasy mindetin atqarǵan, sondaı-aq Qazaqstan ulttyq kásipkerler palatasy «Atameken» prezıdıýmynyń tóraǵasy bolǵan.
Prezıdenttik jastar kadr rezerviniń múshesi Aıqoja Ábsadyqov QR Oqý-aǵartý mınıstrliginiń Investıtsııalyq saıasat jáne ınfraqurylymdyq damý departamentiniń dırektory bolyp taǵaıyndaldy.
Aıqoja Ábsadyqov 2025 jylǵy Prezıdenttik jastar kadr rezervine «Infraqurylymdy damytý, ónerkásip jáne saýda saıasaty» baǵyty boıynsha qabyldanǵan. Ol 1993 jylǵy 6 sáýirde Túrkistan qalasynda dúnıege kelgen. Nazarbayev University (ekonomıka bakalavry, memlekettik basqarý magıstri) túlegi. Qazaq, orys, aǵylshyn, túrik tilderin meńgergen.
Eńbek jolyn 2015 jyly Qazaqstan Respýblıkasy Ulttyq kásipkerler palatasy «Atamekende» Ekonomıkalyq ıntegratsııa departamentiniń sarapshysy, Basqarma tóraǵasynyń keńesshisi, Ónerkásip jáne básekege qabilettilik departamentiniń sarapshysy retinde bastaǵan.
2018 jyldan bastap — «Qazaqstan ındýstrııany damytý ınstıtýty» AQ Derekterdi taldaý jáne óńdeý ortalyǵynyń dırektory.
2019 jyldan bastap — Qazaqstan Respýblıkasy Ulttyq kásipkerler palatasy «Atameken» Kásipkerlik máseleleri jónindegi jobalyq ofısiniń aǵa menedjeri.
2022 jyldan bastap — «Samuryq-Qazyna Kontrakt» JShS Satyp alýlardy jınaqtap taldaý jáne kásipkerlikti damytý departamentiniń bas menedjeri.
2023 jyldan bastap — «Qazaqtelekom» AQ fılıaly Korporatıvtik bıznes dıvızıonynyń Ádisnama jáne protsester departamentiniń dırektory, Jobalardy damytý departamentiniń dırektory.
2024 jyldan bastap — «Samuryq-Qazyna Kontrakt» JShS Satyp alýlardy jınaqtap taldaý jáne kásipkerlikti damytý departamentiniń sarapshysy, bas menedjeri.
2026 jylǵy 2 aqpannan bastap — Qazaqstan Respýblıkasy Oqý-aǵartý mınıstrliginiń Investıtsııalyq saıasat jáne ınfraqurylymdyq damý departamentiniń dırektory.
QR Bas prokýrorynyń orynbasary laýazymyna Erlan Ótegenov taǵaıyndaldy.
Erlan Ótegenov 1976 jyly týǵan, bilimi joǵary, Qazaq memlekettik zań ýnıversıtetin aıaqtaǵan. Eńbek jolyn 1998 jyly Almaty oblysy Qapshaǵaı qalasy prokýrorynyń kómekshisi laýazymynan bastaǵan. Prokýratýra organdarynda birqatar basshylyq laýazymdar atqarǵan.
Atap aıtqanda Aqmola oblysy Tselınograd jáne Egindikól aýdandarynyń prokýrory, Almaty oblysy Talǵar aýdanynyń prokýrory, Bas prokýratýranyń Quqyqtyq statıstıka jáne arnaıy esepke alý jónindegi komıtetiniń Almaty qalasy boıynsha basqarmasynyń bastyǵy, Bas Prokýror Apparatyndaǵy Bas Prokýrordyń aǵa kómekshisi, Nur-Sultan qalasy prokýrorynyń orynbasary bolǵan.
2022 jylǵy mamyrdan Astana qalasynyń prokýrory bolyp qyzmet etedi. Qyzmettik mindetterin minsiz atqarǵany úshin II dárejeli «Aıbyn» ordenimen nagradtalǵan.
