Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM – 25-31 mamyr aralyǵynda Qazaqstannyń memlekettik basqarý júıesi men óńirlerinde birqatar kadrlyq ózgeris boldy. Kazinform osy aptadaǵy negizgi taǵaıyndaýlarǵa sholý jasaıdy.
Bas Prokýrordyń buıryǵymen Soltústik Qazaqstan oblysynyń prokýrory laýazymyna aǵa ádilet keńesshisi Dúısekenov Erjan Erǵanatuly taǵaıyndaldy.
Erjan Dúısekenov eńbek jolyn Ekibastuz qalasy prokýrorynyń kómekshisi bolyp bastady.
Ár jyldary Ekibastuz qalasy prokýrorynyń orynbasary, Pavlodar oblysy prokýrorynyń aǵa kómekshisi, Quqyqtyq statıstıka jáne arnaıy esepke alý jónindegi komıtettiń Pavlodar oblysy boıynsha departamentiniń bastyǵy laýazymdaryn atqardy.
2023 jylǵy qyrkúıekten Pavlodar oblysy prokýrorynyń birinshi orynbasary laýazymynda qyzmet etti.
Qyzmettik mindetterin minsiz atqarǵany úshin «Jaýyngerlik erligi úshin» medalimen nagradtalǵan. Prokýratýranyń qurmetti qyzmetkeri.
Al Narıman Dúısekeev «Qazaqstan temir joly» ulttyq kompanııasy BAQ-pen jumys jónindegi departamentiniń dırektory qyzmetine kiristi.
Bul týraly ol áleýmettik jelidegi paraqshasynda málimdedi.
Buǵan deıin Narıman Dúısekeev Jolaýshylar tasymaly kompanııasynda baspasóz hatshysy, Azamattarǵa arnalǵan úkimet memlekettik korporatsııasynda basqarýshy dırektor, sondaı-aq Zerde National Infocommunication Holding qurylymynda túrli qyzmetter atqarǵan bolatyn.
Sonymen qatar Arman Ábeýov Halyqaralyq dzıýdo federatsııasynyń (IJF) Áskerı jáne polıtsııa komıssııasy quramyndaǵy Áskerı komıssııanyń basshysy bolyp taǵaıyndaldy.
Arman Ábeýov – dzıýdodan halyqaralyq dárejedegi sport sheberi, Qazaqstan chempıony jáne halyqaralyq týrnırlerdiń jeńimpazy. Sondaı-aq Abý-Dabı men Las-Vegas qalalarynda ótken ardagerler arasyndaǵy álem chempıonattarynyń júldegeri atanǵan.
Federatsııanyń resmı qurylymdarynyń habarlaýynsha, taǵaıyndaý kezinde Arman Ábeýovtiń kásibı tájirıbesi men sportty, áskerı-patrıottyq tárbıeni jáne dzıýdo salasyndaǵy halyqaralyq yntymaqtastyqty damytýǵa qosqan úlesi eskerilgen.
Arman Ábeýov Qazaqstan Respýblıkasy Qorǵanys mınıstrliginiń Sport komıteti tóraǵasy – Armııa ortalyq sport klýbynyń bastyǵy qyzmetin atqarady.
Onyń jetekshiligimen Qarýly kúshterde dene shynyqtyrý men sportty damytý, áskerı qyzmetshi-sportshylardy halyqaralyq jarystarǵa daıarlaý jáne áskerı-qoldanbaly sport túrlerin jetildirý baǵytynda jumystar júrgizilip keledi.
Qazaqstanda ótken aptada bolǵan kadrlyq taǵaıyndaýlar týraly osy silteme arqyly oqýǵa bolady.
