Qazaqstanda apta ishinde bolǵan kadrlyq taǵaıyndaýlar

ASTANA. KAZINFORM — Osy apta elimizdiń jergilikti atqarýshy organdarynda birqatar kadrlyq aýys-túıis boldy.

Bul aptada Prezıdent UQK Sybaılas jemqorlyqqa qarsy is-qımyl qyzmetiniń dırektory laýazymyna Nurjan Qusaıynovty taǵaıyndady. Buǵan deıin QR Ulttyq qaýipsizdik komıtetine qosý arqyly QR Sybaılas jemqorlyqqa qarsy is-qımyl agenttigi (Sybaılas jemqorlyqqa qarsy qyzmet) qaıta uıymdastyrylady.

Sondaı-aq, Prezıdent Ákimshiliginiń kelisimimen jáne Jambyl oblysy ákiminiń ókimimen Aıjan Serikbaıqyzy Esmaǵambetova Jambyl oblysy ákiminiń orynbasary (áleýmettik jumys boıynsha) bolyp taǵaıyndaldy.

Aıjan Serikbaıqyzy 1972 jyly dúnıege kelgen. Bilimi joǵary. 1997 jyly Qazaq memlekettik medıtsına ýnıversıtetin «Sanıtarııa, gıgıena jáne epıdemıologııa», 2005 jyly «QDSJM» Qazaqstandyq medıtsına ýnıversıtetin «Qoǵamdyq densaýlyq saqtaý» jáne 2008 jyly Almaty Management University-in «Densaýlyq saqtaý menedjmenti» mamandyǵy mamandyqtary boıynsha bitirgen.

Eńbek jolyn 1990 jyly Almaty qalasy № 7 emhanasynyń feldsher-zerthanashysy bolyp bastaǵan. Ár jyldary Respýblıkalyq sanıtarlyq epıdemıologııalyq stantsııasynyń epıdemıolog-dárigeri, Densaýlyq saqtaý mınıstrligi Sanıtarlyq-epıdemıologııalyq qadaǵalaý komıtetinde jetekshi maman, bas maman, sarapshy, basqarma basshy qyzmetterin atqardy. Sonymen birge Densaýlyq saqtaý mınıstrligi Memlekettik sanıtarııalyq-epıdemıologııalyq qadaǵalaý komıtetiniń tóraǵasy — QR Bas memlekettik sanıtarııalyq dárigeriniń orynbasary, dárigeri, Tutynýshylardyń quqyqtaryn qorǵaý agenttiginiń bas memlekettik sanıtarııalyq dárigeriniń orynbasary — epıdemıologııalyq qadaǵalaý departamentiniń dırektory, Ulttyq ekonomıka mınıstrligi Tutynýshylardyń quqyqtaryn qorǵaý komıtetiniń bólim basshysy bolyp eńbek etti. Densaýlyq saqtaý mınıstrliginiń Strategııalyq damý jáne qoǵamdyq densaýlyq saqtaý, Qoǵamdyq densaýlyq saqtaý saıasaty departamentteriniń dırektory, sondaı-aq Taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary, Sanıtarııalyq-epıdemıologııalyq baqylaý komıtetiniń tóraǵasy, Densaýlyq saqtaý vıtse-mınıstri, Bas memlekettik sanıtarııalyq dárigeri boldy.
2024 jylǵy shilde aıynan bastap QR Densaýlyq saqtaý mınıstrliginiń «Qoǵamdyq densaýlyq saqtaý ulttyq ortalyǵy» ShJQ RMK Basqarma tóraǵasy laýazymynda qyzmet atqaryp keldi.

Soltústik Qazaqstan oblysy tabıǵı resýrstar jáne tabıǵat paıdalanýdy retteý basqarmasy basshysynyń mindetin atqarýshy bolyp óńir basshysynyń ókimimen Erbolat Bekshenov taǵaıyndaldy. Osy taǵaıyndaýǵa deıin Qyzyljar sý qoımalarynda dırektor bolyp qyzmet etti.

Erbolat Bekshenov 1973 jyly týǵan, Ortalyq Azııa ýnıversıtetin ekonomıst mamandyǵy boıynsha bitirgen. Eńbek jolyn «Bekshenov» sharýa-fermerlik qojalyǵy basshysynyń orynbasary bolyp bastady. «Et» JShS-de marketıng bóliminiń meńgerýshisi, Taıynsha aýdanyndaǵy Donetsk aýyldyq okrýginiń ákimi, Mámlút qalasy ákiminiń orynbasary, Mámlút aýdany ákiminiń orynbasary qyzmetterin atqardy. Sondaı-aq SQO aýyl sharýashylyǵy jáne jer qatynastary basqarmasynyń basshysy, Aıyrtaý aýdanynyń ákimi laýazymdaryn atqarǵan.