Al Nurdáýlet Súıindikov Bas prokýratýranyń Aktıvterdi qaıtarý jónindegi qyzmetiniń bastyǵy laýazymyna taǵaıyndaldy.
Nurdáýlet Myqtybekuly eńbek jolyn Ońtústik Qazaqstan oblysy Arys aýdany prokýrorynyń aǵa kómekshisi retinde bastaǵan. Ár jyldary Bas prokýratýranyń bólim bastyǵy, Bas prokýrordyń asa mańyzdy tapsyrmalar jónindegi aǵa kómekshisi, Departament bastyǵynyń orynbasary — Bas prokýratýranyń resmı ókili, Astana qalasy Saryarqa aýdanynyń prokýrory, Aqtóbe oblysy prokýrorynyń birinshi orynbasary, Startegııalyq damý departamentiniń bastyǵy, Halyqaralyq-quqyqtyq yntymaqtastyq qyzmetiniń bastyǵy boldy.
Keıingi eki jyl Aktıvterdi qaıtarý komıtetiniń tóraǵasy laýazymynda qyzmet istedi. Qyzmettegi joǵary jetistikteri úshin Baýyrjan Momyshuly atyndaǵy ІІ dárejeli «Aıbyn» ordenimen nagradtalǵan.
Sondaı-aq bul aptada belgili sportshy Serik Sápıev Týrızm jáne sport mınıstriniń shtattan tys keńesshisi — jazǵy XX Azııa oıyndaryna daıyndyq shtabynyń sporttyq blogynyń úılestirýshisi bolyp taǵaıyndaldy.
Serik Sápıev — bokstan London Olımpıadasynyń chempıony, 2010 jyly Gýanchjoý qalasynda ótken jazǵy Azııa oıyndarynyń jeńimpazy. Buǵan deıin QR Parlamenti Májilisiniń depýtaty, QR Mádenıet jáne sport mınıstrliginiń Sport jáne dene shynyqtyrý isteri komıtetiniń tóraǵasy, óńirlik basqarma basshysy qyzmetterin atqarǵan. Qazirgi tańda ol Qazaqstan Respýblıkasynyń Ulttyq sýrdlımpıadalyq komıtetiniń prezıdenti.
Shtab quramyna Týrızm jáne sport mınıstrliginiń ókilderi, ulttyq sport federatsııalarynyń jetekshileri jáne sport salasynyń ardagerleri endi. Olar daıyndyqtyń árbir kezeńin pysyqtap, qoıylǵan mindetterdiń ýaqtyly ári sapaly oryndalýyn qamtamasyz etedi.
Aıta keteıik, bıylǵy jazǵy Azııa oıyndary 19 qyrkúıek pen 4 qazan aralyǵynda Japonııanyń Aıchı jáne Nagoıa qalalarynda ótedi. Azıada-2026 baǵdarlamasyna 41 sport túri engen. Jalpy 68 baǵdarlama boıynsha 460 júlde jıyntyǵy sarapqa salynady. Onyń 217-si erler arasynda, 204-i áıelder arasynda, al 39-y aralas sanatta oınatylady. Baǵdarlamaǵa olımpıadalyq, olımpıadalyq emes jáne dástúrli azııalyq sport túrleri engen.
Sporttyq taǵaıyndaý boıynsha Ústel tennısinen Qazaqstan ulttyq quramasy bas bapkeri qyzmetine Áset Saǵymbaev taǵaıyndaldy.
https://kaz.inform.kz/news/ustel-tennisnen-kazakstan-kuramasinin-bas-bapker-tagayindaldi-70d4f2/
Áset Saǵymbaev Taıland, Úndistanda ótken jastar arasyndaǵy Azııa chempıonaty, Germanııa men Japonııada bolǵan álem chempıonatynda baq synaǵan. Sporttyq mansabynda ol Qazaqstan chempıonaty, respýblıkalyq spartakıada, halyqaralyq týrnırlerde medal jeńip aldy.
Qazirge deıin tájirıbeli maman Aqtóbe oblysy qurama komandasynyń aǵa bapkeri qyzmetin atqardy.
