Qazaqstanda apta saıyn 26 memleketke 425 áýe reısi jasalady
ASTANA. QazAqparat - Halyqaralyq reısterdi turaqty túrde qazaqstandyq eki áýe kompanııa ǵana júzege asyrady, olar - «Eır Astana» jáne «SKAT».
2015 jyly atalmysh kompanııalar halyqaralyq baǵyt boıynsha 1,8 mln. jolaýshyny tasymaldaǵan. «Eır Astananyń» naryqtaǵy úlesi 89 paıyzdy (1 581 094 adam), al «SKAT» kompanııasynyń úlesi 11 paıyzdy (194 626 adam) qurady, dep habarlaıdy QazAqparat QR Investıtsııalar jáne damý mınıstrliginiń baspasóz qyzmetine silteme jasap.
Qazaqstandyq áýekompanııalardan bólek, qazirgi ýaqytta halyqaralyq áýetasymaly naryǵynda 22 sheteldik kompanııa bar. Olardyń qatarynda Turkish Airlines, Etihad, Aeroflot, KLM, Lufthansa, China Southern Airlines, Asiana Airlines, Fly Dubai, Ózbek áýejelisi sııaqty iri álemdik áýe kompanııalary bar. Degenmen, halyqaralyq jolaýshylardy tasymaldaýda qazaqstandyq kompanııalardyń úlesi basym. Ortasha eseppen jyl saıyn 51% jáne 49% quraıdy. Bul jerde 51% qazaqstandyq áýekompanııalardyń úlesinde.
Búgingi tańda Qazaqstanda aptasyna 88 halyqaralyq baǵyt boıynsha 26 shetel memleketine 425 áýe reısi jasalady.
Qazaqstannyń TMD elderimen 50 baǵyt boıynsha áýe qatynasy jolǵa qoıylǵan (aptasyna 236 reıs). Sondaı-aq Taıaý Shyǵys elderimen 15 baǵyt (aptasyna 92 reıs), Ońtústik-Shyǵys Azııa elderimen 14 baǵyt (aptasyna 69 reıs) jáne EO elderimen 9 baǵyt boıynsha (aptasyna 28reıs) áýe qatynasy bar.