Sonymen birge, «Qarjy ortalyǵy» aktsıonerlik qoǵamynyń dırektorlar keńesiniń sheshimimen basqarma tóraǵasy bolyp Ótelbaeva Sholpan Ánýarbekqyzy saılandy. 

Sholpan Ótelbaeva ıAssaýı atyndaǵy Halyqaralyq Qazaq-Túrik ýnıversıtetiniń túlegi. Qazaqstan Respýblıkasy Prezıdentiniń janyndaǵy Memlekettik qyzmet akademııasynda jáne Pensılvanııa ýnıversıtetinde (AQSh) oqydy. Eńbek jolyn QR Tabıǵı monopolııalardy retteý agenttiginde bólim bastyǵy bolyp bastady (2004-2009 jyldar). 2009 jyldyń qyrkúıeginen 2010 jyldyń naýryzyna deıin QR Qarjy mınıstrliginiń Investıtsııalyq jobalar basqarmasynyń bastyǵy bolyp jumys istedi.
2010-2017 jyldary — «Nazarbaev Zııatkerlik mektepteri» derbes bilim berý uıymynyń basqarma tóraǵasynyń orynbasary. 2017-2019 jyldary — «Qarjy ortalyǵy» AQ vıtse-prezıdenti. 2021 jyly — «Ulttyq dene shynyqtyrý ǵylymı-praktıkalyq ortalyǵy» RMK vıtse-prezıdenti. 2022 jyldyń tamyzynan 2024 jyldyń tamyzyna deıin — «Talap» kommertsııalyq emes aktsıonerlik qoǵamynyń prezıdenti bolǵan.

«Ertis» klýbynyń sport dırektory qyzmetine Konstantın Gorovenko taǵaıyndaldy.

Ony qazaqstandyq fýtbol jankúıerlerine «Qaırat», «Qaınar», «Jeńis», «Alma-Ata», «Suńqar», «Megasport» syndy klýbtary jáne Qazaqstan quramasynyń oıynshysy retinde jaqsy tanıdy. Bapkerlik mansabynda «Suńqar», «Jetisý», «Shahter», «Atyraý» jáne «Kaspıı» klýbtaryna basshylyq jasady.
Sondaı-aq «Qaırattyń» jastar komandasymen 2017 jyly Qazaqstan Birinshi lıgasynyń qola júldegeri boldy. 2021 jyly «Maqtaaral» komandasymen Birinshi lıganyń kúmis júldesine qol jetkizip, Premer-lıgaǵa joldama aldy. Ol bıyl «Atyraý» komandasynda bas bapker boldy. Komandanyń kórsetkishiniń tómen bolýyna baılanysty atalǵan qyzmetinen ketýge májbúr boldy.

Al «Ordabasy» klýbynyń sport dırektory laýazymyna Tańat Nóserbaev taǵaıyndaldy.

Tańat Nóserbaev — Ońtústik fýtbol mektebiniń túlegi. Fýtbolshy kásibı mansabyn atalǵan klýbtyń farm-komandasynan bastaǵan. Keıin 2011 jyldan bastap el birinshiligindegi «Lokomatıv» komandasynda dop tepti. Artynsha klýbtyń ataýy «Astanaǵa» aýysty. Nóserbaev 2013 jyly elordalyqtardyń kapıtany boldy. Elordalyq komanda sapynda úsh dúrkin el chempıony atanyp, bir ret Qazaqstan Kýbogyn ıelengen.

2017-2018 jyldary qaıtadan «Ordabasy» komandasynda dop tepti. 2018 jyly «Tobyl» komandasyna jalǵa berildi. Bir jyldan soń «Oqjetpes» jeıdesinde óner kórsetti. 2008 jyly 11 qazan kúni «Ýemblıde» Anglııaǵa qarsy tuńǵysh ret Qazaqstan quramasy sapynda alańǵa shyqty. 2009 jyly 10 maýsym kúni syrt alańda Ýkraına qaqpasyna birinshi golyn soqty. Bul eki oıyn da 2010 jylǵy álem chempıonatyna irikteý týrnıri aıasyndaǵy kezdesý bolatyn. 2014 jyly 12 tamyz kúni Almatyda Tájikstanǵa qarsy joldastyq kezdesýde kapıtan retinde alańǵa shyqty. Al 2017 jyly 10 maýsym kúni Almatydaǵy Danııaǵa qarsy 2018 jylǵy álem chempıonatyna irikteý aıasyndaǵy oıynda sońǵy ret qurama sapynda alańǵa shyqty.