Aldaǵy ýaqytta el quramasyn kóptegen halyqaralyq jáne respýblıkalyq jarystar kútip tur.
Anglııa astanasy London qalasynda 28 sáýir men 10 mamyr aralyǵynda ótetin ústel tennısinen komandalyq álem chempıonatynda qazaqstandyq sportshylardyń qarsylastary anyqtaldy. Bul Halyqaralyq ústel tennısi federatsııasy (ITTF) jáne álem chempıonatynyń 100 jyldyǵyn tarıhı merekeleýdiń bastalýyna tuspa-tus kelip otyr.
Elimizdiń erler quramasy 11 topta Mysyr, Taıland, Túrkııamen synǵa tússe, áıelder quramasy 5 topta Brazılııa, Chehııa, Mońǵolııamen kezdesedi.
Týrnırde jerebe nátıjesi boıynsha qazaqstandyqtardyń qarsylastary anyqtaldy. Erler arasynda elimizdiń quramasy 11 topta Mysyr, Taıland, Túrkııamen synǵa tússe, elimizdiń áıelder quramasy 5 topta Brazılııa, Chehııa, Mońǵolııamen kezdesedi.
Erkin kúresten Qazaqstan 20 jasqa deıingi jastar quramasynyń aǵa bapkeri qyzmetine Dáýlet Nııazbekov taǵaıyndaldy.
Dáýlet Shorauly — erkin kúresten Qazaqstan Respýblıkasynyń eńbek sińirgen sport sheberi, halyqaralyq dárejedegi tájirıbeli sportshy. Ol uzaq jyldar boıy el namysyn abyroımen qorǵap, Olımpıada oıyndaryna (London-2012, Tokıo-2020) qatysqan. Álem chempıonatynyń kúmis jáne qola júldegeri, Azııa chempıony.
Dáýlet Nııazbekov bozkilemde balýandyqpen qatar bapkerlikti alyp júrgen edi. Bapkerlik qyzmette 13 jyldan astam tájirıbe jınaqtaǵan maman ár jyldary balalar-jasóspirimder sport mektepterinde, ulttyq quramada, kúres túrleri boıynsha olımpıadalyq daıarlaý ortalyǵynda jumys atqarǵan.
Óńirler boıynsha, Almaty qalasynyń Túrksib aýdanynyń ákimi qyzmetine Damır Ákejanov taǵaıyndaldy. Buǵan deıin ol Almaty qalasy ákimi apparaty basshysynyń orynbasary laýazymyn atqarǵan.
Damır Ákejanov 2002 jyly ál-Farabı atyndaǵy qazaq ulttyq ýnıversıtetin «halyqaralyq quqyq» mamandyǵy, al 2008 jyly «qarjy» mamandyǵy boıynsha támamdaǵan.
Eńbek jolyn 2002 jyly syrtqy ekonomıkalyq baılanystar salasynda bastaǵan. Ár jyldary Almaty ákimdiginiń qurylymdarynda, sonyń ishinde kásipkerlik, ónerkásip jáne ınvestıtsııa máselesine jetekshilik etetin departamentter men basqarmalarda, sondaı-aq aýdan ákimderiniń apparattarynda jumys istegen. Basshylyq qyzmetter atqaryp, Jetisý aýdany ákiminiń orynbasary bolǵan.
Jańa qyzmetke taǵaıyndalǵanǵa deıin Almaty ákimi apparaty basshysynyń orynbasary laýazymyn atqarǵan. Memlekettik qyzmettegi jalpy eńbek ótili 16 jyldan asady.
Petropavl qalalyq polıtsııa basqarmasyn polıtsııa podpolkovnıgi Serik Áljanov basqarady.
Serik Áljanovtyń ishki ister organdarynda 23 jyldyq eńbek ótili bar. Ol QR Іshki ister mınıstrligi akademııasynyń Zań ınstıtýtynyń túlegi. Qyzmet jolyn tergeýshi retinde bastap, jedel ýákil bolyp jumys istegen. 2013 jyldan bastap basshylyq laýazymdarda qyzmet atqardy. 2021 jyldyń qyrkúıek aıynan bastap osy ýaqytqa deıin Soltústik Qazaqstan oblysy polıtsııa departamentiniń ákimshilik polıtsııa basqarmasyn basqardy.
