Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM – Osy aptada elimizdiń ortalyq jáne jergilikti atqarýshy organdarynda birqatar kadrlyq aýys–túıis boldy.
Raqymjan Ernazar Qazaqstan Respýblıkasy Prezıdenti Ákimshiliginiń Áleýmettik-ekonomıkalyq saıasat bóliminiń meńgerýshisi bolyp aýysty.
Osylaısha Memleket basshysynyń ókimimen Aıdyn Jeńisuly Qulseıitov Qazaqstan Respýblıkasy Prezıdenti Ákimshiliginiń Áleýmettik-ekonomıkalyq saıasat bóliminiń meńgerýshisi laýazymynan bosatyldy.
Raqymjan Ernazar 1988 jyly Taldyqorǵan qalasynda dúnıege kelgen.
2010 jyly Qazaqstan-Brıtan tehnıkalyq ýnıversıtetin (bakalavr dárejesi) bitirgen.
2011 jyly tehnıka jáne tehnologııa magıstri dárejesin aldy.
2011 jyldan 2016 jylǵa deıin – «Tehnologııalyq damý jónindegi ulttyq agenttik «AQ-da taldamalyq baǵyt boıynsha túrli laýazymdarda jumys istedi.
2016 jyldan 2018 jylǵa deıin – Strategııalyq jobalar ortalyǵynyń dırektory «Qazaqstandyq ındýstrııany damytý ınstıtýty» AQ. Japonııada, Avstrııada, AQSh-ta jáne Ońtústik Koreıada taǵylymdamadan ótti.
2018 jyldan 2020 jylǵa deıin – QR Tuńǵysh Prezıdenti Qory janyndaǵy «Álemdik ekonomıka jáne saıasat ınstıtýty» korporatıvtik qorynyń «Strategııalyq zertteýler jáne boljaý» baǵdarlamasynyń jetekshisi.
2020 jyldan beri QR Prezıdenti Ákimshiliginiń Strategııalyq josparlaý bólimi meńgerýshisiniń orynbasary, QR Prezıdenti Ákimshiliginiń Strategııalyq josparlaý bóliminiń meńgerýshisi qyzmetterin atqarǵan.
Apta basynda Erlan Súttibaev Qazaqstan Respýblıkasy Prezıdenti Іs basqarýshysynyń orynbasary bolyp taǵaıyndaldy.
Densaýlyq saqtaý mınıstriniń buıryǵymen «Áleýmettik medıtsınalyq saqtandyrý qory» KeAQ Basqarma tóraǵasy laýazymyna Aıdyn Qulseıitov taǵaıyndaldy.
Aıdyn Qulseıitov Óskemende dúnıege kelgen.
Shyǵys Qazaqstan memlekettik tehnıkalyq ýnıversıtetin «Injener-ekonomıst» mamandyǵy boıynsha jáne QR Prezıdenti janyndaǵy Memlekettik qyzmet akademııasyn «Memlekettik qyzmet menedjeri» mamandyǵy boıynsha bitirgen.
Eńbek jolyn basqarýshy laýazymdarǵa deıin jeke salada bastaǵan. Sodan keıin Memlekettik qyzmetke aýysty.
Indýstrııa jáne saýda mınıstrliginde, energetıka jáne mıneraldyq resýrstar mınıstrliginde jumys istedi, «Tehnologııalyq damý jónindegi ulttyq agenttik» AQ, «Qazaqstandyq ındýstrııany damytý ınstıtýty» AQ Basqarma tóraǵasy boldy.
2017 jyldan bastap QR Prezıdentiniń Ákimshiliginde birqatar basshylyq qyzmet atqardy.
Eki jyl boıy QR Prezıdenti Ákimshiliginiń Strategııalyq ázirlemeler jáne taldaý ortalyǵyn basqardy. Sodan keıin Qazaqstan Respýblıkasynyń Prezıdenti Ákimshiliginiń Strategııalyq josparlaý bóliminiń meńgerýshisi bolyp taǵaıyndaldy.
Sońǵy eki jylda QR Prezıdenti Ákimshiliginiń Áleýmettik-ekonomıkalyq monıtorıng bóliminiń basshysy bolyp jumys istedi.
Osy ýaqytqa deıin Qazaqstan Prezıdenti Ákimshiliginiń Áleýmettik-ekonomıkalyq saıasat bóliminiń meńgerýshisi laýazymynda qyzmet atqardy.
Tótenshe jaǵdaılar mınıstriniń buıryǵymen azamattyq qorǵaý polkovnıgi Erlan Tóregeldıev Órtke qarsy qyzmet komıtetiniń tóraǵasy bolyp taǵaıyndaldy.
Erlan Tóregeldıev 1980 jyly Semeı qalasynda dúnıege kelgen.
Shákárim atyndaǵy Semeı memlekettik ýnıversıtetin jáne QR TJM Kókshetaý tehnıkalyq ınstıtýtyn bitirgen.
Azamattyq qorǵaý organdarynda qyzmetin 2005 jyly Shyǵys Qazaqstan oblysy Kýrchatov qalasy Tótenshe jaǵdaılar salasyndaǵy memlekettik baqylaý jáne qadaǵalaý bóliminiń ınjeneri laýazymynan bastady.
