Qazaqstanda apta ishinde bolǵan kadrlyq taǵaıyndaýlar
ASTANA. KAZINFORM – Osy apta elimizdiń ortalyq jáne jergilikti atqarýshy organdarynda birqatar kadrlyq aýys-túıis boldy.
Memleket basshysynyń ókimimen Erbol Dánenuly Adaev Qazaqstan Respýblıkasy Prezıdenti Ákimshiliginiń Jalpy bóliminiń meńgerýshisi laýazymyna taǵaıyndaldy.
Munymen qosa, Dáýren Tilekuly Erǵarın Qazaqstan Respýblıkasy Prezıdenti Ákimshiliginiń Quqyq qorǵaý júıesi bóliminiń meńgerýshisi laýazymyna taǵaıyndaldy.
***
Bul aptada Erulan Jamaýbaev QR Ulttyq banki tóraǵasynyń birinshi orynbasary boldy.
Erulan Kenjebekuly Jamaýbaev 1974 jylǵy 25 naýryzda Almaty oblysynda dúnıege kelgen.
1995 jyly Qazaq memlekettik basqarý akademııasyn «Qarjy jáne kredıt» mamandyǵy boıynsha, 2009 jyly Qazaq ekonomıkalyq ýnıversıtetin «Іskerlik ákimshilendirý magıstri» mamandyǵy boıynsha támamdaǵan.
2020 jyldyń 18 mamyrynda Qazaqstan Respýblıkasynyń Qarjy mınıstri bolyp taǵaıyndaldy. 2024 jylǵy 6 aqpanda bul laýazymynan bosatyldy. 2024 jyly 20 mamyrdan bastap qazirgi deıin Prezıdent keńesshisi qyzmetin atqaryp keldi.
***
Memleket basshysynyń ókimimen Berik Ýálı Abaı oblysynyń ákimi bolyp taǵaıyndaldy.
Berik Ýálı 1977 jyly Semeı oblysynda dúnıege kelgen. T. Júrgenov atyndaǵy Qazaq memlekettik teatr jáne kıno ınstıtýtyn «Kınotanýshy», Ál-Farabı atyndaǵy Qazaq ulttyq ýnıversıtetin «Jýrnalıstıka» (magıstratýra), sondaı-aq Qazaq ınnovatsııalyq gýmanıtarlyq-zań ýnıversıtetin «Quqyqtaný» mamandyqtary boıynsha bitirgen.
2023 jylǵy 12 qyrkúıekte Memleket basshysynyń ókimimen Qazaqstan Respýblıkasy Prezıdentiniń Keńesshisi – Prezıdenttiń Baspasóz hatshysy laýazymyna taǵaıyndaldy.
***
Memleket basshysynyń ókimimen Rýslan Sultanuly Jeldibaı Qazaqstan Respýblıkasy Prezıdentiniń keńesshisi – Prezıdenttiń Baspasóz hatshysy laýazymyna taǵaıyndaldy.
R. Sultanuly 1989 jyly dúnıege kelgen. 2010 jyly T.Rysqulov atyndaǵy Qazaq ekonomıkalyq ýnıversıtetin bitirgen. «Bolashaq» halyqaralyq bilim berý baǵdarlamasynyń túlegi. 2017 jyly Ýorık ýnıversıtetiniń (Ulybrıtanııa) magıstratýrasyn támamdaǵan.
2023 jylǵy 1 qyrkúıekten 2025 jyldyń 17 aqpanyna deıin Qazaqstan Respýblıkasy Prezıdentiniń ishki saıasat máseleleri jáne kommýnıkatsııalar jónindegi kómekshisi boldy.
***
QR Úkimetiniń qaýlysymen Azamat Kemengeruly Ámrın Qazaqstan Respýblıkasynyń ulttyq ekonomıka birinshi vıtse-mınıstri qyzmetine taǵaıyndaldy.
1973 jyly Soltústik Qazaqstan oblysynda dúnıege kelgen. Aqmola aýyl sharýashylyǵy ınstıtýtyn, M. Qozybaev atyndaǵy Soltústik Qazaqstan memlekettik ýnıversıtetin bitirgen.
2020 jyldan bastap qazirgi ýaqytqa deıin QR Ulttyq ekonomıka vıtse-mınıstri qyzmetin atqardy.
***
Budan bylaı Nurymbet Saqtaǵanov Shyǵys Qazaqstan oblysyn basqarady.
Nurymbet Saqtaǵanov 1970 jyly Túrkistan oblysynda dúnıege kelgen. Qorqyt Ata atyndaǵy Qyzylorda memlekettik ýnıversıtetin, Máskeý memlekettik ekonomıka, statıstıka jáne ınformatıka ýnıversıtetin, S. Amanjolov atyndaǵy Shyǵys Qazaqstan memlekettik ýnıversıtetin bitirgen.
