Qazaqstanda apta ishinde bolǵan kadrlyq taǵaıyndaýlar

ASTANA. KAZINFORM – Osy aptada elimizdiń memlekettik basqarý júıesinde, jergilikti atqarý organdarynda jáne sport salasynda birqatar mańyzdy kadrlyq aýys-túıis boldy. Kazinform 30 naýryz ben 5 sáýir aralyǵyndaǵy mańyzdy taǵaıyndaýlarǵa sholý usynady.

Bul aptada Memleket basshysy Qasym-Jomart Toqaevtyń ókimderimen Qarýly Kúshterde birqatar kadrlyq taǵaıyndaýlar júrgizildi.

Mahsýt Kýrmanalıevıch Gýseınov Qazaqstan Respýblıkasy Qarýly Kúshteriniń Desanttyq-shabýyldaý áskerleriniń qolbasshysy bolyp taǵaıyndaldy. Osyǵan deıin atqarǵan laýazymynan bosatyldy.

Sondaı-aq Baǵlan Ábdijáleluly Óserbaev «Astana» óńirlik qolbasshylyǵy áskerleriniń qolbasshysy laýazymyna taǵaıyndaldy.

Budan bólek, Meıirjan Baıǵonysov Prezıdent Ákimshiligi ınvestıtsııa bóliminiń meńgerýshisi boldy.

QR Eńbek jáne halyqty áleýmettik qorǵaý vıtse-mınıstri bolyp Baqtııar Bazarbaıuly Jazyqpaev taǵaıyndaldy.

B. Jazyqpaev 1988 jyly Astana qalasynda dúnıege kelgen. Shymkent ýnıversıtetin bitirgen. Eńbek jolyn 2007 jyly Statıstıka agenttiginiń «Aqparattyq esepteý ortalyǵy» RMK mamany bolyp bastaǵan. 2010 jyldan 2014 jylǵa deıin jeke qurylymdarda jumys istegen. 2014–2018 jyldary Eńbek jáne halyqty áleýmettik qorǵaý mınıstrliginiń qurylymynda bólim bastyǵynan basqarma basshysyna deıin ártúrli laýazymdarda qyzmet atqarǵan.

2018–2023 jyldary – Eńbek jáne halyqty áleýmettik qorǵaý mınıstrligi «Eńbek resýrstaryn damytý ortalyǵy» AQ» Derekterdi taldaý jáne óńdeý departamentiniń dırektory; 2023–2024 jyldary – Eńbek jáne halyqty áleýmettik qorǵaý mınıstrligi «Eńbek resýrstaryn damytý ortalyǵy» AQ Strategııa jáne iri derekterdi taldaý departamentiniń dırektory; 2024–2025 jyldary – Eńbek jáne halyqty áleýmettik qorǵaý mınıstrligi «Eńbek resýrstaryn damytý ortalyǵy» AQ basqarýshy dırektory bolǵan.

2025 jylǵy aqpannan bastap qazirgi ýaqytqa deıin Eńbek jáne halyqty áleýmettik qorǵaý mınıstrligi «Eńbek resýrstaryn damytý ortalyǵy» AQ vıtse-prezıdenti.

Sonymen birge, Ibrahım Janlyel Air Astana tobynyń bas atqarýshy dırektory (CEO) qyzmetine resmı túrde kiristi.

Kompanııa málimetinshe, Ibrahım Janlyel áýekompanııada uzaq jyldar boıy eńbek etken tájirıbeli basqarýshy. Ol 2017 jyldan beri qarjy jónindegi dırektor qyzmetin atqaryp keldi. Buǵan deıingi 14 jyl ishinde kompanııanyń strategııalyq jáne qarjylyq damýyna eleýli úles qosqan basqarýshylar quramynda boldy.

Sondaı-aq 2024 jyly Air Astana tobynyń úsh qor bırjasynda tirkelýine qatysyp, kompanııanyń halyqaralyq naryqqa shyǵýyna úles qosty.

