Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM – Osy aptada elimizdiń memlekettik basqarý júıesinde, dıplomatııalyq korpýsta jáne sport salasynda birqatar mańyzdy kadrlyq aýys-túıis boldy.
Memleket basshysynyń Jarlyǵymen Asqarbek Ertaev Qazaqstan Eńbek jáne halyqty áleýmettik qorǵaý mınıstri bolyp taǵaıyndaldy.
Asqarbek Ertaev buǵan deıin atalǵan mınıstrlikte vıtse-mınıstr jáne Kóshi-qon komıtetiniń tóraǵasy qyzmetterin atqarǵan. Ol bank sektorynda jáne Ulttyq ekonomıka mınıstrligi men Prezıdent Ákimshiliginde mol tájirıbe jınaqtaǵan maman.
Budan bólek Prezıdent ókimimen Aıbek Smadııarov Qazaqstan Prezıdentiniń keńesshisi – Prezıdenttiń Baspasóz hatshysy laýazymyna bekitildi.
Ol 1983 jylǵy 7 shildede Ońtústik Qazaqstan oblysynda dúnıege kelgen.
Eńbek jolyn 2005 jyly «Qazaqstandaǵy Qytaı banki» AQ Ákimshilik departamentiniń mamany retinde bastaǵan. 2006 jyldan 2008 jylǵa deıin QR Syrtqy ister mınıstrligi Konsýldyq qyzmet departamentiniń mamany retinde qyzmet atqardy.
2008-2010 jyldary QR SІM Eýropa departamentiniń attashesi jáne úshinshi hatshysy laýazymdarynda jumys istedi.
2010-2012 jyldar aralyǵynda Qazaqstannyń Majarstandaǵy Elshiliginde úshinshi hatshy qyzmetin atqardy.
2012 jyldan 2013 jylǵa deıin QR Prezıdentiniń Baspasóz qyzmetinde sarapshy, al 2013-2014 jyldary QR SІM Syrtqy saıası saraptaý men boljamdaý komıtetiniń birinshi hatshysy laýazymyn atqardy.
2014 jyldan 2018 jylǵa deıin Vetnamdaǵy QR Elshiliginde ekinshi jáne birinshi hatshy qyzmetinde jumys istedi.
2018-2019 jyldary QR SІM baspasóz qyzmetin basqaryp, 2019-2023 jyldar aralyǵynda QR SІM Halyqaralyq aqparat komıteti tóraǵasynyń orynbasary – baspasóz hatshysy laýazymyn atqardy.
2023 jylǵy maýsymnan bastap QR SІM Kommýnıkatsııalar departamentiniń dırektory – Resmı ókili boldy.
2025 jyly QR SІM Halyqaralyq aqparat komıtetiniń tóraǵasy — Resmı ókili.
Kólik mınıstrligi Azamattyq avıatsııa komıtetiniń tóraǵasy Saltanat Tompıeva IKAO-nyń (Halyqaralyq azamattyq avıatsııa uıymy) Ǵalamdyq elshisi bolyp taǵaıyndaldy.
Bul taǵaıyndaý IKAO tarapynan Qazaqstan Respýblıkasyna kórsetilgen joǵary senimdi bildiredi ári eldiń halyqaralyq azamattyq avıatsııa kún tártibin ilgeriletýge qosqan úlesiniń moıyndalýy bolyp sanalady.
IKAO elshisi retindegi qyzmetinde Saltanat Tompıeva azamattyq avıatsııany damytýdyń negizgi baǵyttary boıynsha, atap aıtqanda avıatsııa salasynyń ornyqty ósýin qamtamasyz etý, bilikti avıatsııa mamandaryn daıarlaý jáne tartý, sondaı-aq saladaǵy áıelder men jastardyń qatysýyn keńeıtý máseleleri boıynsha habardarlyqty arttyrýǵa úles qosatyn bolady.
Osy aptada otandyq sport áleminde de eleýli jańalyqtar boldy. Qazaqstan fýtbol federatsııasy Qazaqstan ulttyq quramasynyń bas bapkeri qyzmetine Talǵat Baısýfınovtiń taǵaıyndalǵanyn habarlady.
Onyń bastamasymen qurama 2026 jylǵy álem chempıonatynyń irikteý kezeńinde nátıjeli oıyndar ótkizip úlgerdi. Atap aıtqanda, Qazaqstan ulttyq quramasy Lıhtenshteındi 4:0 esebimen jeńip, Soltústik Makedonııa (1:1) jáne Belgııa (1:1) quramalarymen teń tústi.
Buǵan deıin T.Baısýfınov 2016-2017 jáne 2020-2022 jyldar aralyǵynda ulttyq quramanyń bas bapkeri qyzmetin eki ret atqardy.
Ol sondaı-aq birqatar otandyq fýtbol klýbynda bapker boldy. Ár jyldary «Esil-Bogatyr» (Petropavl), «Aqsý», «Ertis» (Pavlodar), «Aqjaıyq» (Oral) klýbtaryn basqaryp, sondaı-aq Qazaqstan jastar quramasymen jumys istedi.
Fýtbolshy mansabynda «Ertis», «Metallýrg», «Eńbek», «Ekıbastýzets», «Jetisý» jáne «Vostok» klýbtarynda oınady.
2019 jylǵy álem chempıonatynyń qola júldegeri Danııar Qaısanov erkin kúresten Qazaqstan quramasynyń bas bapkeri bolyp taǵaıyndaldy.
Bul týraly federatsııanyń baspasóz qyzmeti resmı túrde habarlady.
Danııar Qaısanov 2017 jyldan beri Qazaqstan ulttyq quramasynyń sapynda óner kórsetti. 2019 jyly ol álem birinshiliginde úshinshi oryndy ıelendi.
2020 jylǵy Tokıo (Japonııa) Olımpıadasynda Qaısanov júldege bir qadam jetpeı, qola medal úshin ótken beldesýde jeńilip qaldy. Sondaı-aq onyń enshisinde Azııa chempıonatynyń eki altyn medali bar.
Erkin kúresten ulttyq quramanyń aldaǵy oqý-jattyǵý jıyny aqpan aıynyń alǵashqy jartysynda Almaty oblysynda ótedi.
Almaty oblysy Mádenıet, arhıvter jáne qujattama basqarmasynyń basshysy bolyp Anýar Úmbetalıev taǵaıyndaldy.
Jańa vedomstvo basshysy 1985 jyly dúnıege kelgen, bilimi joǵary. 2007 jyly Qazaq qatynas joldary ýnıversıtetin bitirgen, al 2017-2019 jyldar aralyǵynda «Qaınar» akademııasynda «Ekonomıka» mamandyǵy boıynsha bilim alǵan.
Oblys ákimdiginiń málimetinshe, ol keıingi úsh jyl boıy oblystyq «Halyq shyǵarmashylyǵy» ortalyǵyn basqaryp, óńirdiń mádenı áleýetin damytýǵa jáne shyǵarmashylyq bastamalardy qoldaýǵa baǵyttalǵan birqatar jobalardy júzege asyrǵan.
2017-2022 jyldary «Almaty qalasynyń mýzeıler birlestigi» dırektorynyń orynbasary, keıin dırektory qyzmetterin atqarǵan. 2022-2023 jyldary Almaty oblysynyń mýzeıler birlestigin basqardy.