Shymkent qalalyq Polıtsııa departamentiniń bastyǵy bolyp Qojaev Muhtar Jumabaıuly taǵaıyndaldy.
Muhtar Qojaev 1977 jyly týǵan. Polıtsııa general-maıory. 1999 jyly Qazaqstan Respýblıkasy ІІM Almaty zań ınstıtýtyn bitirgen. 1999 jyly Mańǵystaý oblysy Іshki ister bas basqarmasynyń Aqtaý qalalyq ishki ister basqarmasyna tergeýshi bolyp taǵaıyndaldy.
2001 jyldan bastap Mańǵystaý oblysy Aqtaý qalalyq ishki ister basqarmasynda anyqtaý jáne tergeý basqarmalarynyń basshysy laýazymyn ıelendi.
2010 jyldan bastap Mańǵystaý oblysy Іshki ister departamentiniń aýdandyq polıtsııa bólimderi men basqarmalarynyń bastyǵy boldy.
2012 jyly — Qazaqstan Respýblıkasy ІІM Tergeý komıteti Aımaqtyq baqylaý jáne aldyn ala tergeýdi uıymdastyrý basqarmasy bastyǵynyń orynbasary.
2017 jyly Qazaqstan Respýblıkasy ІІM Tergeý departamenti Aldyn ala tergeýdi aımaqtyq baqylaý basqarmasynyń bastyǵy.
2018 jyly Qostanaı oblysy Polıtsııa departamenti bastyǵynyń tergeý jónindegi orynbasary bolyp taǵaıyndaldy.
2018 jylǵy jeltoqsannan bastap Qazaqstan Respýblıkasy Tergeý departamenti bastyǵynyń orynbasary.
2023 jylǵy jeltoqsanynan bastap Qazaqstan Respýblıkasy Tergeý departamenti bastyǵy.
ІІ dárejeli «Aıbyn» ordenimen nagradtalǵan.
Qorqyt ata atyndaǵy Qyzylorda ýnıversıtetiniń rektory bolyp Naýryzbaı Baıqadamov taǵaıyndalǵany belgili boldy.
Ol 1967 jyly Qyzylorda oblysynda dúnıege kelgen. 1991 jyly N.Gogol atyndaǵy Qyzylorda pedagogıkalyq ınstıtýtyn tarıh jáne frantsýz tili mamandyǵy boıynsha bitirgen. Tarıh ǵylymdarynyń kandıdaty, dotsent.
Eńbek jolyn 1991 jyly Qyzylorda oblysy Syrdarııa aýdanyndaǵy № 139 mekteptiń muǵalimi bolyp bastaǵan. Ár jyldary Qorqyt ata atyndaǵy Qyzylorda memlekettik ýnıversıtetiniń memleket, quqyq teorııasy jáne tarıhy kafedrasynyń oqytýshysy, aǵa oqytýshysy, meńgerýshisi, osy ýnıversıtet janyndaǵy kolledj dırektory, «Nur Otan» HDP Qyzylorda oblystyq fılıaly tóraǵasynyń orynbasary boldy.
Sonymen qatar Qorqyt ata atyndaǵy Qyzylorda memlekettik ýnıversıtetiniń tárbıe jumystary jónindegi prorektory, Qyzylorda oblystyq bilim basqarmasynyń basshysy, «Nur Otan» partııasy Qyzylorda oblystyq fılıaly tóraǵasynyń birinshi orynbasary Qyzylorda oblystyq máslıhatynyń hatshysy, Qyzylorda oblysy ákiminiń orynbasary qyzmetterin atqardy. Qyzylorda oblystyq máslıhatynyń hatshysy boldy.
«AMANAT» partııasynyń Qyzylorda oblystyq fılıalyna, Qyzylorda oblystyq máslıhatyna jetekshilik jasady. 2024 jyldan bastap búginge deıin Parlament Senatynyń depýtaty boldy.