Jańa qyzmetinde Ibrahım Janlyel operatsııalyq ornyqtylyqty nyǵaıtýǵa, turaqty ósimdi qamtamasyz etýge jáne Air Astana men FlyArystan aıasyndaǵy eki brendti damytý strategııasyn ilgeriletýge basymdyq bermek.

Óńirler boıynsha, Abaı oblysy Besqaraǵaı aýdanynyń ákimi bolyp Dildar Qalıhan saılandy.

Dildar Qalıhan 1985 jyly 17 qyrkúıekte Shyǵys qazaqstan oblysy Katonqaraǵaı aýdany Korobıha aýylynda dúnıege kelgen. 2009 jyly Almaty Ekonomıka jáne statıstıka akademııasyn «menedjment» mamandyǵy boıynsha bitirgen.

Eńbek jolyn 2005 jyly «Damır» sharýa qojalyǵynyń basshysy qyzmetinde bastaǵan. 2007-2012 jyldary «Úshbulaq» JShS dırektory bolyp jumys istedi. 2012 jyldan bastap ShQO ishki saıasat basqarmasynyń aqparattyq saıasat jáne BAQ monıtorıngi bóliminiń bas mamany, keıin ShQO ákimi apparatynyń uıymdastyrý-ınspektorlyq bóliminiń bas ınspektory qyzmetin atqardy. 2014-2017 jyldary aralyǵynda Zaısan jáne Katonqaraǵaı aýdandary ákimderiniń orynbasary laýazymynda eńbek etti. Shyǵys Qazaqstan oblysy Katonqaraǵaı aýdanynyń ákimi, Abaı oblysy ákiminiń keńesshisi qyzmetterin atqarǵan. Osyǵan deıin Besqaraǵaı aýdany ákiminiń orynbasary bolyp jumys istedi.

Al Shyǵys Qazaqstan oblysy Din isteri basqarmasynyń basshysy bolyp Erbolat Oshaqbaev taǵaıyndaldy.

Erbolat Qumarqanuly 1976 jyly Shyǵys Qazaqstan oblysy Marqakól aýdanynda týǵan. Eki joǵarǵy bilimi bar. Eńbek jolyn 1996 jyly bilim jáne mádenıet salasynda bastaǵan. 2008-2012 jyldary ShQO Іshki saıasat departamentinde memlekettik emes uıymdarmen jáne jastarmen jumys bóliminde túrli laýazymdardy atqardy. 2012-2015 jyldary ShQO Jastar saıasaty jónindegi basqarmada jetekshi maman bolyp eńbek etti. 2015-2019 jyldary Óskemen qalalyq ishki saıasat bóliminiń basshysy boldy.

2019 jyly ShQO Jumyspen qamtý jáne áleýmettik baǵdarlamalardy úılestirý basqarmasynyń basshysy bolyp taǵaıyndalǵan. 2024 jyldyń aqpan aıynan osy ýaqytqa deıin Rıdder qalasy ákiminiń orynbasary bolyp jumys istedi.

Almaty oblysynda Balalar quqyqtaryn qorǵaý basqarmasynyń basshysy qyzmetine Dáýlet Shaıtursyn taǵaıyndaldy. Bul basqarma osy jyldyń 11 naýryzynda Memleket basshysynyń balalardy qorǵaý júıesin kúsheıtý jónindegi tapsyrmasyna sáıkes quryldy.

Dáýlet Shaıtursyn 1988 jyly týǵan, bilimi – joǵary. Qorqyt Ata atyndaǵy Qyzylorda memlekettik ýnıversıtetin «Qazaq tili men ádebıeti» mamandyǵy, Turan ýnıversıtetin «Menedjment» mamandyǵy boıynsha bitirgen.