2023 jyldyń 8 qyrkúıeginde ShQO ákiminiń birinshi orynbasary bolyp taǵaıyndaldy.
***
Qaraǵandy oblysynyń jastar saıasaty máseleleri jónindegi basqarmasyn Aısulý Ernııazova basqardy.
A. Ernııazova eńbek jolyn 2015 jyly ál-Farabı Qazaq ulttyq ýnıversıtetiniń jastar uıymdarymen jumys jónindegi jetekshi mamany bolyp bastaǵan, sodan keıin sol jerde jastar uıymdarymen jumys jónindegi komıtetti basqarǵan.
Osy ýaqytqa deıin Astanadaǵy «Jastar» ǵylymı-zertteý ortalyǵy» JShS dırektory bolyp jumys istedi.
***
Elnar Ýahıtov Qaraǵandy oblysy Memlekettik satyp alý basqarmasynyń basshysy qyzmetine taǵaıyndaldy.
E. Ýahıtov eńbek jolyn 2003 jyly «Qaraǵandy Jylý» JShS materıaldyq-tehnıkalyq jabdyqtaý bóliminiń marketıng jáne sapa jónindegi menedjeri bolyp bastaǵan.
2017 jyldyń qańtarynan bastap osy kúnge deıin Astana qalasy «Esil» aýdany ákiminiń orynbasary qyzmetin atqarǵan.
***
Túrkistan oblysynyń aýyl sharýashylyǵy basqarmasynyń basshysy laýazymyna Faızýlla Baıdýllaev taǵaıyndaldy.
Faızýlla Baıdýllaev 1985 jyly Shymkent qalasynda dúnıege kelgen. Bilimi – joǵary. M.Áýezov atyndaǵy Ońtústik Qazaqstan memlekettik ýnıversıtetinde «Bank isi» mamandyǵy boıynsha jáne Shymkent ýnıversıtetinde «Quqyqtaný» mamandyǵy boıynsha bilim alǵan.
2022 jyldyń qazan aıynan bastap búgingi kúnge deıin «Túrkistan» ÁKK» AQ Basqarma tóraǵasy laýazymynda eńbek etti.
***
Osy aptada Qyzylorda oblysynyń sanıtarııalyq-epıdemıologııalyq baqylaý departamentine basshy taǵaıyndaldy. QR Densaýlyq saqtaý mınıstrliginiń buıryǵymen bul qyzmetke Gúlmıra Jambylqyzy Syzdyqova keldi.
G. Jambylqyzy 1969 jyly Qyzylorda qalasynda dúnıege kelgen. 1987 jyly Qyzylorda memlekettik medıtsınalyq ýchılışesinde «Emdeý isi, feldsher» mamandyǵy boıynsha bilim alsa, 1995 jyly Qaraǵandy memlekettik ınstıtýtyn «Medıko-profılaktıkalyq is» mamandyǵy boıynsha bitirgen.
2017-2023 jyldar aralyǵynda Qyzylorda qalalyq SEBB basshysynyń orynbasary, 2023 jyldan basshysy qyzmetin atqardy.
***
Shymkenttiń bas sanıtarlyq dárigeri taǵaıyndaldy.
QR Densaýlyq saqtaý mınıstrliginiń buıryǵymen bul qyzmetke Talǵat Sermańızov keldi.
***
QR Adam quqyqtary jónindegi ýákildiń buıryǵymen Erkin Qýanyshev Adam quqyqtary jónindegi ýákildiń Jambyl oblysy boıynsha ókili laýazymyna taǵaıyndaldy.
Erkin Qýanyshev 1968 jyly 1 tamyzda Jambyl oblysynyń Sverdlov (qazirgi Baızaq) aýdanynda dúnıege kelgen. 1986 jyly Jambyl esepke alý-statıstıkalyq tehnıkýmyn, 1990 jyly Jambyl jeńil jáne tamaq ónerkásibi tehnologııalyq ınstıtýtyn «Ekonomıka» mamandyǵy boıynsha, 1998 jyly Taldyqorǵan zań ınstıtýtyn «Quqyqtaný» mamandyǵy boıynsha bitirgen.
***
Kúmis Seıitova QR Ulttyq akademııalyq kitaphanasynyń dırektory laýazymyna taǵaıyndaldy.
Kúmis Qarsaqbaıqyzy Seıitova Qaraǵandy oblysynda dúnıege kelgen. Jezqazǵan pedagogıkalyq ınstıtýtyn, D. Qonaev atyndaǵy gýmanıtarlyq ýnıversıtetti jáne «Bolashaq» akademııasyn bitirgen.
2004-2023 jyldary QR Mádenıet jáne aqparat mınıstrliginiń qurylymynda ártúrli laýazymdarda jumys istedi, sońǵy laýazymy — QR Mádenıet jáne aqparat mınıstrligi Mádenıet komıtetiniń tóraǵasy.