2020 jylǵa deıin Shyǵys Qazaqstan jáne Batys Qazaqstan oblystaryndaǵy TJM bólimshelerinde jumys istedi.
2020 jyldan bastap QR TJM Órtke qarsy qyzmet komıtetiniń Memlekettik órtti baqylaý jáne órtke qarsy normalaý basqarmasyn basqardy.
2024 jyldan bastap osy komıtet tóraǵasynyń orynbasary qyzmetin atqardy.
Abaı oblysy ákiminiń birinshi orynbasary bolyp Erbol Sadyr taǵaıyndaldy.
Erbol Ábilhaıyruly 1973 jyly 23 naýryzda Túrkistan oblysy Sozaq aýdany Tasty aýylynda dúnıege kelgen.
1994 jyly Qazaq Memlekettik basqarý akademııasyn «ekonomıst» mamandyǵy boıynsha aıaqtaǵan.
Ár jyldary Ońtústik Qazaqstan oblysy Sozaq aýdany Sholaqqorǵan aýylynda ekonomıka bóliminiń bas mamany, Ekonomıka jáne shaǵyn kásipkerlikti qoldaý bóliminiń meńgerýshisi, Ońtústik Qazaqstan oblysy Kásipkerlikti qoldaý basqarmasy basshysynyń orynbasary, Ekonomıka jáne bıýdjetti josparlaý basqarmasynyń basshysy qyzmetterin atqarǵan.
Ońtústik Qazaqstan, Túrkistan oblystary ákiminiń orynbasary, Shymkent qalasy ákiminiń orynbasary, birinshi orynbasary bolyp eńbek etti.
Osy taǵaıyndaýǵa deıin bıznes salasynda jumys istedi.
Túrkistan oblysy ákiminiń orynbasary bolyp Talǵat Qozbekov taǵaıyndaldy.
Talǵat Japarhanuly 1976 jyly Taldyqorǵan oblysy Panfılov aýdany Kóktal aýylynda dúnıege kelgen. Abaı atyndaǵy Almaty memlekettik ýnıversıtetin «Ekonomıst- marketolog» jáne Al-Farabı atyndaǵy Qazaq Ulttyq Ýnıversıtetin «Zańger» mamandyqtary boıynsha bitirgen.
Eńbek jolyn 1999 jyly Panfılov aýdany boıynsha salyq komıtetiniń Salyq aýdıti bóliminde salyq ınspektory laýazymynan bastady. Ár jyldary bólim basshysy, basqarma basshysynyń orynbasary, Panfılov aýdany boıynsha memlekettik kirister basqarmasynyń basshysy laýazymdaryn atqardy.
2020 jyldan bastap Atyraý oblysy boıynsha Memlekettik kirister departamenti basshysynyń orynbasary laýazymynda jáne Almaty oblysy boıynsha Memlekettik kirister departamentiniń basshysy bolyp qyzmet etti.
2022 jyldyń qyrkúıek aıynan beri Jetisý oblysy boıynsha Memlekettik kirister departamentiniń basshysy qyzmetin atqaryp keldi.
Talǵat Qozbekov oblys ákiminiń orynbasary retinde kásipkerlik jáne saýda, qurylys, memlekettik satyp alý, qarjy jáne memlekettik aktıvter, ekonomıka jáne bıýdjettik josparlaý basqarmalarynyń jumystaryna jetekshilik etedi.
Almaty qalasy sport basqarmasynyń basshysy qyzmetine Darhan Nurhanuly taǵaıyndaldy.
Darhan Nurhanuly Qazaq gýmanıtarlyq-zań ınnovatsııalyq ýnıversıtetiniń túlegi. Sonymen qatar ol qarjy salasynda orta bilim men zań salasynda joǵary bilim alǵan. Eńbek jolyn 2011 jyly qurylys kompanııasynda jumysshy retinde bastaǵan. Ol memlekettik qurylymdarda jumysyn jetekshi maman retinde bastap basshylyq laýazymdarǵa deıin kóterilgen.
2020-2021 jyldary QR Premer-mınıstri orynbasarynyń áleýmettik damý, densaýlyq saqtaý, mádenıet jáne sport máseleleri boıynsha keńesshisi boldy. Keıin Jambyl oblysy ákimi apparaty basshysynyń orynbasary laýazymyn atqardy.
2022 jyly tamyz aıynan bastap sońǵy taǵaıyndalǵanǵa deıin Almaty qalasy ákimi apparaty basshysynyń orynbasary bolǵan.
Almaty qalasy Ekologııa jáne qorshaǵan orta basqarmasynyń basshysy laýazymyna Mıras Gaısın taǵaıyndaldy.
Mıras Gaısın 1987 jyly Almaty qalasynda týǵan. Sh.Ýálıhanov atyndaǵy Kókshetaý memlekettik ýnıversıtetin quqyqtaný mamandyǵy boıynsha bitirgen.