Eńbek jolyn 2008 jyly «QyzylordaOtyn» JShS dırektorynyń kómekshisi bolyp bastaǵan. Ár jyldary «ABK-Qurylys» JShS dırektorynyń birinshi orynbasary, dırektory, Qyzylorda oblystyq fılarmonııasynyń bas ákimshisi, oblys ákimi apparatynyń ınspektory, «Baıqońyr» ÁKK» QB» AQ uıymdastyrý-baqylaý jumysy bóliminiń bastyǵy, Qorqyt Ata atyndaǵy Qyzylorda memlekettik ýnıversıtetiniń mamany, Almaty qalasy ákimi apparatynyń bas mamany, bas ınspektory, Jetisý aýdany ákimi apparatynyń basshysy, aýdan ákiminiń orynbasary qyzmetterin atqarǵan.

Ótken jyldyń naýryzyna deıin Almaty oblysynyń Tilderdi damytý jónindegi basqarma basshysy, oblys ákimi apparaty basshysynyń orynbasary laýazymdarynda, keıin Qazaqstan Respýblıkasy Úkimeti apparatynyń óńirlik ınspektory bolyp eńbek etti.

Sondaı-aq Túrkistan oblysy ákiminiń orynbasary laýazymyna Erkebulan Daýylbaev taǵaıyndaldy.

Erkebulan Daýylbaev 1978 jyly Ońtústik Qazaqstan oblysynda dúnıege kelgen. M.Áýezov atyndaǵy Ońtústik Qazaqstan memlekettik ýnıversıtetin, Reseı keden akademııasyn bitirgen.

Eńbek jolyn 1999 jyly QR Qarjy mınıstrligi Kedendik baqylaý komıtetiniń OQO boıynsha Kedendik baqylaý departamentiniń ınspektory laýazymynan bastady. 2010-2011 jyldary OQO Memlekettik sáýlet-qurylys baqylaý basqarmasynyń bólim basshysynyń mindetin atqarýshy, lıtsenzııalaý bóliminiń basshysy, 2011-2012 jyldary OQO Qurylys basqarmasy basshysynyń orynbasary boldy. 2012-2014 jyldary OQO boıynsha Kedendik baqylaý departamentiniń Kontrabandaǵa qarsy kúres basqarmasynyń basshysy qyzmetin atqardy. 2013-2014 jyldary OQO qurylys basqarmasynyń basshysy boldy.

2016-2017 jyldary «Nur Otan» partııasy OQO fılıaly tóraǵasynyń orynbasary, 2017-2018 jyldary QR AShM Jer resýrstaryn basqarý komıteti tóraǵasynyń orynbasary, 2018 jyly Jambyl oblysy ákiminiń keńesshisi, 2018-2020 jyldary Jambyl oblysy ákiminiń orynbasary laýazymdarynda eńbek etti. 2020-2021 jyldary QR IIDM Qurylys jáne TKSh isteri komıteti tóraǵasynyń orynbasary, 2021 jylǵy tamyzdan QR Prezıdenti Ákimshiliginiń memlekettik ınspektory, 2022-2023 jyldary QR Indýstrııa jáne ınfraqurylymdyq damý vıtse-mınıstri jáne 2023-2024 jyldary Túrkistan oblysy ákiminiń keńesshisi bolǵan. 2024 jyldyń jeltoqsan aıynan bastap qazirge deıin Túrkistan oblysy ákimi apparatynyń basshysy qyzmetin atqaryp keldi.

«Aqtóbe» fýtbol komandasy slovakııalyq maman Shtefan Tarkovıchpen bapkerlik jónindegi kelisimshartqa qol qoıdy.

Shtefan Tarkovıch 1973 jyly 18 aqpanda dúnıege kelgen. 1996 jyldan bastap slovakııalyq birqatar klýbta óner kórsetti. Bapker retinde Slovakııa, BAÁ klýbtarynda eńbek etse, 2023-2024 jyldary Qyrǵyzstan quramasyn jattyqtyrdy.

Aıta keteıik, «Aqtóbe» komandasy bıylǵy birinshilikti sátsiz bastady. Alǵashqy úsh týrda bir márte jeńiske jetip, qalǵan kezdesýlerde qarsylastaryna ese jiberdi. Qazir týrnır kestesinde 3 upaımen 10-orynda tur. Osy jaǵdaıǵa baılanysty bolgarııalyq maman Nıkolaı Kostov qyzmetinen ketti.