Eńbek jolyn 2008 jyly Almaty qalasy ákimdiginiń turǵyn úı-kommýnaldyq sharýashylyq bóliminiń mamany retinde bastaǵan. Keıingi jyldary Almaty jáne Astana qalalary ákimdikteriniń Tabıǵı resýrstar basqarmalarynda ártúrli basshylyq qyzmetter atqardy. 2023 jyldan beri Almaty qalasy Ekologııa jáne qorshaǵan orta basqarmasy basshysynyń orynbasary qyzmetin atqardy.
Qyzylorda oblystyq mádenıet, arhıvter jáne qujattama basqarmasynyń basshysy bolyp Janmurat Seıilov taǵaıyndaldy.
Ol 1985 jyly Jambyl oblysy Qarataý qalasynda dúnıege kelgen. Muhammed Haıdar Dýlatı atyndaǵy Taraz memlekettik ýnıversıtetinde tarıh, quqyq jáne ekonomıka negizderi, Qoja Ahmet ıAssaýı atyndaǵy halyqaralyq qazaq-túrik ýnıversıtetinde memlekettik jáne jergilikti basqarý mamandyqtary boıynsha bilim alǵan.
Eńbek jolyn Qyzylorda oblysy ákimi apparatynyń ınspektory retinde bastaǵan. Ár jyldary Qyzylorda qalasynyń kásipkerlik, ónerkásip jáne týrızm bóliminiń basshysy, qalalyq máslıhattyń, qala ákimi apparatynyń basshysy, Qyzylorda qalasy ákiminiń orynbasary, Qyzylorda oblysynyń dene shynyqtyrý, sport jáne týrızm basqarmasynyń basshysy laýazymdarynda eńbek etken.
2024 jyldyń qyrkúıek aıynan osy kúnge deıin Qyzylorda oblysy ákimi apparaty basshysynyń orynbasary laýazymyn atqaryp keldi.
Qyzylorda oblystyq din isteri basqarmasynyń basshysy laýazymyna Mıra Qazbekova taǵaıyndaldy.
Ol 1984 jyly Qyzylorda oblysynyń Qazaly aýdanynda dúnıege kelgen.
Qorqyt ata atyndaǵy Qyzylorda memlekettik ýnıversıtetinde qazaq tili men ádebıeti, «Ekonomıka», «Bolashaq» ýnıversıtetterinde zańtaný mamandyqtary boıynsha bilim alǵan. Eńbek jolyn 2005 jyly memlekettik qyzmetshilerdi jáne bıýdjettik sala qyzmetkerlerin qaıta daıarlaý jáne olardyń biliktiligin arttyrý óńirlik ortalyǵynda bastaǵan.
Ár jyldary Qyzylorda oblysynyń mádenıet, arhıvter jáne qujattama basqarmasy basshysynyń orynbasary, Qyzylorda qalalyq mádenıet jáne tilderdi damytý bóliminiń basshysy, Qyzylorda qalasy ákimi apparatynyń basshysy, Qyzylorda qalasy ákiminiń orynbasary, Qyzylorda oblysynyń qoǵamdyq damý basqarmasynyń basshysy boldy.
2023 jyldyń qańtar aıynan osy kúnge deıin Qyzylorda oblysynyń mádenıet, arhıvter jáne qujattama basqarmasynyń basshysy qyzmetin atqaryp keldi.
Qazaqstan fýtbol federatsııasynyń bas hatshysy qyzmetine Davıd Lorııa taǵaıyndaldy.
Davıd Grıgorevıch – Qazaqstan ulttyq quramasynyń burynǵy oıynshysy, ÝEFA-nyń MIP baǵdarlamasynyń túlegi.
Qazirgi tańda ol Astana qalalyq máslıhatynyń depýtaty, sondaı-aq eldiń áleýmettik ómirin damytýǵa qosqan úlesi úshin «Qurmet» ordeniniń ıegeri.
Aıta keteıik, munyń aldynda bul laýazymdy Saıan Hamıtjanov atqarǵan. Ol jańa jumys ornyna aýysýyna baılanysty laýazymynan ketti.
«Qazaqstan» RTRK» AQ Abaı oblystyq fılıalynyń dırektory qyzmetine Nurbek Bekenov taǵaıyndaldy.
Nurbek Muhametqalıuly – tájirıbeli telejýrnalıst. Memlekettik qyzmet salasynda da jumys istegen.
Shyǵys Qazaqstan oblysy Tarbaǵataı aýdanynyń Jetiaral aýylynda dúnıege kelgen. Jýrnalıstıka salasyndaǵy eńbek jolyn 2003 jyly jergilikti telearnada dıktor retinde bastaǵan.
«Qazaqstan» RTRK men 24KZ telearnasynyń Qytaıdaǵy, «Habar» agenttiginiń AQSh-taǵy menshikti tilshisi qyzmetterin atqarǵan.
Sonymen qatar Jambyl oblysynda «Aulieata-Media» holdıngi JShS bas dırektory, Shyǵys Qazaqstan oblysynda «Shyǵys-Aqparat» medıa holdıngi JShS basqarma tóraǵasy laýazymdaryn atqardy.
QR Prezıdenti baspasóz qyzmetinde jáne Ulttyq ekonomıka mınıstrliginde keńesshi bolyp eńbek etken.